ԱԱԾ նախկին պետ Գեորգի Կուտոյանի մահվան պատճառները մի քանի օր է՝ ակտիվորեն քննարկվում են քաղաքական փորձագիտական շրջանակներում․ ոչ բոլորին է վստահություն ներշնչում պաշտոնական վարկածը, համաձայն որի՝ Կուտոյանն ինքնասպանություն է գործել։ Քաղաքական գործիչները հիշեցնում են վերջին ամիսներին տեղի ունեցած նախկին բարձրաստիճան այլ պաշտոնյաների՝ Հայկ Հարությունյանի, Աշոտ Կարապետյանի մահվան առեղծվածային հանգամանքները և նշում, որ ֆիզիկապես ոչնչացվում են այն նախկին պաշտոնյաները, որոնք կարևոր տեղեկության էին տիրապետում։ Կուտոյանի պարագայում հատկապես անհավանական է թվում պաշտոնական տեղեկության այն հատվածը, թե վերջինս երեք տասնյակից ավելի կրակոցներ է արձակել տանը, և հարևաններից ոչ ոք դա չի լսել։
«Սասնա ծռեր» համահայկական կուսակցությունը ևս անդրադարձել է ԱԱԾ նախկին ղեկավարի մահվան հանգամանքներին՝ նշելով, որ մաֆիան սկսել է ֆիզիկապես ոչնչացնել կարևոր տեղեկություն տիրապետող անձանց. «Գեորգի Կուտոյանի սպանությունը իշխանության նահանջի վերջին բնագիծն է։ Եթե մաֆիան դա ևս մարսի, ապա կանցնի բաց և լայնածավալ հարձակման»,- մեջբերում ենք հայտարարությունից մի հատված։
Քաղաքագետ Արկադի Վարդանյանը համաձայն է այս դիտարկման հետ։ Նա «Առաջին լրատվական»-ի հետ զրույցում նշեց. «Հայկ Հարությունյանն ու Գեորգի Կուտոյանը լայնածավալ ինֆորմացիայի տիրապետող մարդիկ են։ Սա նման է հանցագործների ձեռագրին՝ կատարել են հանցագործներ ու հիմա հետքերը վերացնում են։ Դա սովորական դետեկտիվ սյուժե է, և առանձնահատուկ խելք ունենալ պետք չէ, որպեսզի նման եզրահանգում արվի։ Որոշ վերլուծաբաններ կարծում են, որ հաջորդը կարող է լինել Գևորգ Կոստանյանը, ըստ իս՝ դա իրականությունից հեռու չէ»։
Ըստ մեր զրուցակցի՝ նույն աղբյուրի ձեռագիրն է։ «Համենայնդեպս, ես դրական հեռանկարների որևէ հնարավորություն չեմ տեսնում այս պահին ու շատ մտահոգ եմ։ Սա պետք է անհանգստացնի իշխանություններին, մեռանք ասելով՝ ոչ մի արձագանք։ Որևէ գործողություն տեղի չի ունենում, քայլեր չեն ձեռնարկվում»,-եզրափակեց նա։
ԳԽ պատգամավոր Ազատ Արշակյանի կարծիքով՝ ոչնչացվում են ոչ միայն հատուկ ինֆորմացիա ունեցող, հատուկ ծառայություններ կատարող գործիչներ, այլ պատահական անցորդներ։ «Ինչ-որ իմաստով, Հայաստանում քաղաքացի լինելը, հայ լինելը վտանգավոր է։ Բաքվում հայերին սպանել են միայն հայ լինելու համար։ Այդ օրինաչափությունը պետք է առանձնացնել։ Այո՛, Հայաստանում կան մարդիկ, որոնք հատուկ ծառայություններ են կատարել նաև գիտության, մշակույթի մեջ, նրանք ռիսկային են, հայ մարդն ընդհանրապես ռիսկային է։ Երկրորդը՝ կան ռիսկային ծառայություններ՝ պաշտոններ. ռեսուրսների տիրապետելը մարդուն դարձնում է թիրախ։ Այդպիսով, թիրախավորվածների նկատմամբ հասարակությունն ունի հատուկ ուշադրություն, որովհետև նրանք ոչ միայն իրենց անձնական կյանքով են ապրում, այլ ազդում են մեր կյանքի, հասարակության վրա։ Ես ասացի, որ պատահական փամփուշտից էլ են զոհվում, բայց երբ ուրիշների կյանքի վրա ազդեցություն ունեցող մարդն է զոհվում՝ դա հասարակության համար կարևոր ու ցավոտ է»,- «Առաջին լրատվական»-ի հետ զրույցում ասաց նա։
Արշակյանը հիշեցնում է այլ քաղաքական գործիչների անժամկետ մահվան հանգամանքները. «Վերցնենք բոլոր քաղաքական գործիչների անժամկետ, ցավալի մահը՝ անկախ նրանից՝ դա սպանություն է, ինքնասպանություն, թե կաթված։ Հասարակությունը պետք է հատուկ հոգատարություն ունենա այդ մարդկանց նկատմամբ։ Արդյոք Հայաստանում այդպե՞ս է, նրանք պաշտպանված ու ապահովվա՞ծ են՝ կարծում եմ, ո՛չ։ Նրանք չունեն հոգեբանական, անվտանգության անհրաժեշտ միջավայրը, չունեն նաև ֆիզիկական անվտանգության անհրաժեշտ միջավայրը։ Ժամանակն է, որ մեր իշխանությունները դրանով զբաղվեն՝ ապահովեն նախկինների հոգեբանական, նյութական, ֆիզիկական անվտանգությունը։ Այս մահերի մի զգալի մասը դրա բացակայության պատճառով է։ Դրանք բարձր որակավորում ունեցող պաշտոնյաներ են՝ Վազգեն Սարգսյան, Կարեն Դեմիրճյան, Ղանդիլյան, Գեորգի Կուտոյան։ Մենք պարտավոր ենք ապահովել նրանց անվտանգությունը, նրանք պետք է շարունակեն ծառայել հասարակությանն ու հայրենիքին։ Հիմա Կուտոյանը զոհվեց՝ դեռ իր ծառայությունը չավարտած։ Դա ցավալի կորուստ է, ովքեր դրդեցին նրան ինքնասպանության՝ եթե դա ինքնասպանություն էր, իսկ եթե սպանություն, ապա ով դա արեց»։
