Ձեր վստահելի աղբյուրը

«ՌեԱնիմանիա» անիմացիոն ֆիլմերի և պատկերապատման արվեստի 11-րդ միջազգային փառատոնն այս տարի կանցկացվի հոկտեմբերի 24-29-ը: Փառատոնի բացման արարողությանը կներկայացվի Սալվադոր Սիմոյի «Բունյուելը կրիաների լաբիրինթոսում» ֆիլմը:

Այս տարի կինոփառատոնը ստացել է ավելի քան 350 լիամետրաժ և կարճամետրաժ անիմացիոն ֆիլմեր՝ աշխարհի տարբեր երկրներից, որոնցից ընտրված 100-ից ավելին կմրցեն փառատոնի հինգ հիմնական անվանակարգերում: Արտերկրի ու Հայաստանի պրոֆեսիոնալ մասնագետներից կազմված ժյուրին կդիտարկի դրանք և փառատոնի ավարտին մրցանակներ կհանձնի տարբեր անվանակարգերում:

Կինոփառատոնի հիմնադիր-տնօրեն Վրեժ Քասունին լրագրողների հետ հանդիպմանն ասաց, որ միջազգային մրցութային ծրագրերում ընդգրկվել են աշխարհի տարբեր երկրներում նկարահանված լավագույն ֆիլմերը:

Կինոփառատոնի ֆիլմերի համակարգող, կինոքննադատ Դիանա Մարտիրոսյանի ներկայացմամբ, լիամետրաժ ֆիլմերի մրցույթում ընդգրկված է 4 ֆիլմ. «Այդ դեպքում շեշտը դրվել է ոչ թե քանակի, այլ որակի վրա: Ֆիլմերը միջազգային հարթակներից են, երկուսը՝ մասնակցել են Կաննի կինոփառատոնի «Հատուկ հայացք» մրցութային ծրագրին»:

Ֆրանսիացի ռեժիսորների «Քաբուլի ծիծեռնակներ» ֆիլմում, նրա խոսքվ, գլխավոր դերակատարներից մեկին հնչյունավորում է ֆրանսահայ դերասան Սիմոն Աբգարյանը:

«Փառատոնում ներկայացվելու են շատ թարմ ֆիլմեր, թվաքանակով թեև քիչ ֆիլմերի մասին ենք խոսում, սակայն որակյալ են»,- նշեց նա:

Դ. Մարտիրոսյանն ասաց, որ կարճամետրաժ ֆիլմերի ծրագրում մի քանի հայ երիտասարդ անիմատորների ֆիլմեր են ընդգրկված, ինչը շատ հրաշալի է:

Վ. Քասունին տեղեկացրեց, որ փառատոնի շրջանակում կիրականացվի հատուկ ծրագիր՝ նվիրված նկարիչ, ՀԽՍՀ վաստակավոր նկարիչ, ռեժիսոր Վալենտին Պոդպոմոգովի 95-րդ և հայ կինոռեժիսոր, սցենարիստ, ՀԽՍՀ արվեստի վաստակավոր գործիչ Արման Մանարյանի 90-րդ հոբելյաններին:

Փառատոնի շրջանակներում, ինչպես և նախորդ տարիներին, կանցկացվեն վարպետության դասեր, սեմինարներ:

ՀՀ-ում Լեհաստանի դեսպանության հետ համագործակցությամբ Հայաստան է ժամանելու «Վան Գոգի կրքերը» ֆիլմի ռեժիսոր  օսկարակիր Հյու Վելշմանը (Լեհաստան), ով վարպետության դաս կանցկացնի հոկտեմբերի 26-ին: ՀՀ-ում ԱՄՆ դեսպանության հետ համագործակցությամբ Հայաստան կժամանեն պատկերապատման գրքի հեղինակ, նկարիչ և անիմատոր Դեշ Շոուն իր կնոջ՝ անիմատոր Ջեյն Սամբորսկու հետ, և գեղանկարիչ, անիմացիոն ֆիլմի գեղարվեստական ռեժիսոր-ղեկավար Գևորգ Մուրադը (ԱՄՆ):

ՀԲԸՄ-ում կանցկացվի գեղանկարիչ, անիմատոր Գևորգ Մուրադի ցուցահանդեսը, որին կներկայացվեն նրա համահեղինակային կարճամետրաժ «Չորս գործողություն Սիրիայի համար» (2019) ֆիլմի գեղարվեստական ձևավորումները և կտավները:

ՀՀ-ում Ֆրանսիայի դեսպանության աջակցությամբ Հայաստան է ժամանում European Animation Awards-ի գործադիր տնօրեն, հայտնի պրոդյուսեր Ժան Պոլ Քոմինը (Ֆրանսիա), որը նույնպես վարպետության դաս կանցնակցնի:

Ոլորտի մասնագետներ պրոդյուսեր Ռոն Դայնսը (Ֆրանսիա), պրոդյուսեր, պատկերապատման գրքի հեղինակ, սցենարիստ, ռեժիսոր Կորյուն Ապրիկյանը (Ֆրանսիա) նույնպես վարպետության դասընթաց կանցկացնեն:

Դ. Մարտիրոսյանը տեղեկացրեց, որ փառատոնի փակման բացառիկ հնարավորություն է ընձեռվելու հայ հանդիսատեսին՝ ցուցադրվելու են էքսկլյուզիվ կադրեր Հյու Վելշմանի գալիք նախագծից:

«Բացարձակ գաղափար չունենք, ինչ է սպասվում մեզ, բայց լինելու են էքսկլյուզիվ կադրեր: Համաշխարհային կինոփառատոները հաճախ են դիմում նման պրակտիկայի՝ խնդրելով հատուկ հյուրերեն, աշխարհահռչակ կինեմատոգրաֆիստներին, որպեսզի իրենց գալիք նախագծերից որոշակի չակերտներ բացեն»,- նշեց նա:

Երևանում «Գյոթե կենտրոնի» ղեկավար, մշակույթի փորձագետ Նաթիա Միքելաձե-Բախսոլիանի խոսքով, անիմացիոն ժանրում խոսքը միայն հեքիաթներին չի վերաբերում, դրանք կարող են ունենալ պատմական, քաղաքական կոնտեքստ, իրադարձություններ: Նա ասաց, որ «Անսսի», «Ռեանիմանիա» փառատոներն  իրենց ուշադրությունն են հրավիրում նման խնդիրների վրա: Այս առումով,  մշակույթի փորձագետի խոսքով, կարևոր է կարողանալ անիմացիոն ֆիլմերի մասին ճիշտ գրախոսականներ, քննադատություններ գրել:

Հիշեցնենք, որ «ՌեԱնիմանիա» անիմացիոն ֆիլմերի և պատկերապատման արվեստի միջազգային փառատոնը և իր «ՄարԱնի» հարթակը, Գյոթե կենտրոն Երևանի հետ համատեղ, և ՀՀ կրթության, գիտության, մշակույթի և սպորտի նախարարության աջակցությամբ, սեպտեմբերին կազմակերպել էին հատուկ դասընթաց-սեմինար, որի նպատակն էր զարգացնել հայ քննադատների և լրագրողների հմտությունները, ովքեր գրում են հոդվածներ և վերլուծություններ անիմացիոն ֆիլմերի մասին: Այս սեմինարի մասնակիցները հնարավորություն ունեին նախօրոք դիտելու «ՌեԱնիմանիա» 2019- ի անիմացիոն լիամետրաժ և ընտրված լավագույն կարճամետրաժ ֆիլմերը` որպես ուսուցողական օրինակներ շուկայում վերջերս նկարահանված անիմացիոն ֆիլմերի վերաբերյալ հոդվածներ/քննադատություններ գրելու համար: Հյուր փորձագետն էր Կլաուս Լոսերը:

«ՌեԱնիմանիա»-ի փակման արարողության ժամանակ տեղական և միջազգային պրոֆեսիոնալ կինոքննադատներից կազմված ժյուրին կընտրի լավագույն երկու հոդվածները, մեկը՝ լիամետրաժ, երկրորդը՝ կարճամետրաժ ֆիլմերի շրջանում: Մրցանակը ճանապարհորդություն է 2 հաղթողների համար դեպի Շտուտգարտ՝ Գերմանիա, 2020թ. մայիսին կայանալիք 27-րդ անիմացիոն կինոփառատոնին:

«Ռեանիմանիա» փառատոնի այս տարվա բոլոր տպագիր նյութերում, այդ թվում՝ պաստառին, կնկատեք կարմիր կլոր խորհրդանիշ: Փառատոնն այն զետեղել է ի հիշատակ Kyoto Animation ընկերության շենքի հրկիզման, որը տեղի է ունեցել այս տարվա հուլիսի 18-ին: 41-ամյա անհայտ տղամարդը բենզին է լցրել գրասենյակի ներսում և աշխատակիցների վրա, ինչի հետևանքով զոհվել է 35 մարդ: Սա Ճապոնիայում կատարված հետպատերազմյան ամենախոշոր զանգվածային սպանությունն էր: Փառատոնի այս քայլը հարգանքի տուրք է՝ ի հիշատակ մեր գործընկերների, ովքեր դարձան այս պատահարի անմեղ զոհերը: