Ռուսական կողմը պատրաստ է աջակցել ՀՀ-ում ռուսաց լեզվի դասավանդման մեթոդաբանության մշակման հարցում: Այս մասին, այսօր՝ մարտի 27-ին, Մոսկվայում Հայաստանի ԿԳ նախարար Լեւոն Մկրտչյանի հետ հանդիպման ժամանակ նշել է ՌԴ ԿԳ նախարար Օլգա Վասիլեւան:
ԿԳՆ-ից NEWS.am-ին հայտնում են, որ ՌԴ ԿԳ նախարարի հրավերով ՀՀ կրթության եւ գիտության նախարար Լեւոն Մկրտչյանի գլխավորած պատվիրակությունը գտնվում է Մոսկվայում: Պատասխան այցի շրջանակում Լեւոն Մկրտչյանը հանդիպել է ՌԴ ԿԳ նախարար Օլգա Վասիլեւայի հետ: Ողջունելով միմյանց՝ երկու երկրների կրթության ոլորտի պատասխանատուները կարեւորել են կրթության եւ գիտության ոլորտում առկա հայ-ռուսական համագործակցությունը եւ պատրաստակամություն հայտնել ավանդական կապերի ամրապնդման եւ հետագա զարգացման ուղղությամբ: Լեւոն Մկրտչյանն ու Օլգա Վասիլեւան հանդիպման ընթացքում անդրադարձել են ՌԴ նախարարի Երեւան կատարած այցի ընթացքում ձեռքբերված երկկողմ պայմանավորվածություններին:
ՀՀ ԿԳ նախարարը նշել է, որ ելնելով Հայաստանի կրթության ոլորտի առաջնահերթություններից՝ կարեւորվում է օտար լեզուների ուսուցման արդյունավետության բարձրացումը: Այս համատեքստում ռուսական կողմը պատրաստակամություն է հայտնել աջակցել ռուսաց լեզվի դասավանդման մեթոդաբանության մշակման հարցում: Ռուսական կողմն ընդգծել է նաեւ, որ հետաքրքրված է Հայաստանի դպրոցներում «Շախմատ» առարկայի դասավանդման արդյունավետ փորձով:
ՀՀ ԿԳ նախարար Լեւոն Մկրտչյանն իր հերթին հետաքրքրություն է դրսեւորել թերհամալրված դպրոցներում կրթության կազմակերպման ռուսական փորձի նկատմամբ, ընդգծելով, որ Հայաստանում փոքր համակազմ ունեցող դպրոցների զարգացումը ոլորտի առաջնահերթ խնդիրներից է:
Անդրադառնալով բարձրագույն կրթության ոլորտի բարեփոխումներին՝ Լեւոն Մկրտչյանը նշել է, որ Հայաստանում այժմ քննարկվում է Բարձրագույն կրթության մասին օրինագիծը, որի ընդունումից հետո զարգացման եւ համագործակցության նոր հեռանկարներ են բացվում համալսարանական գիտության համար: Այս համատեքստում ՀՀ ԿԳ նախարարը կարեւորել է գիտական համատեղ կլաստերների ստեղծման հնարավորությունը, որը մեխանիզմներ կստեղծի գիտական ինստիտուտներում կրեդիտների կուտակման, ուսանողների եւ հետազոտողների շարժունության համար:
Հանդիպման ավարտին պայմանավորվածություն է ձեռք բերվել կրթության եւ գիտության ոլորտում ընդլայնել համագործակցությունը՝ նոր ծրագրերի իրականացմամբ, փորձի եւ տեղեկատվության փոխանակմամբ:
