Օրերս հայտնի դարձավ, որ ՀՀ քաղաքացիների կողմից մերժված ՀՀԿ-ն բանաձև է հեղինակել, որն ընդունվել է Կենտրոնամետ դեմոկրատների միջազգային միության Գործադիր կոմիտեի կողմից: Բանաձևում անդրադարձ է կատարվում Հայաստանի քաղաքական իրավիճակին, նշվում է. «Հայաստանում առկա են ժողովրդավարության և մամուլի ազատության հետ կապված խնդիրներ, դատական համակարգի քաղաքականացվածություն և ճնշումներ են իրականացվում Սահմանադրական դատարանի նախագահ Հրայր Թովմասյանի հանդեպ»:
Թեմայի շուրջ «Առաջին լրատվական»-ի հետ զրույցում քաղաքագետ Էդգար Վարդանյանն ընդգծեց, որ նախկին իշխանությունները և նրանց հետ կապ ունեցող բազմաթիվ սուբյեկտներ ինֆորմացիոն պատերազմ են հայտարարել գործող իշխանության դեմ. «Նրանք ունեն լրատվամիջոցներ, ունեն քաղաքական ուժի կարգավիճակ, անդամակցում են ինչ-որ միությունների և յուրաքանչյուր հարթակ օգտագործում են, որպեսզի հարվածեն կառավարող ուժին, հեղափոխությանը և հեղափոխության արժեքներին»: Մինչդեռ հենց ՀՀԿ-ն է եղել հակաժողովրդավարական ուժ, և ժողովուրդը, քաղաքագետի դիտարկմամբ, դուրս է եկել պայքարի և նրանց մերժել է այն պատճառով, որ մարդկանց համար անընդունելի է եղել անարդար, հակասահմանադրական, ավտորիտար քաղաքական ռեժիմը:
Անդրադառնալով նախկին իշխանությունների քայլերին և անպատժելի կերպով շարունակվող գործունեությանը, վերլուծաբան Աղասի Մարգարյանն ընդգծեց. «ՀՀԿ մի շարք գործիչներ որոշ դեպքերում պետական անվտանգության տեսանկյունից հատում են թույլատրելիության սահմանը՝ ատելության խոսք գեներացնելով»:
Անդրադառնալով ԱԽ քարտուղար Արմեն Գրիգորյանի հայտարարությանը, թե ողջամիտ կասկածներ կան, որ ՀՀ-ում հեղաշրջում էր նախապատրաստվում, որի փորձը կանխվել է, Էդգար Վարդանյանը նշեց. «Հեղաշրջումը լայն հասկացություն է… Եթե նման փորձ եղել է, պետք է պարզաբանել՝ կոնկրետ ինչի մասին է խոսքը»:
«Հեղաշրջումը կամ հեղաշրջման փորձը իրավական տեսանկյունից լուրջ հանցագործություն է՝ վտանգավոր հետևանքներով ու լուրջ մեղադրանքներով, բայց հեղաշրջում տերմինն ունի նաև քաղաքական իմաստ,- նկատեց Աղասի Մարգարյանը: – Հետևելով դաշտին՝ ցանկացած փորձագետ կարող է արձանագրել, որ տևական ժամանակ հայաստանյան տեղեկատվական և ներքաղաքական կյանքում կար միտում ստեղծելու այնպիսի քաղաքական իրավիճակ, որի հանգուցալուծումը կարող էր լինել իշխանության փոփոխությունը՝ ընդհուպ մինչև վարչապետի փոփոխությունը. ուղղորդված, անձնավորված և համակարգված քարոզչություն էր իրականացվում»:
Հ.Գ. հարցազրույցը տեղի է ունեցել մինչև վարչապետ Նիկոլ Փաշինյանի մամուլի ասուլիսը:
Մանրամասն՝ տեսանյութում: