Հունաստանում երկու խոշոր կոռուպցիոն սկանդալների մեջ մեղադրվող Շվեյցարիայի բանկիր Ժան Կլոդ Օսվալդը փախել է ոստիկանության հսկողությունից՝ կոտրելով էլեկտրոնային հսկողության ապարանջանը։ Այս մասին հաղորդում է ria.ru-ն՝ հղում կատարելով հունական արդարադատության նախարարության հայտարարությանը:
Օսվալդը Ֆրանսիայի քաղաքացի է, նա ձերբակալվել է Աբու Դաբիում 2015թ․՝ հունական դատախազի կողմից ձերբակալման միջազգային հրամանով: Նա համարվում է 2 կոռուպցիոն սկանդալների կարևորագույն մասնակիցներից մեկը` կապված զենքի ծրագրերի և Siemens գերմանական ընկերության գործերի հետ:
Օսվալդը մեղադրվում է զենքի գնման ժամանակ կոռուպցիայի 4 դեպքերի մեջ ներգրավված լինելու մեջ: 1998-2009թ․ Հունաստանը գնել է ավելի քան 20 միլիարդ եվրոյի զենք: Ենթադրվում է, որ Օսվալդը որպես Dresdner Bank-ի, ապա BNP Paribas-ի ներկայացուցիչ կարող է ներգրավված լինել հանցագործության միջոցների լվացման մեջ:
2016 թ. նոյեմբերից նա հայտնվել է տնային կալանքի տակ` էլեկտրոնային հսկողության ապարանջան կրելու պայմանով, ինչը թույլ է տալիս որոշել նրա գտնվելու վայրը:
Արդարադատության նախարարության տվյալներով՝ Օսվալդը երեքշաբթի օրը ցերեկը ոստիկանների ուղեկցությամբ տուն է վերադարձել իր դատական նիստից, իսկ մեկ ժամ հետո նա կոտրել է ապարանջանը: Ապարանջանների համար պատասխանատու ընկերությունը անմիջապես ոստիկանությանը տեղեկացրել է վերահսկողության համակարգի խախտման մասին: Ներկայումս ոստիկանությունը փնտրում է հսկողության տակ գտնվողին, ասել է արդարադատության նախարարությունը: