«Առաջին լրատվական»-ի զրուցակիցն է ՀԱԿ վարչության անդամ Վարդան Մալխասյանը։
-Պարոն Մալխասյան, օրերս Վազգեն Մանուկյանի նախաձեռնությամբ ստեղծվեց «Վերնատուն» հասարակական-քաղաքական շարժումը։ Ի՞նչ հնարավորություններ ունի այս ակումբը՝ հաշվի առնելով այն փաստը, որ դրա անդամ են դարձել հիմնականում նախկին համակարգին աջակցող գործիչները։
–Նախ անդրադառնանք ակումբի անվանմանը։ Թումանյանի ստեղծած «Վերնատունը» մշակութային, պատմական մեծ արժեք ու հիշողություն է։ Այնտեղ էին հավաքվում մեր ազգի մեծերը՝ Կոմիտասը, Շանթը, Տերյանը, Պռոշյանը և մյուսները։ Նրանք քննարկում էին համաշխարհային ու հայ գրականության խնդիրները ու բազմաթիվ այլ հայանպաստ հարցեր։ Վազգեն Մանուկյանի շուրջը հավաքվածների կողմից «Վերնատուն» անունով ակումբ ստեղծելը ես համարում եմ նսեմացում այդ պատմական արժեքի ու հիշողության նկատմամբ։Մենք մինչև հիմա այդպիսի անարգանքներ տեսել ենք։ Անարգանք էր, երբ ոմն Անդրանիկ Մարգարյանին թաղեցին Կոմիտասի ու Սիլվա Կապուտիկյանի կողքին, պանթեոնում նրա գերեզմանին կանգնեցրեցին ամենաբարձր ու ամենաթանկաժեք գրանիտե արձանը՝ դրանով ցույց տալով, որ այնտեղ հանգչում են հայերի մեծերը, բայց մեծերի մեծը Մարգարյանն է։Արձանի վրա էլ փորագրեցին հայ ականավոր պետական գործիչ, գուցե պետք էր փորագրել ականավոր կեղեքի՞չ, որը Վազգեն Սարգսյանի դիակի վրա առևտուր անելով դարձավ վարչապետ, միլիարդատեր, իսկ տղային նվիրեցին քաղաքապետարանը։
Հիմա վերադառնանք Վազգեն Մանուկյանի «Վերնատանը», որը անարգանքների հերթական շարունակությունն է։ Երբ քաղաքական որոշակի գործիչներ, այլևս ժողովրդի կողմից մերժված են լինում, սկսում են նոր ու շռնդալից անուններով հանդես գալ, իբրև թե իրենք նոր Թումանյան են, Տերյան կամ ամպերից իջած Քրիստոս։ Բայց նրանք իրականում թաղված են կողոպուտների ու կեղծիքների մեջ, եթե նրանց լավ տնտղես՝ կպարզվի, որ մեղսակից ու մասնակից են նախկին գողապետական ռեժիմին։ Գալով, որ օղակը քիչ-քիչ սեղմվում է, որոշել են նախահարձակ լինել, որ երբ հերթը հասնի իրենց ձերբակալմանը ի լուր աշխարհի հայտարարեն՝ իբրև իրենք քաղբանտարկյալ են ու իրենց ազատազրկում են իրենց քաղաքական հայացքների համար։ Այս ակումբի վրա ծախսվում են ահռելի փողեր, դրանք հայ ժողովրդից թալանված ու Քոչարյանի մոտ հայտնված փողերն են։ Բայց այդ փողերի շաբաշը երկար չի տևի, Քոչարյանը շուտով կհասկանա, որ այդ ակումբը ոչ մի արդյունք չի տալիս, որովհետև ժողովուրդը նրանց չի հավատում ու շան տեղ չի դնում։Ընդհակառակը՝ նրանց գործունեությունը ավելի է ուժեղացնում գործող իշխանությանը և նրանց չի համարում այլընտրանք։ Իսկ երբ կտրվեց փողը,այս ակումբը կվերանա։Փողի համար ամեն ինչ տվող, նույնիսկ կյանքն ու անունը չխնայող վարձկանները այլևս փող չեն ստանա, կբզկտեն իրար, ցիրուցան կլինեն ու կփնտրեն նոր տերերի։Նրանց վրա լուրջ ուշադրություն դարձնել պետք չէ, ամեն ինչ ժամանակի ընթացքում կընկնի իր տեղը։
-Այսինքն կարծում եք, որ ակումբի ֆինանսավորումը Քոչարյանի կողմից է և նրան ծառայելու նպատակ ունի՞։
-Անպայման։Մազաչափ անգամ չկասկածեք դրան։ Քոչարյանը դեռ երկու-երեք ամիս առաջ էր հայտարարում, որ աշնանը ձևավորվելու է մի ֆորմատ, բևեռ, որն ընդդիմության դրոշակը կվերցնի իր ձեռքը։ Բայց դա խիստ հեռու է տրամաբանությունից։ Նրանք վարկաբեկված մարդիկ են, ժողովուրդը նրանց չի հավատում։
-Նույնիսկ եթե իշխանություններից դժգոհությունը շատանա և իշխանությունների վարկանիշն ընկնի՞։
-Եթե նույնիսկ իշխանությունների վարկանիշն ընկնի, նրանք այլընտրանք լինել չեն կարող։ Կարող է նոր ուժ գա, նոր մարդիկ լինեն, բայց տրամաբանությունից հեռու է , որ հները վերակենդանանան։
-Իրենք ասում են, թե Հայաստանում 37 թիվն է, բայց ամենամեծ դահլիճում համաժողով են անում, լուսաբանվում նույնիսկ Հանրային հեռուսընկերության կողմից։ Իշխանությունները չափից դուրս հանդուրժող չե՞ն։
–Գողն ամենաբարձրն է գոռում՝ բռնեք գողին, միշտ էլ այդպես է։ Նրանք փող են վերցրել, պետք է խոսեն, բարբաջեն, բայց տակը ոչինչ չկա։ Նրանք մերժված վարձկաններ են, հենց փողը կտրվեց՝ ցիրուցան կլինեն։
Իշխանություններն այո՛, չափից շատ հանդուրժող են և նրանց վարկանիշը հենց դրա պատճառով է ընկնում։Թավշյա բառը հեղափոխությանը չի սազում, պետք է երկաթյա, պողոպատյա մեթոդներ կիրառել։ Աղբը պետք է մաքրել, բամբակյա, թավշյա հեղափոխություն չի լինում։ Հեղափոխականները պետք է մաքրեն ավգյան ախոռները, կաբինետներից դուրս շպրտեն հին ու նեխած չինովնիկներին։ Հիմա մեր մարզը եթե նայեք՝ ոչինչ չի փոխվել, մարզպետը սերտաճել է հին համակարգին, ուտում, խմում, ման է գալիս։
