Երևանի քաղաքապետին ակցիայի մասնակիցները կնոջ զգեստ էին բերել
Մի ձեռքին ավել, մյուսին՝ կախիչով զգեստ քաղաքապետարանի շենքին մոտեցավ ավագանու նախկին անդամ Սոնա Աղեկյանը։ Նրա հետ էին ևս մի քանի քաղաքացի։ Քաղաքապետարանի շենքի աստիճաններից հենց առաջինի մոտ 5 քաղաքացու դիմավորեցին 5 ոստիկաններ, շենքին մոտենալ թույլ չտվեցին։
Աղեկյանն ասաց, իրենց ակցիան փորձում են խոչընդոտել, քանի որ քաղաքային իշխանության ներկայացուցիչները սարսափած են։
«Այսօր այստեղ հավաքվել ենք, որպեսզի ցույց տանք, որ քաղաքային իշխանությունը ոչ միայն չի աշխատում, խաբել է, ձախողել է աշխատանքը, այլև չի աշխատում քաղաքացիների հետ, արհամարհում է նրանց»,-ասաց Աղեկյանն ու ցույց տվեց ձեռքի թղթի կտորը։
Հիշեցրեց, քաղաքապետի թեկնածու Հայկ Մարությանը խոստացել էր նախ և առաջ քաղաքը մաքրել աղբից, սակայն այս պահին էլ քաղաքում գարշահոտություն է տիրում։ Ասաց, երբ առաջին անգամ նույն վայրում բարձրաձայնել են, քաղաքապետն իրենց լսելու փոխարեն, ջայլամի քաղաքականություն են վարել, իրենց հետ չի հանդիպել, իրենց նկատմամբ էլ «կեղծ քրեական գործ են կարել»։
«Դրանից հետո մենք խոսեցինք վերելակների մասին, խոսում ենք հանրային տրանսպորտի, կանաչատման, կառուցապատման ու բարեկարգման իսպառ բացակայության մասին։ Սրան էլ գումարվում է Երևանի քաղաքապետի անգործությունն ու արհամարհանքը դեպի երևանցիները»,-ասաց Աղեկյանը։
Նա մանրամասնեց, Մարությանին տեսաուղերձով հարցեր են ուղարկել։
«Պատասխանները վախեցավ տրամադրել, որովհետև չուներ այդքան համարձակություն։ Դրանից հետո դիմումով ուղիղ եթերում քաղաքապետին ուղղված հարցեր հնչեցրեցինք»,-ասաց Աղեկյանը՝ ներկայացնելով հարցերից մի քանիսը, երբ մեղադրում եք քաղաքային նախկին իշխանություններին, ինչո՞ւ դատական հայցեր չկան նրանց նկատմամբ, խնչող խոսնակին, ով «խնչած ունի» քաղաքացիների կարծիքի վրա, գրավոր նկատողություն տրվե՞լ է, կոմունալի վարչության պետին, ով ձախողել է Երևանի մաքրությունը, 800 հազար դրամից ավելի պարգևավճար է տրամադրվել, ինչո՞ւ։
Նրա խոսքով, հուլիսի 22-ից ի վեր այս հարցերին ի պատասխան քար լռություն է, մինչդեռ խոստացել էին հինգ օրվա ընթացքում պատասխանել։
«Այստեղ փաստում ենք, որ քաղաքապետն ու ավագանին ձախողել են»,-նշեց նա՝ ավելացնելով, եթե քաղաքապետն ունի համաձակություն, քաղաքական կամք, թող իջնի կամ էլ որևէ մեկին լիազորի դա անել։
Լրագրողների հարցերին ի պատասխան, թե ի՞նչ խորհուրդ ունի Աղեկյանի ձեռքին գտնվող զգեստը, որի ձախ ուսին մեծ ծաղիկ է ամրացված, նա մանրամասնեց.
«Այն պաշտոնյաները, ովքեր խաբում են, պետք է պատասխանատվության կանչվեն։ Սիմվոլիկ ձևով պարոն քաղաքապետին մենք զգուշացնում ենք, որ խաբելու համար ինքը և իրավական տիրույթում է պատասխանատվության ենթարկվելու, մենք այժմ հայցեր ենք պատրաստում նրա դեմ, և հագնելու է կանացի զգեստ ու շրջելու է Երևան քաղաքում՝ այն պատճառով, որ ստորաբար ու նենգաբար խաղացել է մարդկանց զգացմունքների հետ, դյուրահավատության հետ, ստանձնել է պաշտոնը ու չի կատարել որևէ խոստում։ Մենք գիտենք, որ քաղաքապետի մասնագիտական ունակությունները թույլ են տալիս, որ նա այս զգեստն հագնի ու դրա մեջ հարմար զգա, բայց ամեն դեպքում որպես պատիժ այս զգեստը պետք է հագնի ու շրջի Երևանում»։
Հարակից հրապարակումներ`
- Մարությանին այսօր հիշեցրել են նախընտրական խոստումը
- Քաղաքապետարանում աղբը չհանդուրժեցին, իսկ բնակիչներին հորդորում են ըմբռնումով մոտենալ