Մատչելիության հղումներ

Դավիթ Սանասարյանի գործի նախաքննությունը կշարունակի իրականացնել ԱԱԾ-ն


ՊՎԾ պետ Դավիթ Սանասարյան, արխիվ
ՊՎԾ պետ Դավիթ Սանասարյան, արխիվ

Գլխավոր դատախազությունը որոշել է, որ Պետական վերահսկողական ծառայության պետի պաշտոնը զբաղեցրած Դավիթ Սանասարյանի գործը Ազգային անվտանգության ծառայությունից այլ քննչական ծառայություն տեղափոխելու հիմքեր չկան: Նախաքննությունը կշարունակի իրականացնել ԱԱԾ-ն, այս մասին «Ազատությանը» փոխանցեց գլխավոր դատախազության հանրային կապերի բաժնի պետ Արևիկ Խաչատրյանը։

Գործը ԱԱԾ-ից այլ քննչական ծառայություն տեղափոխելու միջնորդությամբ դիմել էր Սանասարյանի պաշտպանական կողմը:

«Քրեական գործով քննչական ենթակայություն փոխելու հիմքեր առկա չեն, և նախաքննությունը կիրականացվի ԱԱԾ քննչական դեպարտամենտի կողմից։ Միևնույն ժամանակ նկատի ունենալով, որ նախաքննության մարմինը բավարարել է առանձին անձանց հարցաքննելու վերաբերյալ պաշտպանների միջնորդությունը, դատախազական պատշաճ հսկողությամբ կապահովվի բազմակողմանի, լրիվ, օբյեկտիվ նախաքննությամբ ի պաշտպանություն մեղադրյալին բերված բոլոր փաստարկների պատշաճ ստուգումը», - ասաց Արևիկ Խաչատրյանը:

Թավշյա հեղափոխության առանցքային դեմքերից Դավիթ Սանասարյանը ապրիլի 18-ին որպես մեղադրյալ ներգրավվեց հեմոդիալիզի քրեական գործով՝ պաշտոնեական լիազորությունները չարաշահելու համար։ Նրա նկատմամբ խափանման միջոց է ընտրվել ստորագրությունը չհեռանալու մասին։

Ըստ Ազգային անվտանգության ծառայության, Սանասարյանն իր աշխատակիցների կողմից փաստացի կառավարվող ընկերությանը օժանդակելու նպատակով չարաշահել է պաշտոնեական դիրքը, չի կատարել իր ծառայողական պարտականությունները: Սանասարյանը մեղադրանքը շինծու էր որակել:

Ավելի վաղ այս գործով կալանավորվել էին ՊՎԾ երկու աշխատակիցներ և հեմոդիալիզի գնումներին մասնակցած «Զորաշեն» ՍՊԸ-ի հաշվապահը: Երեքն էլ կալանքից ազատ են արձակվել: ԱԱԾ-ն հաղորդել էր, որ ՊՎԾ աշխատակիցները փորձել են այնպես կազմակերպել գնումների գործընթացը, որ հաղթող ճանաչվի իրենց կողմից հովանավորվող «Զորաշեն» ընկերությունը:

Այսօր Դավիթ Սանասարյանի պաշտպան Արսեն Սարդարյանն «Ազատության» հետ զրույցում ասաց, որ նախաքննություն իրականացնող մարմնի նկատմամբ անվստահություն ունեն՝ պնդելով, թե ԱԱԾ-ն կանխակալ, միակողմանի քննություն է անցկացնում:

«Պարոն Սանասարյանին անհիմն մեղադրանք է առաջադրվել: Երկրորդը՝ առանց հիմքերի, ձևական պատճառաբանությամբ, որ նա բարձր պաշտոն է զբաղեցնում, հարգանք է վայելում և ուստի կարող է խոչընդոտել քննությանը՝ այդ պաշտոնին մնալով, նրա պաշտոնավարումը ժամանակավորապես դադարեցվել է։ Այս երկու որոշումների հետ համաձայն չլինելով՝ մենք մեր բողոքն ենք ներկայացրել դատախազություն, և քանի որ այդ որոշումները գտել ենք, որ անհիմն են, միջնորդել ենք, որ այլ մարմին քննի, որովհետև նման որոշումներ ընդունելը արդեն մեր մոտ կասկածներ էր առաջացնում նախաքննության օբյոկտիվության հետ կապված», - նշեց Սարդարյանը։

Մինչդեռ ԱԱԾ տնօրեն Արթուր Վանեցյանը օրեր առաջ լրագրողների հետ զրույցում ասել էր․ - «Այն մեղադրանքը, որ առաջադրվել է Դավիթ Սանասարյանին, այս պահին ամբողջությամբ հիմնավորված է տարբեր մարդկանց ցուցմունքներով, կատարված առերեսումներով: Բայց, չխախտելով պարոն Սանասարյանի անմեղության կանխավարկածը, հորդորում եմ բոլորին մի քիչ համբերել, երբ գործը կուղարկվի արդեն դատարան, և դատարանում դուք բոլորդ և առհասարակ հանրությունը հնարավորություն կունենա ծանոթանալու բոլոր այն ապացույցների հետ, որոնք ձեռք են բերվել քրեական գործի նախաքննության ընթացքում: Եվ հանրությունը, լրագրողական միջավայրը և մնացած բոլորը կգնահատեն այդ ապացույցների իսկությունը»:

Սանասարյանի փաստաբանը, անդրադառնալով իր պաշտպանյալի մասին իրավապահ կառույցների ղեկավարների հայտարարություններին, ասաց. - «Էս ելույթները խիստ անհանգստացնող են և շատ հարգելով, ես, որպես անձ, ոչ մի բան իրենց դեմ չունենալով՝ թե՛ գլխավոր դատախազի, թե՛ ԱԱԾ-ի տնօրենի, այս գործառույթները գտնում եմ, որ ակնհայտ սահմանափակում են մեր պաշտպանության իրավունքը։ Այսօր եթե ԱԱԾ-ի տնօրենն ասում է, որ գործը կուղարկվի դատարան, մենք հիմա մեղադրանք առաջադրելու որոշումը բողոքարկում ենք դատարան, արդյո՞ք ԱԱԾ-ի տնօրենի և Գլխավոր դատախազի հրապարակավ ելույթները դատարանին չեն կաշկանդել։ Ի՞նչ է ստացվում՝ որ եթե մեր վստահորդը բարձրաստիճան պաշտոնատար անձ է, ինքը պաշտպանության իրավունք պետք է չունենա՞։ Քննիչը պետք է որոշում կայացնի նրան մեղադրանք առաջադրելու և այս մեղադրանքը դառնա վերջնական դատական ա՞կտ»։

Ուղիղ հեռարձակում

XS
SM
MD
LG