Այսօր Սևանի «Հարսնաքար» հյուրանոցային համալիրում տեղի ունեցավ Հայաստանի ֆուտբոլի ֆեդերացիայի 16-րդ ժողովը: Ժողով, որը խայտառակության տեսանկյունից բացառիկ կարելի է համարել: Ժողովի ժամանակ քննարկման դրվեց «Շիրակ», «Միկա», «Ուլիս», «Արմավիր», «Ֆուրման Աբրահամյան», «Հայ-Արի», «Էսթեղլալ Կոտայք», «Զվարթնոց ՀԱՈւ» ֆուտբոլային ակումբների հեռացումը ՀՖՖ անդամությունից: Ժողովի մասնակից անդամները միաձայն կողմ քվեարկեցին նշված ակումբների անդամությունից զրկելուն: ՀՖՖ-ի տարեկան ժողովի օրակարգային հարցերից է եղել նաև 12 նոր կազմակերպության անդամությունը Հայաստանի ֆուտբոլի ֆեդերացիային: Արդյունքում, քվեարկությանը մասնակցած պատվիրակները դարձյալ միաձայն որոշմամբ հաստատել են այդ կազմակերպությունների անդամությունը ՀՖՖ-ին:
Այսպիսով, ՀՖՖ-ի անդամություն են ստացել «Գյումրու ֆուտբոլի ակադեմիա» ՓԲԸ-ն, «Տեխնիկական կենտրոն ակադեմիա» ՓԲԸ-ն, «Վ. Սարգսյանի անան Հանրապետական մարզադաշտ» ՓԲԸ-ն, «ՖԱ Արարատ» ՀՁ ՓԲԸ-ն, «Նորացված Փյունիկ» ՖԱ ՀԿ-ն, «Հայկական ֆուտբոլի վետերանների և պատանի ֆուտբոլիստների համերաշխություն» ՀԿ-ն, «Էրեբունի սպորտային ակումբ» ՀԿ-ն, «Հայաստանի պրոֆեսիոնալ ֆուտբոլիստների ասոցիացիա» ՀԿ-ն, «ՖԱ Արցախ» ՀԿ-ն, «Արարատ-Արմենիա» ՖԱ ԲԲԸ-ն, «Հակական ֆուտբոլի զարգացման հիմնադրամը» և «Զվարթնոց ՖԱ» ՍՊԸ-ն: Արդեն անդրադադարձել էինք, որ Ռուբեն Հայրապետյանը առաջիկայում տեղի ունենալիք ընտրություններից առաջ մտադիր է ՀՖՖ-ի անդամությունից զրկել ոչ ցանկալի ակումբների և կազմակերպությունների, որոնք կարող են իրեն դեմք քվեարկել: ՀՖՖ-ի անդամ դարձած կազմակերպություններից հայտնի են թերևս «Արարատ-Արմենիան», «Արցախ» ՖԱ-ն և «Արարատ» ՖԱ-ն: Մեր տեղեկություններով՝ մյուս, բացառությամբ «Արարատի» ու «Արցախի» ակումբների, ՀՖՖ-ին անդամ դարձնելու նպատակը ընտրություններում Հայրապետյան Ռուբենի օգտին քվեարկելն է: Այսինքն, այս քայլով Հայրապետյանը կստանա հավելյալ 30 ձայն:
Նշենք, որ առաջիկա ընտրություններին օրեր առաջ անդրադարձել էր ՀՖՖ-ի վարչապետ Նիկոլ Փաշինյանը: «ՀՖՖ-ն հասարակական կազմակերպություն է, և ինչքան տեղյակ եմ, առաջիկայում լինելու են ֆուտբոլի ֆեդերացիայի նախագահի ընտրություններ: Հույս ունեմ՝ տեղի կունենա այնպիսի ընտրություն, որը կլինի ՀՖՖ անդամների ու երկրպագուների սրտով: Այդ հարցով պետք է զբաղվեն ֆուտբոլի ֆեդերացիայի կազմում գտնվող կազմակերպությունները, մարդիկ, որոնք մասնակցելու են այդ ընտրություններին»,- ասել էր Փաշինյանը:
Ներկայացված տեսանյութում ՀՖՖ-ի պատվիրակները քվեարկում են 8 ակումբներին անդամությունից զրկելու համար: ՀՖՖ-ի գործադիր տնօրենը շարունակ նշում է, որ 24 պատվիրակները միաձայն կողմ են քվեարկում: Տեսանյութում հստակ երևում է սակայն, որ 24-ի փոխարեն քվեարկում են միայն 17-ը: Ավելի ստույգ դահլիճի առաջին և երկրորդ շարքերում ՀՖՖ-ի գործկոմի անդամներն են, որոնք քվեարկության իրավունք չունեն: Մյուս շարքերում նստած անձինք պատվիրակներն են, որոնք 17-ն են: Մեր տեղեկություններով՝ ժողովի սկզբում 24 պատվիրակներ գրանցվել են, սակայն նրանցից 7-ը չեն մասնակցել ժողովին և հեռացել են: Այդ իսկ պատճառով Մինասյան Արմենը շարունակ նշում է 24 թիվը: Տեղի ունեցածը ոչ այլ ինչ է՝ քան խաբերություն: Եթե մեր հրապարակումը իրականությանը չի համապատասխանում, ապա պահանջում ենք, որ ՀՖՖ-ն հրապարակի քվեարկության իր տեսանյութը, որտեղ քվեարկում են 24 պատվիրակներ և ներկայացնի այդ պատվիրակների անունները:
Այս պահին կարող ենք ասել, որ ՀՖՖ-ի 16-րդ ժողովը, ոչ այլ ինչ էր՝ քան ֆարս: Նույնիսկ կեղծիքի մեծ վարպետ Հանրապետական կուսակցությունը նման ակնհայտ ստոր քայլերի չի գնացել: Ստացվում է, որ Նիկոլ Փաշինյանի հորդորը ՀՖՖ-ի անդամ կազմակերպություններին շատ արագ տեղ էր հասել: Ակումբները ուղղակի բոյկոտեցին Հայրապետյանի ժողովը: Քվեարկող անձանցից մեզ ծանոթ են թերևս «Փյունիկի» և «Լոռիի» ներկայացուցիչները: «Առաջին լրատվական»-ի տեղեկություններով ժողովին չի մասնակցել Հայաստանի բազմակի չեմպիոն «Ալաշկերտ» ֆուտբոլային ակումբը: Տեղի ունեցածը պահանջում է արագ արձագանք ոչ միայն հասարակության, այլև ՀՖՖ-ի իշխանությունների կողմից: Նման գործողությունները ոչ միայն ծանր հարված է հասարակությանը, այլևս մեր երկրի հեղինակությանը:
Նոր Հայաստանում ուղղակի չպետք է լինեն նման քվեարկություններ: Նամանավանդ, երբ խոսքը վերաբերվում է ֆուտբոլին, որը մոբիլիզացնող հզոր գործոն է: Ակնհայտ է, որ Հայրապետյանը ամեն գնով ցանկանում է վերարտադրվել ՀՖՖ նախագահի պաշտոնում: Հասարակության նպատակն է կանխելու հերթական ստոր դավադրությունը:
Տեսանյութը՝ shantnews.am–ի