Չարբախում մեկ տարի առաջ տեղի ունեցած սպանության գործով այսօր` մարտի 27-ին, Երեւանի ընդհանուր իրավասության դատարանի Շենգավիթի նստավայրում հրապարակվեց ամբաստանյալներից Արմեն Գասպարյանի նախաքննական ցուցմունքը: «Բդո» մականունով հայտնի Արմեն Գասպարյանը դատարանում հայտարարեց, որ հրաժարվում է ցուցմունք տալուց եւ կողմերի հարցերին պատասխանելուց: Նախագահող դատավոր Նելլի Բաղդասարյանը հրապարակեց նրա նախաքննական ցուցմունքը:
Ըստ այդմ, Արմեն Գասպարյանը նախաքննության ընթացքում հայտնել է, որ որեւէ առնչություն չունի 2016թ. նոյեմբերի 13-ին Չարբախում գտնվող «Լիա» գեղեցկության սրահի նկուղային հարկում գտնվող սենյակում կատարված սպանության հետ: Նրա խոսքով, դեպքի պահին գործով մյուս ամբաստանյալ, հայտնի քրեական հեղինակություն Ալիկ Բանդուրյանի հետ «Նորատուսցի Ալիկ» գտնվել է Դիլիջանում:
«Դեպքի մասին տեղեկացել եմ համացանցից, իսկ քրեական գործի մասին` բերման ենթարկվելուց հետո: Ճանաչում եմ Չարբախցի Գեղամին, նրա հետ պարզապես ծանոթներ ենք: Գեղամի հետ զանգի միջոցով մոտ մեկ շաբաթ առաջ ենք հանդիպել, նա կամ որդին ավտոմեքենա էին վաճառում, ցանկանում էի այն գնել»,-հայտնել է նա:
Արմեն Գասպարյանը նաեւ նշել է, որ ճանաչել է 2016թ. նոյեմբերի 13-ին Չարբախում գտնվող «Լիա» գեղեցկության սրահի նկուղային հարկում գտնվող սենյակում սպանված Մուշեղ Մուշեղյանին. վերջինը շուրջ 5 տարի իր մոտ աշխատել է որպես վարորդ: Սակայն, վերջին երկու տարվա ընթացքում նրա հետ որեւէ առնչություն չի ունեցել:
Արմեն Գասպարյանը պնդել է, որ մեղավոր չի ճանաչում իրեն առաջադրված մեղադրանքում, այն լիովին անհիմն է եւ անհեթեթ:
Նշենք, որ 2016թ. նոյեմբերի 13-ին տեղի ունեցած հրաձգության հետեւանքով մահացել են 25-ամյա Գեւորգ Ավետիսյանը եւ 30-ամյա Մուշեղ Մուշեղյանը: Պետրոս Իսրայելյանին («Չարբախցի Գեղամ»)՝ մեղադրանք է առաջադրվել Քրեական օրենսգրքի 104-րդ հոդվածի 2-րդ մասի 7-րդ կետով, Ալիկ Բանդուրյանին («Նորատուսցի Ալիկ»)՝ Քրեական օրենսգրքի 38-112-րդ հոդվածի 2-րդ մասի 6-րդ կետով, Արմեն Գասպարյանին («Բդո»)՝ Քրեական օրենսգրքի 335-րդ հոդվածի 1-ին մասով:
- «Նորատուսցի Ալիկը» դատարան է տեղափոխվել անվասայլակով. պաշտպանը միջնորդեց փոխել խափանման միջոցը
- Ապօրինի ազդեցություն է ունեցել Պետրոս Իսրայելյանի վրա. դատախազի ուշագրավ հայտարարությունը «Նորատուսցի Ալիկի» մասին