Երեւանի Հերացի-Կորյուն փողոցում այսօր՝ ապրիլի 16-ին, քաղաքացիների եւ ցուցարարների միջեւ տեղի ունեցած միջադեպի հետեւանքով ցուցարարներ են վնասվածքներ ստացել: Այս մասին քիչ առաջ հայտարարեց «Իմ քայլը» նախաձեռնության առաջնորդ, «Ելք» խմբակցության ղեկավար Նիկոլ Փաշինյանը:
NEWS.am-ին «Հերացի» թիվ 1 համալսարանական հիվանդանոցից հայտնեցին, որ այսօր իրենց է դիմել 1 քաղաքացի դեմքի վնասվածքով: Թե որտեղ է ստացել վնասվածքն ու ինչ պայմաններում, հիվանդանոցից հորդորեցին դիմել իրավապահ մարմիններին:
«24-ամյա քաղաքացի է մեզ մոտ տեղափոխվել, փափուկ հյուսվածքների սալջարդ է ստացել, համապատասխան հետազոտություններ է անցնում, ամենայն հավանականությամբ, մի քանի ժամից արդեն կարող է տուն գնալ»,- հայտնեցին հիվանդանոցից: