«Առաջին լրատվական»-ի զրուցակիցն է «Ազատամարտիկների դաշինքի» խորհրդի անդամ Ռազմիկ Պետրոսյանը։
-Պարոն Պետրոսյան, ինչպե՞ս եք գնահատում երկրորդ նախագահ Ռոբերտ Քոչարյանի շուրջ ընթացող զարգացումները։ Արդյոք կա՞ հնարավորություն հասնել Մարտի 1-ի ոճրագործության վերջնական բացահայտմանը։
–Հույս ունեմ, որ արդարադատություն լինելու է, ես վստահ էի, որ գալու է ժամանակ, որ բոլորը պատասխան են տալու։ Հիմա այդ ժամանակը եկել է ու որևէ խնդիր չեմ տեսնում։ Այդ մարդը, որպես երկրի Գերագույն գլխավոր հրամանատար, իրավունք չուներ բանակը ներգրավել ներքաղաքական զարգացումների մեջ, մենք բոլորս դրա ականատեսն ենք եղել, ու հիմա եկել է պատասխան տալու ժամանակը։
-Կարծում եք՝ առաջիկայում գործով նոր զարգացումների ականատեսը կլինե՞նք, և կլինի՞ վերջնական բացահայտում։
-Իհարկե կբացահայտվի։ Ես միշտ էլ ասել եմ՝ Մարտի 1-ն ու Հոկտեմբերի 27-ը հնարավոր է բացահայտել իշխանափոխությունից հետո։ Երբ Ռոբերտն ասել էր, որ դա «ուչաստկովիի» մակարդակի գործ է՝ չէր սխալվել։ Փաստացի հանցագործություն կատարածները կենդանի էին ու դրա բացահայտումը խնդիր չէր, պարզապես չկար քաղաքական կամք։ Այդ ոճրագործությունները տեղի են ունեցել ամբողջ ազգի, տեսախցիկների աչքի առաջ։ Դա բացահայտված գործ է, մնում է այդ ամենը ամրագրել։
-Բայց մենք տեսնում ենք, որ, մասնավորապես, Մոսկվան ամեն ինչ անում է դա խոչընդոտելու համար, Քոչարյանին շնորհավորելն էլ հենց այդ կոնտեքստում է։
–Դա ավելի շատ այլ քաղաքական խնդիրների հետ է կապված։ Իհարկե, Ռուսաստանին դուր չի գալիս, որ մենք դարձել ենք ժողովրդավար երկիր, եթե իրենք Վրաստանում ու Ուկրաինայում կարողացան հեղափոխությունից հետո ապակայունացնել իրավիճակը, մենք պետք է ամեն ինչ անենք, որ դա թույլ չտանք։ Մեր՝ իբրև գործընկերները ՀԱՊԿ-ի շրջանակներում շահագրգռված չեն այստեղ ժողովրդավարության հաստատմամբ, նրանց պետք են Ռոբերտի ու Սերժի նմանները, որ գլուխ խոնարհեն իրենց առաջ, ոչ թե իշխանություն, որն ունի ժողովրդի լայն զանգվածի ուժն իր մեջքին ու իսկապես լեգիտիմություն։ Լեգիտիմությունն իրենց համար չարիք է, դրա համար էլ ամեն ինչ անում են սեպ խրելու համար։ Մենք ուժեղ ենք, ու մնում է այս ժամանակն օգտագործենք ու ամրապնդենք մեր բանակը, երկրապահի ու բոլոր կռված տղերքին պետք է կարողանանք հավաքել իրար շուրջ ու այդ ժամանակ վախենալու բան չենք ունենա։ Եթե Ռուսաստանը կուզենա մեզ հետ հավասարը հավասարի նման համագործակցել՝ շատ լավ, եթե ոչ՝ իրենք գիտեն։ Ռոբերտի ու Սերժի ժամանակ մեր երկիրը դարձել էր վասալ։
-Ձեր դաշինքի անելիքները որո՞նք են լինելու առաջիկայում՝ հատկապես Մանվել Գրիգորյանի ազատ արձակումից հետո ԵԿՄ-ում ի՞նչ անելիքներ կան։
–Դատական գործընթացը դեռ շարունակվում է, իրենց կատարածի համար բոլորը պատասխան տալու են։ Մեր դաշինքը իր հստակ դիրքորոշումը միշտ ունեցել է։ Մեր երկրի համար պատերազմը ավարտված չէ, ի դեմս երկրապահի պետք է այնպիսի կուռ միավորում ստեղծենք, որ բոլորն այնտեղ լինեն, պետք է միասնական լինենք։ Բայց չենք ընդունում նախագահի տարբերակը, պետք է համանախագահներ լինեն, որ մի անձի շուրջ ամեն ինչ չկենտրոնանա։ Օգտվելով առիթից՝ ուզում եմ շնորհավորել բոլոր ազատամարտիկներին ու հայ ժողովրդին՝ մաղթելով միասնություն և հաջողություն։
