Օրերս ԲՀԿ խմբակցության հավաք էր անցկացնում կուսակցության առաջնորդ Գագիկ Ծառուկյանը, որի ընթացքում քննարկում էր կորոնավիրուսի և տնտեսական ճգնաժամի պայմաններում քաղաքացիներին ցուցաբերվող սոցիալական աջակցության հարցերը: Հետո ԲՀԿ նախագահը հիանում և հիացնում էր իր ալբինոս առյուծի նորածին ձագերով: Իսկ դրանով հանդերձ, ԲՀԿ նախագահ Ծառուկյանը և թիմը գրեթե ցուցադրաբար հրաժարվում են «Մուլտի Գրուպ» կոնցեռնի գործադիր տնօրեն Սեդրակ Առուստամյանի կալանավորմանն ու քրգործին անդրադառնալուց, Հայաստանում ձևավորված «ավանդույթի» ուժով այն քաղաքական հետապնդում որակելուց: Դա նշանակում է, որ Գագիկ Ծառուկյանն ինչ-որ պատճառով հանձնո՞ւմ է իր համակարգի առանցքային կարգավիճակ ունեցող ֆիգուրներից մեկին՝ որևէ բանի դիմաց, թե՞ ԲՀԿ նախագահի և թիմի վարքագիծը ունի շատ ավելի պրագմատիկ հաշվարկ, որը թելադրված է առկա իրողություններով:
Բանն այն է, որ Սեդրակ Առուստամյանի քրգործի առիթով քաղաքական երանգավորում ունեցող անդրադարձի պարագայում ԲՀԿ-ն ու նրա ղեկավարը փաստորեն ասոցացվելու են նախկին իշխող համակարգի հետ: Նախ՝ այդ համակարգի թևերն են քաղաքական հետապնդում որակում որևէ քրգործ, որ հարուցված է կոռուպցիոն կամ համանման այլ թեմայով, և, բացի դրանից՝ ներկայիս բուռն դիմակայության փուլում, որ առկա է Նիկոլ Փաշինյան-Արթուր Վանեցյան-Միքայել Մինասյան-Խաչատրյաններ բազմավեկտոր շրջանակում, կառավարության հասցեին որևէ քաղաքական սուր գնահատականի պարագայում Գագիկ Ծառուկյանն ասոցացվելու է հենց դիմակայության այն կողմերի հետ, որոնք ներկայացնում են նախկին իշխող համակարգը: Հետևաբար, նա փաստորեն, կամա թե ակամա, իր վրա վերցնելու է հանրության այն գնահատականները, որ տրվում են համակարգին: Մինչդեռ ԲՀԿ-ն և Ծառուկյանը ոչ միայն հիմա, այլ հետհեղափոխական ամբողջ ընթացքում ունեն հակառակ խնդիր՝ հանրության հայացքում սկզբունքորեն տարանջատվեն նախկին կառավարող համակարգից, դուրս գան այդ համակարգի հետ ասոցացման տիրույթից վերջնականապես: Իսկ այդ խնդիրը ԲՀԿ համար շատ բարդ խնդիր է՝ նկատի ունենալով կուսակցության ծագումն ու պատմությունը:
Այդ իսկ պատճառով Գագիկ Ծառուկյանն ու թիմը ներկայումս նախընտրում են քաղաքական համատեքստ չտալ Սեդրակ Առուստամյանի գործին, որն, ի դեպ, կապվում է փաստորեն Խաչատրյանների ընտանիքին առնչվող գործի հետ: Ներկայումս պետք է միասնականություն, համախմբում, իսկ հարցերի պատասխանների ժամանակը կգա հետո, իր խմբակցության անդամներին հայտնում էր Գագիկ Ծառուկյանը: Ով է հետո պատասխան տալու Ծառուկյանին, առայժմ այդքան էլ պարզ չէ: Բանն այն է, որ, թեև ներկայումս նախկին իշխող համակարգից ուժգին թիրախավորվում է Նիկոլ Փաշինյանը, այդուհանդերձ անուղղակի, բայց հարվածի տակ է նաև ԲՀԿ նախագահն ու նրա քաղաքական ուժը: Բանն այն է, որ նախկին համակարգ-Փաշինյան դիմակայությամբ ընթանում է պայքար, այսպես ասած, ընդդիմադիր առաջնորդության համար: Գագիկ Ծառուկյանին մի կողմից շահեկան է Փաշինյանին ուղղված հարվածը, մյուս կողմից, սակայն, Ծառուկյանը զրկված է ընդդիմադիր դիրքի ակտիվ պաշտպանության հնարավորությունից:
Միայն սոցիալական օգնություն բաժանելով հնարավոր չէ պահպանել քաղաքական առաջատար դերը: Սակայն սուր քննադատությունն էլ իր հերթին Ծառուկյանին ասոցացնում է նախկին համակարգի, օրինակ՝ Ռոբերտ Քոչարյանի, կամ Միքայել Մինասյանի հետ: Այդպիսով, տնտեսական ճգնաժամը ԲՀԿ նախագահի համար վերածվում է նաև քաղաքական ճգնաժամի, որովհետև այն քաղաքական միավոր հավաքելու բավական պատեհ ժամանակ է, սակայն այդ միավորները անկաշկանդ հավաքում են նախկին իշխանության թևերը, դրանով իսկ կաշկանդելով նաև ԲՀԿ-ին, թողնելով այն իշխանության խնամքին: Խոշոր հաշվով, նախկին իշխող համակարգը դե ֆակտո զբաղված է նաև Գագիկ Ծառուկյանին քաղաքական արդիական ասպարեզից դուրս մղելու , այլ կերպ ասած՝ ճանապարհից հեռացնելու գործով, ինչը, իհարկե, ունի միանգամայն հասկանալի բացատրություն և տրամաբանություն: