«Գնացքը գնում է, ժամանակ չունենք». Հաց բերողը շտապում էր (տեսանյութ)
Հաց բերողի՝ Արթուր Սարգսյանի մահից հետո նրա նկարը հատուկ տեղ է զբաղեցնում Հիմնադիր խորհրդարանի անդամ Սյուզան Սիմոնյանի տանը: «Այս նկարը ես նկարել եմ, երբ նա հացադուլից հետո հիվանդանոցում էր, չէր ուզում, որ նկարեի»,- «Ա1+»-ին ասաց Սյուզան Սիմոնյանը: Նա իր տան իրերից առանձնացնում է այս բազկաթոռը՝ նրա վրա եւս Արթուր Սարգսյանն է նստել. «Այս անկյունը ինձ համար սրբության սրբոց է»: Այսօր հաց բերող Արթուր Սարգսյանի ծննդյան օրն է, նա կդառնար 49 տարեկան: Նա հանրությանը հայտնի դարձավ հուլիսի 26-ի առավոտյան, երբ իր անձնական մեքենայով ճեղքեց Էրեբունու ոստիկանական գումարտակի ոստիկանական պատնեշը և սնունդ հասցրեց 10 օր այնտեղ գտնվող «Սասնա Ծռերին»: «Արթուրը կատարեց հենց այն արժեքների հեղափոխությունը, որի մասին մենք քանի տարի է խոսում ենք եւ ձգտում ենք դրան: Արժեքային համակարգում շատ մեծ բան փոխվեց: Նրա անձնազոհությունը մերձավորի նկատմամբ սթափեցրեց, ցնցեց բոլորին: Միայն նա չէր, որ հաց տարավ տղաներին, նա հացը տարավ եւ դարձավ Սասնա ծուռ, նա ծռից էլ ծուռ էր»,- ասում է Սյուզան Սիմոնյանը: Հուլիսի 31-ին Արթուր Սարգսյանը «Սասնա ծռեր»-ի հետ հանձնվեց, կալանավորվեց։ Առողջական խնդիրներով պայմանավորված՝ դեկտեմբերի 30-ին նրա խափանման միջոցը փոխվեց: Երկրորդ անգամ նա կալանավորվեց փետրվարի 9-ին ՝քննչական մարմին չներակայանալու համար: Նա անժամկետ հացադուլ հայտարարեց, ինչն ավելի խորացրեց նրա առանց այդ էլ ծանր առողջական վիճակը: Մարտի 6-ին Գլխավոր դատախազի որոշմամբ փոխվեց Արթուր Սարգսյանի խափանման միջոցը, որից 10 օր հետո հիվանդանոցում մահացավ: «Արթուր Սարգսյանը չէր վախենում մահից», -ասում է Սյուզան Սիմոնյանը՝ նշելով, թե նույնիսկ չէր լսում հորդորները՝ հետեւելու իր առողջական վիճակին. «Նա ձեռքը թափ էր տալիս եւ ասում, դու չես հասկանում, գնացքը գնում է եւ մենք ժամանակ չունենք, նա շտապում էր, անընդհատ շտապում էր»: Արթուր Սարգսյանը չկարողացավ նաեւ ավարտին հասցել իր ցանկությունը՝ ՊՊԾ գնդում գտնվելու ժամանակ տեղի ունեցած իրադարձությունների եւ դեպքերի վերաբերյալ գիրք գրել: Սյուզան Սիմոնյանը հստակ գիտի ո՞վ է մեղավոր Հաց բերողի մահվան մեջ. « Սերժ Սարգսյանը երբեք չի ներում այն մարդկանց, որոնք իրենց ողջ հզորությամբ կանգնում են իր առջեւ եւ կոտրում են այն փշալարերը եւ այն կեղծ ամրոցը, որը նա փորձում է կառուցել՝ մեր հանրության աչքերին թոզ փչելով: Նա չի ներում այդ մարդկանց: Այդպիսի մարդ է նաեւ Ժիրայր Սեֆիլյանը եւ շատ-շատերը»: Առաջարկ է ներկայացվել Արթուր Սարգսյանի ծննդյան օրը նշել որպես Հաց բերողի օր եւ օգոստոսի 9-ին սնունդ նվիրել դրա կարիքը ունեցողներին
