Ընդամենը 9 օր անց Ֆուտբոլի Հայաստանի ազգային հավաքականը Ազգերի լիգայի խաղարկության խմբային փուլի երրորդ հանդիպումը կանցկացնի՝ «Հանրապետական» մարզադաշտում մրցելով Ջիբրալթարի ընտրանու հետ: Հոկտեմբերի 16-ին էլ կրկին Երևանում մերոնք կմրցեն ենթախմբի առաջատար Մակեդոնիայի ընտրանու հետ: Այս երկու հանդիպումները կարող են վճռորոշ լինել Հայաստանի հավաքականի համար փլեյ-օֆի ուղեգրի համար պայքարում:
Ցավով պետք է արձանագրենք, որ կարևորագույն մրցավեճերից առաջ Հայաստանի հավաքականը հայտնվել է բավական բարդ իրավիճակում: Այս պահին Հայաստանի գլխավոր թիմը չունի մարզիչ: Հայաստանի ֆուտբոլի ֆեդերացիան վերջին օրերին ակտիվ բանակցություններ է վարում մի շարք մասնագետների հետ: Արդեն իսկ կարող ենք արձանագրել, որ առաջիկա հանդիպումներում Հայաստանի հավաքականի նոր մարզչի դերակատարությունը, մեղմ ասած, մեծ չի լինելու: Մասնավորապես, նոր մարզիչը աշխատելու է այն ֆուտբոլիստների հետ, որոնց ստիպված է եղել հրավիրել Հայաստանի ֆուտբոլի ֆեդերացիան: Փաստորեն, առաջիկա հանդիպումներին խաղացողները ազգային թիմի գլխավոր մարզչի կողմից չեն հրավիրվել:
Նշենք, որ ֆուտբոլիստները հավաքականներից հրավեր են ստանում հանդիպումներից մոտ երկու շաբաթ առաջ: Ժամանակ է հարկավոր, որպեսզի ՀՖՖ-ն լուծի նրա ավիատոմսերի և այլ փաստաթղթային հարցեր: Իսկ թե առաջիկա հանդիպումներին ֆուտբոլիստներ ով է հրավիրել, և ովքեր են հրավիրվողները՝ դժվար է ասել:
Հիշեցնենք, որ Հայաստանի հավաքականի նախկին գլխավոր մարզիչ Վարդան Մինասյանը հրաժարական էր տվել սեպտեմբերի 21-ին: Մեկ օր անց էլ ՀՖՖ նոր նախագահ էր ընտրվել ԱԱԾ տնօրեն Արթուր Վանեցյանը: Վերջինս հայտարարել էր, որ Մինասյանի հրաժարականը անսպասելի էր իր համար՝ հույս հայտնելով, որ առաջիկա օրերին Հայաստանի հավաքականը կունենա նոր գլխավոր մարզիչ: Երկու շաբաթում նոր մարզիչ գտնելը, նրա հետ բանակցելն ու նշանակելը, ինչ խոսք, բավական բարդ խնդիր է՝ մանավանդ, երբ խոսքը ազգային հավաքականի մասին է: Հետևաբար դեռևս մարզիչ չունենալու հարցում ՀՖՖ նոր ղեկավարությանը մեղադրելը բոլորովին ճիշտ չէ:
Սեպտեմբերի 22-ին «Առաջին լրատվական»-ը «Ռուբեն Հայրապետյանի վերջին հարվածը. Վանեցյանի համար անսպասելի էր, բայց…» վերտառությամբ հոդված էր հրապարակել՝ նշելով, որ ՀՖՖ նախկին նախագահը հեռանալուց առաջ վերջին հարվածը հասցրեց հայկական ֆուտբոլին, մասնավորապես՝ մեր ազգային թիմին: Երբ հայտնի էր դարձել, որ ՀՖՖ-ն գլխավորելու է Արթուր Վանեցյանը, շատ էր խոսվում, որ Հայրապետյանի հետ հեռանալու է նաև Վարդան Մինասյանը: Սեպտեմբերի 9-ին տեղի ունեցած Մակեդոնիա-Հայաստան հանդիպումից հետո, սակայն, Մինասյանը իր հեռանալու մասին հայտարարություն չարեց: Սեպտեմբերի 6-ին էլ կայացած Հայաստան-Լիխտենշտեյն հանդիպումից առաջ Մինասյանը չէր ցանկացել խոսել ՀՖՖ նոր ղեկավարության հետ աշխատելու հեռանկարի մասին: Հրաժարականի մասին Մինասյանը հայտարարեց միայն սեպտեմբերի 21-ին Ջիբրալթարի հետ հանդիպումից երեք շաբաթ առաջ: Սեպտեմբերի 9-ին հրաժարական տալու դեպքում ՀՖՖ նոր ղեկավարները հնարավորություն կունենային ոչ ֆորմալ բանակցել հավաքականի մարզչի թեկնածուների հետ:
Կարծում ենք՝ ակնհայտ է, որ տեղի ունեցած զարգացումները նախապես ծրագրված էին ՀՖՖ նոր ղեկավարությանը ծանր դրության մեջ դնելու մտադրությամբ: Ռուբեն Հայրապետյանի հարվածը կարծես տեղ է հասնում, և առաջիկա հանդիպումներում Հայաստանի հավաքականը ստիպված կլինի պայքարել կիսատ-պռատ պատրաստված վիճակում: Եթե Հայաստանի հավաքականն ունենա արտասահմանցի գլխավոր մարզիչ, ապա նորանշանակ մասնագետը մի քանի օրում բնականաբար չի հասցնի ծանոթանալ ֆուտբոլիստների և նրանց ունակությունների հետ: Կարելի է ենթադրել, որ առաջիկա հանդիպումներում օտարերկրացի մարզչի կողքին կլինի նաև տեղի մասնագետ՝ հուշումներ անելու և ֆուտբոլիստներին մարզչի հետ ծանոթացնելու նպատակով: Իսկ թե ով կլինի տեղացի մասնագետը՝ դժվար է ասել:
Հայաստանի երիտասարդական հավաքականի գլխավոր մարզիչ Արմեն Գյուլբուդաղյանցը, որը լավ է ճանաչում նաև ազգային թիմի խաղացողներին, այդ օրերին զբաղված կլինի, քանզի հոկտեմբերի 15-ին Հայաստանի երիտասարդական հավաքականը հյուրընկալվելու է Սերբիային: Իրավիճակն իսկապես մտահոգիչ է, և ըստ էության Ջիբրալթարի հետ մրցավեճում Հայաստանի հավաքականը կմրցի դե ֆակտո առանց գլխավոր մարզչի: Ավելի ստույգ՝ նոր մարզչի աշխատանքը կլինի մինիմալ: Միակ սփոփիչ հանգամանքն այն է, որ մեր առաջիկա մրցակիցը բավական թույլ է, և նույնիսկ անպատրաստ վիճակում Հայաստանի հավաքականի հաղթելու հավանականությունը մեծ է: Մակեդոնիայի հետ մրցավեճում հնարավոր է որոշ չափով տեսանելի լինի նոր մարզչի կատարած աշխատանքը:
Ի դեպ, Ջիբրալթարի ազգային հավաքականն արդեն իսկ սկսել է մեր հավաքականի հետ հանդիպման նախապատրաստական հավաքը: Գլխավոր մարզիչ Խուլիո Ռիբասը հավաքին հրավիրել է միանգամից 31 ֆուտբոլիստների:
