ԱԱԾ նախկին տնօրեն Արթուր Վանեցյանն օրերս տպագիր մի քանի լրատվամիջոցների հետ հանդիպման ընթացքում խոսել է իր քաղաքական առաջիկա ծրագրերի մասին, չի շրջանցել նաև իր միջազգային կապերի թեման։ Խոսելով Չեչնիայի նախագահ Ռամզան Կադիրովի հետ իր կապերի մասին՝ Վանեցյանը հիշեցրել է, որ վերջինս հրապարակայնորեն շնորհավորել է իր ծնունդը, ապա նաև ուշագրավ հայտարարություն է արել. «Կադիրովի հետ ունեցել եմ շփումներ, որոնց մասին չեմ ուզում պատմել, որպեսզի չվտանգեմ այն հնարավոր ծրագրերը, որ պետք իրականանան մեր երկրի համար։ Կարծում եմ՝ առաջիկայում այդ ծրագրերը կստացվեն, հանրությունը կտեղեկանա դրանց մասին»։
Ռամզան Կադիրովի կերպարը միանշանակ ընկալում չունի անգամ Ռուսաստանում, ըստ որոշ տեղեկությունների՝ վերջինս ռուս ընդդիմադիր գործիչ Բորիս Նեմցովի սպանության հեղինակն է։
ԳԽ պատգամավոր Ազատ Արշակյանը հիշեցնում է՝ 90-ական թվականներին անկախ Հայաստանի Հանրապետությունը և կիսանկախ Իչկերիան՝ Չեչենական ավտոնոմ մարզը, շատ լավ հարաբերությունների մեջ էին՝ Դուդաևի ժամանակ: «Նա երազում էր, որ Չեչնիան նվաճի այնպիսի կարգավիճակ, ինչպիսին ունի Հայաստանը։ Մենք նրանց համար օրինակ ենք եղել որպես պետություն, որպես մշակութային երկիր։ Բացառված չէ, որ այն ժամանակ երեխա Կադիրովը, իսկ նրա հայրը՝ Ախմադ Կադիրովը, բավականին ակտիվ էր, ժառանգություն է ստացել այդ նոստալգիան՝ նմանվել Հայաստանին։ Նմանվել Հայաստանին, ունենալ Հայաստանի նման ինքնիշխանության մակարդակ, ունենալ տնտեսություն, հրաշալի հաղթական բանակ։ Կարևոր է նաև, որ Չեչնիան ռուսական իմպերիայի կողմից թույլտվություն ունի առանձին շփումներ ունենալու Հայաստանի Հանրապետության հետ։ Արտաքին քաղաքական հարաբերությունների ինքնուրույնություն ավտոնոմ մարզերը Ռուսաստանում չունեն։ Ուրեմն՝ նրան թույլ է տրվել Հայաստանի հետ շփվել»,- «Առաջին լրատվական»-ի հետ զրույցում ասաց նա։
Միևնույն ժամանակ մեր զրուցակիցը հավելեց. «Պետք է նայենք տեսնենք, թե մեզ ինչով է դա հետաքրքիր։ Կարո՞ղ է մեզ համար էլ Չեչնիան է որպես ծրագիր՝ քաղաքական, տնտեսական, գաղափարական առումով, հետաքրքիր։ Ճիշտ այնպես, ինչպես իրենք ուզում են լինել Հայաստանի նման, Հայաստանում էլ ոմանք ուզում են լինել Չեչնիայի նման, այդպիսի կարգավիճակ ունենան։ Հիմա պարոն Վանեցյանը պետք է ասի՝ մեզ ուզում է տանել այդ կարգավիճակի՞ն, թե՞ նրան է բերում մեր կարգավիճակին։ Եթե փոխադարձ է, ապա վտանգավոր է, մենք չենք ուզում ստանալ Չեչնիայի կարգավիճակը, հետ գնալ այդ կարգավիճակին՝ մեզ համար անթույլատրելի է։ Մենք գիտենք, որ Ռամզան Կադիրովի ղեկավարած երկիրը չի կարող արտաքին տնտեսական, գաղափարական, ռազմական համագործակցություն ունենալ։ Նա այդպիսի լիազորություններ չունի։ Մենք դոնո՞ր ենք, թե՞ ստացող։ Մենք ուզում ենք նմանվե՞լ նրանց, դա շատ հետաքրքիր է»։
Դիտարկմանը, թե այստեղ խոսքը ոչ թե Հայաստանի մասին է, այլ առանձին նեղացած, պաշտոնաթող խմբի, Արշակյանն արձագանքեց. «Իհարկե, Վանեցյանը Հայաստան չի ներկայացնում, «Բարգավաճ Հայաստանն» էլ Հայաստանը չի ներկայացնում, բայց «Եդինայա Ռոսիայի» հետ հուշագիր ունի։ Սա էլ արտախորհրդարանական քաղաքական հայտ ներկայացրած գործիչ է, որը գործընկեր է ընտրել Չեչնիան ու Ռամզան Կադիրովին։ Մի ասացվածք կա. «Ասա՝ ընկերդ ով է, ասեմ՝ դու ով ես»։ Հիմա ինքն էլ Կադիրովի ընկերն է, մենք պետք է իմանանք, որ նա Կադիրովից սովորելու բան ունի։ Հայաստանը Չեչնիա՞ է ուզում դարձնել»։
Ազատ Արշակյանն ընդգծեց՝ այս օրերին Ռուսաստանում մեծ սկանդալ է, Ռուսաստանի լրագրողական համայնքը պնդում է, որ պատասխանատվության ենթարկեն Չեչնիայի իշխանություններին լրագրողների հանդեպ իրականացված բռնությունների համար. «Չեչնիայում մարդիկ անհետ կորում են, Չեչնիայում կան շարիաթի օրենքներ, չգրված օրենքներով Ռուսաստանը հանդուրժում է, որ իր նահանգներից մեկում շարիաթը գործադրվի։ Իհարկե, դա վտանգավոր ու դատապարտելի միջավայր է այսօր։ Իբր շատ գոհ ենք, որ իզգոյ, սանկցիաների տակ ծնկի եկած Ռուսաստանի հետ հարաբերություններ ունենանք, հիմա էլ ծայրագավառի հե՞տ ենք հուշագրություն անում»։
Քաղաքագետ Արկադի Վարդանյանի կարծիքով՝ այդ հարցն իր մեջ տարակուսանք է առաջացրել: «Կադիրովն այն անձնավորությունը չէ, որի հետ Հայաստանը պետք է ինչ-որ հարաբերություններ ունենա։ Մենք գիտենք, որ նա հանցագործ է, ամբողջ չեչեն ժողովրդի կողմից այդպիսին էլ ընկալվում է, Պուտինի դրածոն է, «զոն նայող», բազմաթիվ հանցագործություններ է արել։ Ես չեմ պատկերացնում՝ այդ մարդու հետ մենք ի՞նչ համագործակցելու բան ունենք»,- «Առաջին լրատվական»-ի հետ զրույցում ասաց նա։
Վարդանյանի դիտարկմամբ՝ դա միակ տարօրինակությունն էր, որ հնչեցրեց Վանեցյանը: Ըստ քաղաքագետի՝ հստակ հարցերին հստակ պատասխաններ են տրվել. «Մեզ համար շատ բաներ բացվեցին, շատ բաների շուրջ կասկածներ ունեինք, ստացանք պատասխաններ։ Ինձ մոտ տպավորություն ստեղծվեց, որ դա նախապես մշակված գործողություն ու պլան է, որոնք կիրականացվեն այն դեպքում, երբ Փաշինյանի ղեկավարած իշխանությունը մի պահ ստիպված լինի հեռանալ, ու ծագի փոխարինողի հարց։ Երբ նրան ԱԱԾ պետ էր նշանակում Փաշինյանը, ինչպես պարոն Վանեցյանը խոստովանեց՝ Ալեն Սիմոնյանի խորհրդով դա եղավ, որն էլ Նիկոլ Փաշինյանի մտերիմն էր։ Հարցերը մշուշոտ են, բայց իմ ասած տարբերակը չի բացառվում»։