Հայաստանում չի կարող լինել որևէ մեկը, ով կարող է մեզ մեղադրել Ամուլսարի կամ որևէ հարցում մինչև վերջ հետամուտ չլինելու մեջ. Նիկոլ Փաշինյան
«Ցանկացած դեպքում պետք է առաջնորդվենք ճշմարտությամբ, առանց կանխավարկածի, թե ինչպիսին պետք է լինի այն: Հայաստանում չի կարող լինել որևէ մեկը, ով կարող է մեզ մեղադրել Ամուլսարի կամ որևէ հարցում մինչև վերջ հետամուտ չլինելու մեջ: Ինձ համար Հայաստանի պետական, ազգային շահը եղել է ու մնալու է առաջնահերթություն: Ես համարում եմ, որ ՀՀ վարչապետի կարգավիճակից բխող միակ դիրքորոշումը, որը կարող է լինել արդարացված և լեգիտիմ, հենց սա է: Եթե մենք ապօրինի ձևով փակենք հանքը, վաղն ապօրինի ձևով կփակենք լրատվամիջոցը, մյուս օրը` արտադրամասը, և այդպես շարունակ: Էլ չեմ ասում, որ փակելուց հետո կվերցնենք մեզ: Իհարկե մենք չենք պատրաստվում այդ ճանապարհով գնալ»,-Ազգային ժողովում հայտարարել է ՀՀ վարչապետ Նիկոլ Փաշինյանը՝ անդրադառնալով Ամուլսարի շահագործման մասին հարցին:
Փաշինյանի խոսքով՝ Ամուլսարի ու բոլոր հարցերում դիրքորոշումը պետք է լինի իրավական, որովհետև խոսքը իրավական պետության մասին է:
«Եթե որոշ դեպքերում հարցին կա էմոցիոնալ մոտեցում, բնապահպանական մոտեցում, տնտեսական մոտեցում, ես կարծում եմ, որ այդ բոլոր մոտեցումների հանգուցալուծումը պետք է լինի իրավական մոտեցումը»,-ասել է Փաշինյանը:
