«Այն, ինչ տեղի է ունենում այս օրերին քարոզարշավի ընթացքում, դժվար է ասել, որ գաղափարական, ծրագրային բնույթ է կրում։ Ցավոք, դա հնարավոր չէ տեսնել նաև կազմակերպվող հեռուստաբանավեճերում»,-«Առաջին լրատվական»-ի հետ զրույցում, ամփոփելով քարոզարշավի առաջին շաբաթը, ասաց Երևանի մամուլի ակումբի նախագահ Բորիս Նավասարդյանը։ Նրա խոսքերով՝ որոշ տարրեր կուսակցությունների ծրագրերից, գաղափարներից լսելի է, բայց դժվար էր ակնկալել, որ դրանք կոնցեպտուալ կլինեն, լավ մշակված կլինեն։ «Այդպիսի ակնկալիքներ չկար։ Կար ակնկալիք, որ լինելու էր սուր պայքար, որ լինելու էր դիրքորոշումների հակադրում, և դա մենք տեսնում ենք։ Եվ կարծում եմ, որ հաշվի առնելով այն, թե ինչ պայմաններում են անցնում ընտրությունները, դրանք արտահերթ են և քիչ ժամանակ կար նախապատրաստվելու համար, քարոզարշավը բավականին կարճ է, ապա այս բոլոր հանգամանքները հաշվի առնելով՝ կարելի է ասել, որ այս քարոզարշավը օգնելու է ամեն դեպքում ընտրողներին կողմնորոշվել»,- ասաց Նավասարդյանը։
Անդրադառնալով քաղաքական ուժերի հակադարձումներին, թե ընտրողներին չի հետաքրքրում գաղափարական, ծրագրային պայքարը, ընտրողը ծրագրերին ուշադրություն չի դարձնում, մեր զրուցակիցը նկատեց. «Եթե ինչ-որ սպառողին դեռ ոչ մի անգամ չես առաջարկել, շատ դժվար է որոշել՝ սպառողին դա պետք է, թե ոչ։ Եթե այդ նույն տրամաբանությունը տեղափոխենք նաև քաղաքական պայքարի վրա, ապա մենք երբևէ սպառողին՝ ընտրողին չենք առաջարկել հստակ ծրագրեր, հստակ մոտեցումներ։ Կարծում եմ, որ այդ առումով ռիսկային է ասել, որ ընտրողին դա պետք չէ։ Երբ որ առաջարկենք և դա տեղի ունենա ավանդաբար ու տեսնենք, որ ընտրողը դրան ուշադրություն չի դարձնում, գուցե հիմքեր կլիներ հիմա նման պնդումներ անել, բայց այս պահին նման գնահատականներ տալը այնքան էլ հիմնավորված չէ, քանի որ Հայաստանում կա բավական լուրջ ընտրազանգված, որը հետաքրքրված է շատ կոնկրետ ծրագրերով, մտածված քայլերով»։ Նավասարդյանը նաև հավելեց, որ ցավոք, այս քարոզարշավը նույն տոնայնության մեջ էլ կշարունակվի, ծրագրային գաղափարական պայքար չի լինի, քանի որ քաղաքական ուժերը չէին պատրաստվել այս քարոզարշավին, առավել ևս գաղափարական ու ծրագրային մրցակցությանը, բացի դրանից՝ համարում են, որ դա ընտրողներին հետաքրքիր չէ։ «Բայց ես սրանում մեծ պրոբլեմ չեմ տեսնում, քանի որ, կրկնում եմ, ժամանակը բավարար չէր, որ մարդիկ հասկանային, խորանային կուսակցությունների ծրագրերի մեջ»,-եզրափակեց Բորիս Նավասարդյանը։
Տեղեկատվական անվտանգության փորձագետ Սամվել Մարտիրոսյանի գնահատմամբ՝ ևս ծրագրային և գաղափարական պայքարը բացակայում էր այս 8 օրերին, քանի որ հիմնական խաղացողները դարձել են «Իմ քայլը» ու ՀՀԿ-ն, իսկ նրանք զբաղված են միմյանց պատասխանելով, որի արանքում ստվերվում է քաղաքական այլ ուժերի կողմից տարվող գաղափարական պայքարի, քարոզչության փորձերը։ «Փաշինյան-ՀՀԿ հակամարտությունը այս ընտրության ամենատխուր մասերից է։ Փաստացի մի բանավեճ է ստեղծվել, որը դուրս է քաղաքական պայքարի տրամաբանությունից։ Փաստացի երկու բևեռ է ստեղծվել, մարդիկ ներգրավվել են այս բանավեճի մեջ, իսկ մնացած ուժերը մնացել են այս ամենի ստվերում։ Էլ չասած, որ սա քաղաքական պայքարի անընդունելի ոճ է»,- ասաց Մարտիրոսյանը՝ հավելելով. «Բայց սա տրամաբանական է, քանի որ ժամանակը շատ սուղ էր, մասնակցության հայտ ներկայացրած ուժերը՝ շատ, որոնց մեջ կան նորաստեղծ ուժեր, ոտքի վրա ձևավորված դաշինքներ։ Կոնկրետ թեմաների հետ կապված բանավեճ, կարծես թե, նոր-նոր սկսվում է, բանավեճային մշակույթը մտնում է մեզանում, բայց վատն այն է, որ այս կարճ ժամանակում մարդիկ չեն հասցնի հասկանալ, թե ով ինչ մոտեցումներով է գնում ԱԺ»։
Սամվել Մարտիրոսյանի խոսքերով՝ կա ճշմարտություն, որ մարդկանց այդքան էլ չի հետաքրքրում քաղաքական ուժերի ներկայացրած ծրագրերը, քանի որ նախկինում ընտրությունների ժամանակ ամեն ինչ նախապես կանխորոշված էր ու մարդիկ հետևում էին միայն ցուցակների առաջին դեմքերին, իսկ այս ընտրություններին, ըստ մեր զրուցակցի, կա ընտրողների բավական մեծ զանգված, որը կարևորում է ներկայացված ծրագրերը և գնալու է ընտրության հենց այդ ծրագրերից ելնելով։ «Այնպես որ այս իմաստով կարելի է ասել, որ սրանք աննախադեպ ընտրություններ են, բայց կրկին որոշակի առումով սահմանափակ և այս մասով դեռ մեծ աշխատանք պետք է տանել»,- եզրափակեց Սամվել Մարտիրոսյանը։
Նախընտրական քարոզարշավին մնացել է 4 օր։ Դեկտեմբերի 8-ը լռության օր է, իսկ 9-ին կկայանան արտահերթ խորհրդարանական ընտրությունները։
Լուսանկարը՝ Photolure-ի