Կառավարության գործունեության առաջիկա հինգ տարիների ծրագրի շրջանակներում ամեն ինչ արվելու է, որ ներդրումները հասնեն 23- 24%-ի ՀՆԱ-ի նկատմամբ: Այդ մասին այսօր՝ հունվարի 17-ին, լրագրողների հետ զրույցում ասաց տնտեսական զարգացման եւ ներդրումների նախարարի պաշտոնակատար Տիգրան Խաչատրյանը՝ պատասխանելով հարցին՝ որքան ներդրումներ են սպասվում 2019թ.-ին:
Ըստ Խաչատրյանի՝ գոյություն ունեցող տնտեսվարող սուբյեկտները շարունակաբար վերազինում են իրենց արտադրությունը , եւ դա այն շարժիչն է, որ պետք է ապահովի երկրաժամկետ կայուն զարգացումը եւ մրցունակությունը տվյալ կազմակերպության շուկայում: «Ցանկացած տնտեսական միավոր, անկախ ոլորտից, շարունակաբար իրականացնում է այդպիսի ներդրումներ: Երբ մենք խոսում ենք ներդրումների մասին՝ հատկապես կարեւորում ենք նոր ներդրումային ծրագրերի իրականացում. Դրանք բազմաթիվ են եւ վերաբերում են տարբեր ոլորտների ՝ եւ արդյունաբերության, եւ էներգետիկայի: Բայց պետք է գիտենանք նաեւ, որ ցանկացած քննարկում՝ քննարկման փուլից մինչեւ իրականացում ճանապարհ է անցնում, եւ դա էլ նոր երեւյութ չէ: Ցանկացած նոր նախաձեռնություն ժամանակ է պահանջում, որպեսզի իրականացման հասնի»,- ասաց նա: