ԵՐԵՎԱՆ, 31 ՄԱՐՏԻ, ԱՐՄԵՆՊՐԵՍ։ ՀՀ կառավարությունը կորոնավիրուսով վարակված անձանց կոնտակտավորներին հնարավորինս շուտ գտնելու նպատակով նրանց հեռախոսազանգերը ֆիքսելու օրենքի նախագիծը դարձյալ ներկայացրել է Ազգային ժողով։ «Արմենպրես»–ի փոխանցմամբ` այս մասին մարտի 31–ին գումարված ԱԺ արտահերթ նիստում հայտնեց ՀՀ արդարադատության նախարար Ռուստամ Բադասյանը։

Բադասյանը նախագիծը ներկայացնելիս անդրադառնալով նրան, թե ինչ տեղեկություններ են հավաքվելու, նշել էր՝ մասնավորապես հանրային էլեկտրոնային հաղորդակցության ծառայություններ ստացող հաճախորդների կողմից օգտագործված ծառայության վայրը պարզելու համար անհրաժեշտ տվյալներ կամ, այլ կերպ ասած, հաճախորդի տեղորոշումը, հաճախորդի հեռախոսահամարի հետ ուղիղ կամ անուղղակի (միջնորդավորված) կապ ունեցած հեռախոսահամարները: Առաջինից երկրորդ ընթերցման ընթացքում բացառվել է հեռախոսային խոսակցությունների ավարտի մասին տվյալներ ստանալու հնարավորությունը, հստակեցվել է առողջապահության ոլորտի պետական կառավարման մարմիններից տվյալներ պահանջելու և ստանալու հնարավորությունն ու կարգը, բացառվել է ապանձնավորված տվյալները պահպանելու հնարավորությունը, և սահմանվել է, որ բոլոր տվյալները պետք է ոչնչացված լինեն ոչ ուշ, քան արտակարգ դրության ավարտից մեկ ամիս հետո:

Առաջարկվող սահմանափակումները վերաբերում են բացառապես համաճարակի հիմքով հայտարարված արտակարգ դրությանը, այդ դրության ավարտից հետո որևէ սահմանափակում չի գործելու: Որևէ նոր տվյալ քաղաքացիների մասին չի հավաքվելու և չի մշակվելու, օպերատորների մոտ արդեն առկա տվյալները համատեղվելու են մեկ միասնական բազայում համաճարակի դեմ պայքարելու համար, այսինքն` նոր տվյալների հավաքագրման մասին խոսք չի գնում: Բոլոր մեկտեղված տվյալները ենթակա են լինելու ոչնչացման արտակարգ դրության ավարտից հետո՝ ոչ միայն անձնավորված, այլ նաև ապանձնավորված տվյալները:

Փաթեթը որևէ կերպ չի ենթադրում հեռախոսային խոսակցության բովանդակության բացահայտում, ֆիքսվելու է միայն զանգի կատարման և տեղակայման փաստը:

Մարտի 31–ին, ժամը 11:00–ին կայացած ԱԺ արտահերթ նիստում «Արտակարգ դրության իրավական ռեժիմի մասին» օրենքում լրացումներ կատարելու մասին և «Էլեկտրոնային հաղորդակցության մասին» օրենքում լրացում կատարելու մասին օրենքների նախագծերի փաթեթը երկրորդ ընթերցմամբ չընդունվեց՝ ստանալով 65 կողմ ձայն: Անհրաժեշտ էր 67 կողմ ձայն։ Իշխող խմբակցության պատգամավորները գրանցվել էին, սակայն քվեարկության պահին դուրս էին եկել դահլիճից։ Կողմ քվեարկողներից մեկն էլ անկախ պատգամավոր Արման Բաբաջանյանն էր։ ԼՀԿ ղեկավար Էդմոն Մարուքյանը հայտնեց, որ իրենց խմբակցությունը շարունակում է դեմ մնալ նախագծին, նա նկատեց՝ դահլիճում իշխանական 65 պատգամավոր կա, որոնց ձայները միայն բավարար չեն նախագիծն ընդունելու համար, նա առաջարկեց ԲՀԿ-ի գործընկերներին ևս չմասնակցել քվեարկությանը, որ նախագիծը չընդունվի: Ազգային ժողովի մարտի 31–ին, ժամը 17:30–ին մեկնարկած արտահերթ նիստին «Լուսավոր Հայաստան» խմբակցությունը չի մասնակցում` նիստ հրավիրելու մասին իրենց ուշ տեղեկացնելու պատճառաբանությամբ։ Հայաստանում կորոնավիրուսի հաստատված դեպքերի թիվը 532 է: Արձանագրվել է մահվան 3 դեպք։

ՀՀ կառավարությունը Հայաստանում արտակարգ դրություն է հայտարարել: Արտակարգ դրությունը գործում է Հայաստանի Հանրապետության ամբողջ տարածքում 2020 թվականի մարտի 16-ից, ժամը 18:30-ից սկսած մինչև 2020 թվականի ապրիլի 14-ը, ժամը 17:00-ն: Մարտի 24-ի ժամը 23:59-ից մինչև մարտի 31-ը, ժամը 23:59-ն ՀՀ ամբողջ տարածքում սահմանափակվել է մարդկանց ազատ տեղաշարժվելու իրավունքը, որը երկարաձգվել է ևս տասը օրով։