Հնարավոր է՝ G20-ի գագաթնաժողովում հնչեն «Ղարաբաղ» կամ «Հարավային Կովկաս» արտահայտությունները, բայց քիչ հավանական է, որ բանը հասնի ղարաբաղյան հակամարտության կարգավորման շուրջ լուրջ քննարկումների։ Այս մասին հուլիսի 7-ին լրագրողների հետ հանդիպման ժամանակ ասաց Կովկասի ինստիտուտի տնօրեն, քաղաքագետ Ալեքսանդր Իսկանդարյանը։ Նրա խոսքով՝ գագաթնաժողովում կքննարկվեն Աֆրիկայի խնդիրները։
«Տվյալ պահին դա ամբողջ մարդկության գերխնդիրն է։ Գագաթնաժողովում կլուծվի Եվրոպայում գտնվող ներգաղթյալների հարցը։ Կքննարկեն, թե ի՞նչ պետք է անել, որպեսզի մարդիկ այլեւս Եվրոպա չներգաղթնեն եւ ի՞նչ անել նրանց հետ, որոնք արդեն այնտեղ են»,-հստակեցրեց Իսկանդարյանը։
Կովկասի ինստիտուտի տնօրենը հավելեց, որ Աֆրիկայի խնդրի հետ մեկտեղ կքննարկվի նաեւ Սիրիայի խնդիրը, կխոսվի Ռուսաստանի եւ Արեւմուտքի հարաբերությունների մասին։ Փորձագետը նշեց, որ վերջին երկու հարցերի քննարկման համար կկազմակերպվի ՌԴ եւ ԱՄՆ նախագահներ Վլադիմիր Պուտինի եւ Դոնալդ Թրամփի հանդիպումը։ Պուտինը նաեւ կհանդիպի իր թուրք գործընկեր Ռեջեփ Թայիփ Էրդողանի հետ։
«Անկեղծ ասած, ես չեմ կարծում, թե Պուտինի եւ Թրամփի հանդիպման ժամանակ որեւէ լուրջ պայմանավորվածություններ ձեռք կբերվեն, որոնք կփոխեն Ռուսաստանի եւ Արեւմուտքի հարաբերությունները»,- ընդգծեց Իսկանդարյանը։