Սիմոնյանը վստահ է՝ Ծառուկյանի՝ հոգեկան խնդիրների մասին գրառումը Գևորգ Պետրոսյանին է վերաբերում

PanARMENIAN.Net - ԱԺ փոխնախագահ, իշխող «Իմ քայլը» խմբակցության պատգամավոր Ալեն Սիմոնյանը հայտարարել է, որ վստահ է՝ ԲՀԿ առաջնորդ Գագիկ Ծառուկյանի գրառումը հոգեկան լուրջ խնդիրներ ունեցող քաղաքական գործիչների մասին վերաբերում է ԲՀԿ-ական Գևորգ Պետրոսյանին:

Factor.am-ի փոխանցմամբ՝ նա նշել է, որ մամուլում տեղեկություններ են պտտվում, թե Պետրոսյանն առողջական խնդիրներ է ունեցել մշտապես:

«Նաև երբ նախարար է եղել, դա պատճառ է հանդիսացել, որ ինքը լքել է նախարարի պաշտոնը՝ ընդամենը մի քանի ամիս լինելով սոցապնախարար: Կարծում եմ, որ այդ որոշումը կայացրել է Գագիկ Ծառուկյանը: Հիմա, Գագիկ Ծառուկյանի բուռն քաղաքական գործունեության վերելքի շրջանում, փորձում է վեր հանել նման հարցեր, որպեսզի քաղաքական գործունեության իմիտացիա ձևավորի»,- ասել է Սիմոնյանը:

Հստակեցնող հարցին՝ այսինքն վարչապետին ուղղված չի՞ եղել, Սիմոնյանն ասել է, որ նման պարագայում Ծառուկյանը համարձակություն կունենար ինչ-որ անուն նշել կամ ավելի հստակ կգրեր. «Ես նույնիսկ վստահ չեմ, որ այդ էջը պատկանում է Գագիկ Ծառուկյանին»:

ԲՀԿ առաջնորդը ֆեյսբուքյան իր էջում գրել էր, որ ժամանակն է Սահմանադրությամբ հստակ ամրագրել՝ «հոգեկան լուրջ խնդիրներ ունեցող անձինք իրավունք չունենան զբաղեցնել քաղաքական բարձրագույն պաշտոններ՝ վտանգելով երկրի և ՀՀ քաղաքացիների անվտանգությունը»:

Ավելի վաղ վարչապետ Նիկոլ Փաշինյանը՝ պաշտպանելով կրթության, գիտության, մշակույթի և սպորտի նախարար Արայիկ Հարությունյանին՝ ակնարկել էր ԲՀԿ առաջնորդի անվան հետ կապված բռնաբարության դեպքը։