Գյումրիում 5-րդ անգամ ռուս զինծառայողը չբերվեց դատարան. ռազմաբազան ՀՀ կառավարությունից անվտանգության երաշխիք պահանջեց

Գյումրեցի Ջուլիետա Ղուկասյանի մահվան մեջ մեղադրվող ՌԴ 102-րդ ռուսական ռազմաբազայի զինծառայող Անդրեյ Ռազգիլդեևի գործով դատական նիստն այսօր կրկին հետաձգվեց: Այս հետաձգումը թվով 5-րդն էր: Ամբաստանյալն, ինչպես նախորդ 4 նիստերին, այսօր էլ դատարանի դահլիճ չբերվեց: Նրա փոխարեն ներկայացել էր ՌԴ 102-րդ ռազմաբազայի կողմից լիազորված, ռազմաբազայի իրավաբանական բաժնի ղեկավար, փոխգնդապետ Ալեքսանդր Գլադիշչևը՝ հատուկ պահանջով եւ փաստաթղթով:  Գլադիշչեւի ներկայացրած փաստաթղթի համաձայն, ամբաստանյալի ներկայությունը դատարանում կապահովվի միայն ՌԴ պաշտպանության նախարարության հրամանի դեպքում: Դա էլ միայն այն պարագայում, եթե ՀՀ կառավարությունը ռուսական կողմից ամբաստանյալի անձնական անվտանգության գրավոր երաշխիք ներկայացնի: Այս պահանջով, ըստ ռազմաբազայի ներկայացուցչի, իրենք դիմել են Հայաստանի կառավարությանը, սակայն պատասխան դեռ չեն ստացել:

Նիստը նախագահող դատավոր Ադրինե Ղուկասյանը Ալեքսանդր Գլադիշչևից ճշտեց, թե ինչպիսի՞ երաշխիքների մասին է խոսքը: «Գործն աղմկահարույց է, ամբաստանյալի ցանկացած տեղափոխություն ՀՀ տարածքով ռիսկային է և պահանջում է անվտանգության երաշխիք: Այս հարցը քննարկվել է երկու երկրների ՊՆ  կողմից և մինչև օրս մենք սպասում ենք մեր հրամատարության գրավոր թույտվությանը»,-ասաց ռազմաբազայի ներկայացուցիչը: Դատավորի հարցին, արդյո՞ք ռազմաբազան հիմքեր ունի մտածելու, որ ամբաստանյալի տեղափոխումը ռիսկային է, փոխգնդապետն ասաց չունեն նման փաստեր: «Այս պահի դրությամբ դատարանը չունի հիմք ենթադրելու համար, որ ամբաստանյալի անվտանգությունը ապահովված չէ»,-հայտարարեց դատավորը: Մեղադրող կողմը ևս նշեց, որ դատարանը բոլոր միջոցները ձեռնարկում է դատական նիստի ներկայացուցիչների անվտանգության ապահովման համար:

Ջուլիետա Ղուկասյանի իրավահաջորդի ներկայացուցիչ, փաստաբան Արայիկ Զալյանը ամբաստանյալի չներկայանալը անհիմն համարեց եւ դատարանին միջորդեց հաջորդ դատական նիստին նրա ներկայությունն ապահովել՝ բերման ենթարկելու միջոցով: Այս միջնորդությունը, սակայն ամբաստանյալի շահերի պաշտպանը, մեղադրող կողմն ու դատարանն անազատության մեջ գտնվող անձի հանդեպ անհնարին համարեցին:

Դատական նիստը հետաձգվեց: Լրագրողների հետ զրույցում ռուս զինծառայողի շահերի պաշտպան Նարինե Ռշտունին ասաց, որ այսօր դատարանի դահլիճում ռուսական կողմի ներկայացրած փաստաթուղթն առաջին անգամ էր տեսնում: Ուստի իրավասու չէ քննարկելու ՌԴ ՊՆ դիրքորոշումը: Պաշտպանը նաեւ հայտարարեց, որ իր պաշտպանյալը՝ Ջուլիետա Ղուկասյանի մահվան մեջ մեղադրվող ՌԴ 102-րդ ռուսական ռազմաբազայի զինծառայող Անդրեյ Ռազգիլդեևն, իրեն մեղավոր չի ճանաչում: «Այո, նա իրեն մեղավոր չի ճանաչում: Փորձաքննությունները ցույց են տվել, որ նա մեղսունակ է: Կարող եմ ասել պաշտպանական կողմի դիրքորոշումը. մենք դատահոգեբանական և դատաբուժական եզրակացության դեմ առարկելու ենք: Նաեւ միջնորդություն էինք ներկայացրել խափանման միջոցը փոխելու համար, միջնորդել էինք, որ կիրառեն գրավ, սակայն մերժվել ենք: Ես ինքս գտնում եմ, որ կարելի էր գրավը կիրառել, ինքը պատշաճ կներկայանար»,-ասաց Նարինե Ռշտունին: Նշենք, որ ըստ Ռշտունու, այս պահին ամբաստանյալը գտնվում է ՌԴ 102-րդ ռազմաբազայի կալանավորված անձանց պահման  վայրում, նրա հետ հանդիպել են ինչպես ՀՀ, այնպես էլ ՌԴ Մարդու իրավունքների պաշտպանները: 

Հիշեցնենք, դատական առաջին նիստը, որը նշանակված էր 2019 թ․ սեպտեմբերի 6-ին, չէր կայացել, մեղադրող կողմի՝ Շիրակի մարզի դատախազ Կարեն Գաբրիելյանի արձակուրդում լինելու պատճառով: Դատարանը, հաշվի առնելով ՀՀ քրեական դատավարության օրենսգրքի մի շարք դրույթներ, նիստը հետաձգել և նշանակել էր 2019-ի հոկտեմբերի 25-ին: Այդ օրը, սակայն, կրկին դատական նիստ տեղի չէր ունեցել՝ կրկին մեղադրող կողմի հետ կապված բացակայության պատճառով: Հետաձգվել էր նաեւ 2019թ. նոյեմբերի 28-ին նշանակված դատական նիստը: Պատճառը Ջուլիետա Ղուկասյանի մահվան մեջ մեղադրվող ռուս զինծառայող Անդրեյ Ռազգիլդեևի վատառողջ լինելն էր եղել: Դատական 4-րդ նիստը հետաձգվել էր 2020թ. հունվարի 14-ին: Այդ օրը մինչ նիստի մեկնարկը դատարանը գրություն էր ստացել ոստիկանությունից այն մասին, որ դասակի ծանրաբեռնվածության պատճառով ամբաստանյալի ներկայությունն ապահովել հնարավոր չէ: 

Ջուլիետա Ղուկասյանը սպանվել էր 2018 թվականի դեկտեմբերի 2-ի լուսաբացին՝ աշխատանքի գնալու ժամանակ: Կինն աշխատում էր Գյումրու քաղաքապետարանի Բնակկոմունալ եւ շրջակա միջավայրի պահպանության բաժնում որպես հավաքարար, եւ վաղ լուսաբացին մաքրում էր փողոցները: Անդրեյ Ռազգիլդեևը ձերբակալվել էր դեպքից 9 օր անց՝ 2018 թվականի դեկտեմբերի 11-ին: