ԵՐԵՎԱՆ, 29 ՀՈՒՆԻՍԻ, ԱՐՄԵՆՊՐԵՍ:  ՀՀ ոստիկանության ծառայողները բերման են ենթարկել քաղաքացուն ազատությունից զրկած  4 անձանց։ Այս մասին «Արմենպրես»-ին տեղեկացրին ՀՀ ոստիկանության հասարակայնության հետ կապերի և լրատվության վարչությունից։

«Հունիսի 26-ի գիշերը ոստիկանության Կենտրոնական բաժնում նույն դեպքի վերաբերյալ, րոպեների տարբերությամբ, երկու ահազանգ ստացվեց: Քաղաքացիներից մեկը 1-02 էր զանգել, որ Մարգարյան բժշկական կենտրոնի հարակից այգում մի տղամարդու են ծեծում, մյուսը ահազանգել էր, որ նույն հիվանդանոցի մոտակայքում ծեծել են եղբորն ու նրան իրենց մոտ են պահում:

Օպերատիվ խումբն անհապաղ նշված հասցե մեկնեց: Քրեական հետախույզները ոստիկանության ՊՊԾ գնդի ծառայողների հետ բացահայտման ուղղությամբ անհետաձգելի միջոցառումներ ձեռնարկեցին: Արագ և օպերատիվ աշխատանքի արդյունքում Բուզանդի փողոցի մի շինությունից, անձին ազատությունից ապօրինի զրկելու կասկածանքով, իրավապահները չորս տղամարդու բերման ենթարկեցին, որոնցից երեքը` Երևանի, մեկը Զովունի գյուղի բնակիչներ էին: Ոստիկանության Կենտրոնական բաժին հրավիրվեց նաև տուժողը:

Ըստ քննությանն այս պահին հայտնի տվյալների` հիշյալ անձինք նույն օրը, ժամը 1-ի սահմաններում, հանդիպել են տուժողի հետ, գումարային հարցերի շուրջ վիճել, նրան տեղափոխել են Բուզանդի փողոցի նշված շինությունը, սպառնացել դանակով, կամքին հակառակ տևական ժամանակ պահել այնտեղ, հարվածներ են հասցրել ու պահանջել վճարել իրենց գումարները:

Բերման ենթարկվածներից մեկի անձնական խուզարկությամբ հայտնաբերվել է ծալովի դանակ:

Տուժողից ընդունվել է հաղորդում:

Հանգամանքները պարզվում են:

Փաստի առթիվ հարուցվել է քրեական գործ:

Նախաքննությունը շարունակվում է»,- ասվում է հաղորդագրության մեջ:

Ենթադրյալ հանցանքի մեջ կասկածվողը կամ մեղադրվողը համարվում է անմեղ, քանի դեռ նրա մեղավորությունն ապացուցված չէ ՀՀ քրեական դատավարության օրենսգրքով սահմանված կարգով` դատարանի` օրինական ուժի մեջ մտած դատավճռով: