Զինված ուժերի գլխավոր շտաբի պետ, գեներալ-գնդապետ Մովսես Հակոբյանը սուր արձագանքեց Հայաստանում ռուսական ռազմաբազայում ռուսական ռազմական ոստիկանության ուժեր տեղակայելու հարցին։ Այսօր Եռաբլուրում Մովսես Հակոբյանը NEWS.am–ի հետ զրույցում հայտարարեց, թե հարցը չպիտի հետաքրքրի այլոց, դա իրենց ռազմավարությունն է։
Նշենք, որ օրեր առաջ Ռուսաստանի զինված ուժերի Հարավային օկրուգի մամուլի ծառայությունը հայտարարել է Գյումրիում ռուսաստանյան 102-րդ ռազմաբազայում ռազմական ոստիկանության ստորաբաժանումներ ձեւավորելու մասին։
Պաշտպանության նախարարության մամուլի խոսնակ Արծրուն Հովհաննիսյանը մեզ հետ զրույցում հայտարարել էր, որ այդ ուղղությամբ բանակցությունները սկսվել են, հարցը դեռ քննարկման փուլում է։ Մինչ իրավական ընթացակարգերը, ռուսական կողմից դարձյալ հայտարարություններ եղան, թե արդեն իսկ այդ ուժերը տեղակայվում են, մինդեռ համաձայնագրով այն դեռ ամրագրված չէ։
Հարցին՝ ի՞նչն է ռուսաստանյան ռազմական ոստիկանության տեղակայելու պատճառը, Մովսես Հակոբյանը կտրուկ պատասխանեց. «Այն, ինչ կատարվել է, կատարվել է օրինական։ Ձեր որոշելիքը չէ։ Մեր որոշելիքն է, մենք էլ կորոշենք... Դա ձեզ հետաքրքիր չպիտի լինի, դա մեր ռազմավարություն... Հանրությանը կտեղեկացվի»,–կցկտուր խոսքեր ասաց Մովսես Հակոբյանը՝ հրաժարվելով պատասխանել մեր մյուս հարցերին։