Ֆուտբոլասերների շրջանում քննարկման լայն առարկա է դարձել Հայաստանի ազգային հավաքականի գլխավոր մարզչի հարցը: Հիշեցնենք, որ երեկ մեր ազգային թիմի գլխավոր մարզիչ Արթուր Պետրոսյանը հրաժարական էր տվել: Հայաստանի ֆուտբոլի ֆեդերացիայի տարածած հայտարության համաձայն, նոր մարզչի անունը հայտնի կդառնա առաջիկա օրերին: Ո՞վ կարող է ոտքի կանգնեցնել մեր հավաքականը, որը նախապատրաստվում է Ազգերի լիգայի խաղարկությանը:
Կարելի է ենթադրել, որ ՀՖՖ-ն և մասնավորապես Ռուբեն Հայրապետյանը արդեն իսկ պայմանավորվածություն է ձեռք բերել ազգային թիմի նոր մարզչի հետ: Մամուլում տարածված տեղեկությունների համաձայն Հայաստանի հավաքականը գլխավորելու ամենահավանական թեկնածուներն են «Փյունիկի» գլխավոր մարզիչ Արմեն Գյուլբուդաղյանց ու Վարդան Մինասյանը: Վերջինիս ջանքերով մեր հավաքականը պատմության ընքացքում ամենաբարձր արդյունքներն է գրանցել, ցուցադրելով որակյալ ֆուտբոլ: Մինասյանը հեռանալուց հետո ըստ էության դարձել է մեր հավաքականի գլխավոր մարզչի մշտական թեկնածուն: Երկրպագուները շարունակ հիշում են այս մասնագետին և ցանկանում են կրկին տեսնել հավաքականի ղեկին:
Նշենք սակայն, որ ստեղծված իրավիճակում Մինասյանը, որ բավական սկզբունքային մասնագետ է, դժվար թե ցանկանա իր վրա վերցնել ծանր բեռը: Ավելի ստույգ գլխավորելով հավաքականը և չհրավիրելով Յուրա Մովսիսյանին և Ռուբեն Հայրապետյանի սև ցուցակում գտնվող մյուս խաղացողներին, Մինասյանը այսպես ասած երկրպագուների աչքից կընկի: Երկրպագուի աչքից կընկնեն նաև Հայաստանից մյուս բոլոր մասնագետները, որոնք կաշխատեն Հայրապետյանի գրած ցուցակով: Երեկ Վարդան Մինասյանը հերքել էր ազգային հավաքական վերադառնալու մասին լուրերը: Կարծում ենք ակնհայտ է, որ Հայաստանի հավաքականը չի գլխավորի բարձրակարգ մասնագետ, քանզի Ռուբեն Հայրապետյանը ամենևին չի պատրաստվում լուրջ գումարներ ներդնել: Ժամանակին ներկայիս «Յուվենտուսի» գլխավոր մարզիչ Մասիլիլիանո Ալեգրին տարեկան 1 միլիոն դոլարով պատրաստ է եղել գլխավորել մեր հավաքականը, սակայն Հայրապետյանը նման շռայլություն թույլ չի տվել:
«Առաջին լրատվական»-ի տեղեկություններով՝ Հայաստանի հավաքականի բոլոր մարզիչներից Հայրապետյանն ամենաբարձր աշխատավարձը տվել է Արթուր Պետրոսյանին: Վերջինս ամսական ստացել է 15 հազար ԱՄՆ դոլար: Նման չափի աշխատավարձով այսօր ուղղակի անհնար է գտնել բարձրակարգ մասնագետի: Հետևաբար ազգային թիմի արտասահմանցի գլխավոր մարզչին վստահելը պետք է բացառել: Ավելին արտասահմանցի իրեն քիչ թե շատ հարգող որևէ մասնագետ ուղղակի չի աշխատի Հայրապետյանի ցուցակով:
Մեր երկրում կա թերևս մեկ մասնագետ ով արժանի է գլավորել մեր հավաքականը: Խոսքը Աբրահամ Խաշմանյանի մասին է, որին Հայրապետյանը մեղմ ասած չի համակրում: Ու թեև երկրպագուների հիմնական մասը ցանկանում է Խաշմանյանին տեսնել Արթուր Պետրոսյանի փոխարեն, այնուամենայնիվ այս մասնագետի տարբերակը ևս պետք է բացառել: Տարբերակները ինչ խոսք շատ են, բայց արդեն այսօր 90 տոկոսով պարզ դարձավ, որ Հայաստանի հավաքականը գլխավորելու է Արմեն Գյուլբուդաղյանցը: Վերջին շրջանում Ռուբեն Հայրապետյանը շարունակ գովեստի խոսքեր էր հնչեցնում այս մասնագետի հասցեին: Իսկ այսօր Հայրապետյանն այցելել է Հայաստանի բարձրագույն խմբի առաջնության 22-րդ տուրի «Փյունիկ»-«Գանձասար-Կապան» հանդիպմանը ու հանդիպել Գյուլբուդաղյանցին: Կարծում ենք ամեն ինչ պարզ է: Գյուլբուդաղյանցի գլխավորությամբ հայկական շատ թիմեր տպավորիչ արդյունքներ են ցույց տվել:
Գլուբուդաղյանցը բազմիցս վերապատրաստվել է եվրոպական գրանդ ակումբներում: Հատկապես տակտիկական տեսանկյունից այս մասնագետը բավական լավ է պատրաստված և շարունակ աշխատում է վարպետությունը բարելավելու համար: Նշենք սակայն, որ միջազգային ասպարեզում Գյուլբուդաղյանցի գլխավորած թիմերն ու տարբեր տարիքային հավաքականները լուրջ հաջողությունների չեն հասել: Թե որքանով է ճիշտ Գյուլբուդաղյանցի տարբերակն այս պահին՝ դժվար է ասել: Ի տաբերություն Արթուր Պետրոսյանի, Գյուլբուդաղյանցը շատ ավելի լուրջ «շկոլա» է անցել և անհամեմատ ավելի փորձառու է:
Հուսանք, որ գլխավորելով Հայաստանի ազգային հավաքականը՝ Գյուլբուդաղյանցը կառաջադրի իր պայմաններն ու պահանջները և չի աշխատի Ռուբեն Հայրապետյանի ցուցակով: Միայն այս դեպքում Հայաստանի ազգային հավաքականը կարող է լուրջ հաջողության հասնել Ազգերի լիգայի խաղարկությունում:
Տեսանյութը՝ «ֆուտբոլ+»-ի