Թեդ Դրամոնդն ընդամենը մեկ ու կես տարեկան էր, երբ բժիշկները հայտնեցին նրա ծնողներին, որ հույս չկա. տղան մահանալու է տասը րոպեների ընթացքում։ Նրանք ծնողներին առաջարկեցին հրաժեշտ տալ երեխային, սակայն փոքրիկ հերոսը արհամարհեց բժիշկների բոլոր կանխատեսումները և ապրեց,–պատմում է Daily Mail-ը։
Ընտանեկան հանգստի ժամանակ մեկ ու կես տարեկան Թեդը աղիքային վարակ էր վերցրել։ Դժվար թե դա լուրջ խնդիր դառնար, եթե չլիներ մի կարևոր հանգամանք. տղան լեյկոզով էր տառապում և փաստորեն զրկված էր իմունիտետից։
Բժիշկները պայքարում էին փոքրիկի առողջության համար, սակայն տղայի վիճակը գնալով վատանում էր։
Բժիշկը մեզ ասաց. «Դուք ստիպված եք հեռանալ, մենք պատրաստվում ենք երեխային դեղորայքային կոմայի մեջ գցել։ Համբուրեք տղային, նրա տասը րոպե է մնում ապրելու»,– պատմում է տղայի հայրը։
Այնուամենայնիվ տղան վերապրեց սարսափելի գիշերը և հաջորդ օրը սկսեց դեպի ապաքինում գնալ։ Նա հիվանդանոցում ևս երկու տարի մնաց։ Այդ ընթացքում փոքրիկը մի քանի կուրս ինտենսիվ քիմիաթերապիա անցավ և գրեթե 600 օր մնաց մեկուսացված վիճակում։ Բայց կարևորն այն է, որ նա կարողացավ հաղթել հիվանդությանը։
Հիմա Թեդը տասը տարեկան է և արդեն վաղուց է մոռացել իր ծանր հիվանդության մասին։