Վարչապետ Նիկոլ Փաշինյանի հրաժարականը պահանջող ԱԱԾ նախկին ղեկավար Արթուր Վանեցյանը լրագրողների հետ զրույցում հայտնել է, որ առաջիկայում իշխանափոխության օրակարգի շուրջ հնարավոր են հանդիպումներ տարբեր ուժերի, այդ թվում և՝ ՀՀ նախկին երեք նախագահների հետ։ Առավելապես քննարկվեց Վանեցյանի և Ռոբերտ Քոչարյանի հետ քաղաքական համագործակցության ցանկությունը՝ նկատի առնելով նրա մասին Արթուր Վանեցյանի նախորդ հայտարարությունները, որոնցում նրան համարում է կոռուպցիոներ: Որքանով է հնարավոր Սերժ Սարգսյանի և Լևոն Տեր-Պետրոսյանի հետ համագործակցությունը: Թեմայի շուրջ «Առաջին լրատվական»-ի հետ զրույցում այս և մի շարք այլ հարցերի անդրադարձան «Ժողովրդավարական համախմբում» նախաձեռնության համահիմնադիր Սուրեն Պետրոսյանը և վերլուծաբան Արեգ Քոչինյանը:
«Այն, որ Տեր-Պետրոսյանը կսպասի Վանեցյանի հետ հանդիպմանը և նրա հետ համագործակցությանը, ավելի շատ կոմիզմի ժանրից է,- նշեց Արեգ Քոչինյանը: -Թերևս ուշագրավ էր Վանեցյանի մտորումները համագործակցության մասին, նա ասաց, որ քաղաքականության մեջ ամեն ինչ հնարավոր է, և որ նախկին թշնամիներն այսօր կարող են դաշնակիցներ դառնալ: Վանեցյանի հայտարարությունը պետք է դիտարկել որպես շղարշ, նա առավելապես նկատի ունի համագործակցություն հենց Քոչարյանի հետ՝ նկատի ունենալով իր ստեղծած կուսակցության, ԲՀԿ-ի և Դաշնակցության հետ եռյակ դաշինք կազմելը, իսկ Քոչարյանը Վանեցյանի հետ կաշխատի միջնորդավորված՝ ՀՅԴ-ի միջոցով»:
Սուրեն Պետրոսյանի կարծիքով՝ նախագահները, լինելով ինստիտուցիոնալ մարդիկ, անկախ նրանից, լավ են կառավարել, թե ոչ, չեն արժեզրկի նախագահի ինստիտուտը՝ առնվազն ֆորմալ առումով. «Ֆորմալ համագործակցություն տեղի չի ունենա, հնարավոր է կուլիսային գործընթացներ լինեն»:
«Եթե Վանեցյանին դիտարկենք որպես ռացիոնալ խաղացող, ապա նա իշխանության համար վտանգ չի ներկայացնում, քանի որ չունի լեգիտիմության պաշար, սակայն իռացիոնալ դաշտում նա կարող է վտանգ ներկայացնել, քանի որ տիրապետում է պետական գաղտնիքների»,- նշեց Արեգ Քոչինյանը՝ հավելելով, որ իրավապահ մարմիններն անելիք կունենան, երբ որ նա նախկին ԱԱԾ պարտավորություններից դուրս գործողությունների կանցնի, քանի որ դա արդեն կդիտվի ոչ թե որպես քաղաքական պայքար, այլ գործողություններ պետության դեմ:
Սուրեն Պետրոսյանը կարծիք հայտնեց, որ իշխանության համար ամենամեծ վտանգը հենց իշխանական թիմն է:
Մանրամասն՝ տեսանյութում: