Կարելի է ապացուցել, որ Իրան-Հայաստան երկաթուղին տնտեսապես ձեռնտու է: Հուլիսի 21-ին Երեւանում լրագրողների հետ հանդիպմանն այս մասին հայտարարեց տարածաշրջանային հարցերով իրանցի փորձագետ Էհսան Հուշմանդը:
Նրա խոսքով, եթե հաջողվի կառուցել Իրան-Հայաստան երկաթուղին, կնպաստի տուրիզմի զարգացմանն ու առեւտրի ընդլայնմանը: «Եթե խնդիրը դիտարկենք նաեւ տարածաշրջանի անվտանգության, կայունության տեսանկյունից, ցանկացած գումար արժե ծախսել այդ երկաթուղու կառուցման համար: Եթե հիմա պետությունները գումար են ծախսում երեխաների դպրոցական կամ համալսարանական կրթության համար, բազմաթիվ դեպքերում արդյունքները միանգամից տեսանելի չեն, բայց երկարաժամկետ հեռանկարում երկաթուղին ոչ միայն տնտեսական, այլ ռազմավարական նշանակություն ունի»,- ընդգծեց Հուշմանդը:
Ըստ նրա՝ ակնհայտ է, որ Իրանը Ռուսաստանի հետ նաեւ երկաթուղով կապվելու ցանկություն ունի, իսկ դա ներկայում հնարավոր է միայն Ադրբեջանի տարածքով: «Հայտնի է, որ այսօր Իրանը Եվրոպային կապող միակ ուղին Թուրքիայի տարածքով է անցնում: Այդ երթուղուն փոխարինող երկու ուղի կա՝ Հայաստանի եւ Վրաստանի տարածքով, եւ երկրորդ՝ Իրաքի հյուսիսով, Սիրիայով եւ Քուրդիստանով: Ես՝ որպես Հայաստանի ընկեր եւ Իրանի հայրենասեր, կոչ կանեի ավելի ինտենսիվ աշխատել Իրան-Հայաստան երկաթուղու ուղղությամբ, քանի որ դա չափազանց կարեւոր է»,- հավելեց փորձագետը: