Լոնդոնի «Արսենալի» գլխավոր մարզիչ Միկել Արտետան, որոշել է վաճառել ֆուտբոլի Հայաստանի ազգային հավաքականի ավագ Հենրիխ Մխիթարյանի տրանսֆերը։ Այս մասին գրում է Todofichajes պարբերականը, նշելով, որ ամռանը հայ կիսապաշտպանը պաշտոնապես կդառնա «Ռոմայի» ֆուտբոլիստ։ Հիշեցնենք, որ մեր ֆուտբոլիստի տրանսֆերը պատկանում է Լոնդոնի «Արսենալին», իսկ իտալական ակումբում ելույթ է ունենում վարձավճարով։ Նախօրեին Daily Express-ը տեղեկություն էր տարածել, որ անգլիական ակումբի ղեկավարությունը ևս դեմ չէ Մխիթարյանին վերջնականապես տրամադրել «Ռոմային»։ Նշվում էր, որ կողմերի միջև ակտիվ բանակցություններ են ընթանում։ Այն բանից հետո երբ Մխիթարյանը արդյունավետության աչքի էր ընկել «Ռոմայում», Արտետան հայտարարել էր, որ կմտածի հայ ֆուտբոլիստին վերադարձնելու մասին։ «Մխիթարյանին վերադարձնելու հնարավորություն ունենք, դիտարկում ենք այդ տարբերակը։ Նա միշտ ինձ դուր է եկել։ Նա ֆուտբոլիստ է, ով կարող է ադապտացվել ցանկացած թիմի, երբ լավ մարզավիճակում է։
Մխիթարյանը վերջին խաղերում բավական հաջող խաղաց։ Գիտենք նրա որակները, ֆուտբոլային անցյալը։ Մեզ լրացուցիչ տեղեկություններ են պետք, որպեսզի ճիշտ որոշում կայացնենք»,- ասել էր Արտետան։ Վերջին զարգացումները սակայն ցույց են տալիս, որ Արտետան այնուամենայնիվ փոխել է որոշումը Մխիթարյանի տրանսֆերի վերաբերյալ։ «Արսենալը» գտնվում է անկման փուլում, և ակումբի ղեկավարությունը փորձում է լուրջ քայլեր ձեռնարկել ճգնաժամը հաղթահարելու համար։ Լոնդոնյան ակումբը դուրս է մնացել Եվրոպա լիգայի խաղարկությունից, իսկ Անգլիայի Պրեմիեր լիգայում այս պահին միայն 9-րդն է։ Արդեն մի քանի տարի թիմի առաջ խնդիր է դրվում նվաճել Չեմպիոնների լիգայի խաղարկության ուղեգիր, բայց…։ Եվ ահա վաճառելով Մխիթարյանի ևս էլի մի քանի խաղացողների տրանսֆերը «Արսենալը» ըստ երևույթի մտադիր է կադրային լուրջ փոփոխություններ իրականացնել։ Վերջին օրերին բրիտանական ԶԼՄ-ները գրում են, որ ամռանը «Արսենալից» կհեռանա հարձակման գծի առաջատար Պյեր Էմերիկ Օբամեյանգը։ Վերջինիս ծառայություններով հետաքրքրված են «Չելսին» և «Բարսելոնան»։ Նույն աղբյուրի համաձայն Օբամեյանգը ցանկանում է կարիերան շարունակել «Բարսելոնայում»։ Ինչևէ Մխիթարյանի «Ռոմայում» հայտնվելու թերևս միակ հարցը ֆինանսական կողմն է։
Թե որքան է «Արսենալը» պահանջում հայ ֆուտբոլիստի համար առայժմ հայտնի չէ։ Ավելի վաղ անգլիական ԶԼՄ-ները գրում էին, որ «Ռոմայի» նախկին՝ 10 միլիոն եվրո առաջարկն «Արսենալի» համար անընդունելի է եղել, և այժմ իտալական ակումբը հայ կիսապաշտպանի համար առաջարկում է 14 միլիոն եվրո։ Ենթադրվում է, որ վերջին շրջանում ցուցադրած տպավորիչ և արդյունավետ ելույթներից հետո «Արսենալը» բարձրացրել է Մխիթարյանի տրանսֆերային արժեքը։ Այն որ «Ռոման» ցանկանում է պահել Մխիթարյանին միանշանակ է։ Այս մասին հայտարարել էր թիմի պորտուգալացի գլխավոր մարզիչ Պաուլու Ֆոնսեկան։ «Ռոման» այս պահին «Մանչեսթեր Յունայթեդի» հետ բանակցում է նաև պաշտպան Քրիս Սմոլինգի տրանսֆերի շուրջ։ Սմոլինգը ինչպես Մխիթարյանը «Ռոմայում» ելույթ է ունենում վարձակալության հիմունքներով։ Այս երկու ֆուտբոլիստները դարձել են «Ռոմայի» կարևոր մասնիկները։ «Սմոլինգը գերազանց մարդ է, անհավանական պրոֆեսիոնալ։ Նա շատ հեշտ հարմարվեց իտալական ֆուտբոլին։ Նրան բոլորը սիրում են «Ռոմայում», քանի որ նա իսկական պրոֆեսիոնալ է։ Կցանկանայի, որ նա մնար։ Զրուցում ենք այդ թեմայով։ Նա շատ կարևոր է մեր թիմի համար։
Մխիթարյանը վնասվածքներ ունեցավ, բայց հիմա վերադառնում է և ապացուցում իր վարպետությունը։ Նա խաղադաշտում գերազանց որոշումներ ընդունող խաղացող է։ Կցանկանայի, որ նա էլ մնար»,- նշել էր Ֆոնսեկան։ Թե ինչ ճակատագիր է սպասվում Մխիթարյանին այս պահին դժվար է ասել։ Միանշանակ է թերևս, որ եթե ֆինանսական հարցում «Ռոման» և «Արսենալը» համաձայնության գալ մեր հավաքականի ավագը պաշտոնապես կդառնա «Ռոմայի» ֆուտբոլիստ։
«Ռոմայի» կազմում այս մրցաշրջանում Մխիթարյանն անցկացրել է 13 հանդիպում, խփել է 6 գնդակ և կատարել 3 գոլային փոխանցում։
