Հայտնաբերվել է ապօրինի ջրօգտագործման դեպք և հարուցվել վարչական վարույթ
ԵՐԵՎԱՆ, 30 ՀՈՒՆԻՍԻ, ԱՐՄԵՆՊՐԵՍ: ՀՀ բնապահպանության և ընդերքի տեսչական մարմնի Արարատի տարածքային բաժնի աշխատակիցները հունիսի 26-ին հայտնաբերել են ապօրինի ջրօգտագործման դեպք:
«Արմենպրես»-ի հաղորդմամբ՝ այս մասին գրառում է զետեղված Բնապահպանության և ընդերքի տեսչական մարմնի «Ֆեյսբուք»-ի պաշտոնական էջում:
Հաղորդագրությունում նշվում է, որ ՀՀ Արարատի մարզի Գոռավան համայնքի բնակիչ Ա. Պետրոսյանը ձկնաբուծական նպատակով նույն մարզի Եղեգնավան համայնքի վարչական տարածքի «Խոսրովի անտառ պետական արգելոց» ՊՈԱԿ-ի հարակից Խաչաձորի հատվածում Վեդի գետից իրականացրել է ջրառ՝ առանց համապատասխան ջրօգտագործման թույլտվության։
Խախտվել են ՀՀ ջրային օրենսգրքի 21-րդ հոդվածի պահանջները (ցանկացած տեսակի ջրօգտագործման համար յուրաքանչյուր ոք պարտավոր է ստանալ ջրօգտագործման թույլտվություն)։ Հարուցվել է վարչական վարույթ։
Բաժանորդագրվեք մեր ալիքին Telegram-ում