ՀՀ Անվտանգության խորհրդի քարտուղար Արմեն Գրիգորյանի պնդմամբ՝ Հայաստանում հակահեղափոխության մի քանի փորձ է եղել, «սակայն հակահեղափոխության ողնաշարը ջարդված է»: «Առաջին լրատվական»-ի հետ զրույցում անդրադառնալով այս դիտարկմանը՝ քաղաքագետ, «Ժողովրադարական համախմբում» նախաձեռնության համահիմնադիր Սուրեն Պետրոսյանը նշեց, որ հեղաշրջման փորձերը չափազանց վտանգավոր օրակարգ են Հայաստանի համար: «Երկու տարի հետո հեղափոխության-հակահեղափոխության մասին խոսելը վկայում է պետության արդիականացման ռազմավարության բացակայության մասին»:
«Մենք պետք է ուենանք հստակ ռազմավարություն, զարգացման տեսլական, հստակ գաղափարներ, սակայն դրանք փոխարինում ենք անընդհատ անցյալի հետ կռիվ տալով, սա որևիցե լավ տեղ չի կարող տանել»,- ընդգծեց Ս. Պետրոսյանը:
Սարո Սարոյանի խոսքով՝ նախկին հանցավոր վարչախմբի այս կամ այն ներկայացուցիչները, որքան էլ ռեսուրսներ ունենան, չեն կարող ձեռնոց նետել իշխանությանը և կրկին իշխանության գալ: «Դա քաղաքական նոնսենս կլինի: Ո՛չ այդպիսի հանրային պահանջ կա, ո՛չ հանրային տրամադրություններն են այդպիսին: Ֆինանսները երանգ փոխում են, բայց միայն ֆինանսներով հնարավոր չէ հակահեղափոխություն անել»: Քաղաքագետի դիտարկմամբ՝ խնդիրն այն է, որ հեղափոխական կառավարությունն այսօր, ըստ էության, իր հայտարարած կատեգորիաների թելը կորցրել է. «Տնտեսական հեղափոխության պատկերը քաղաքացիների մոտ չի ձևավորվում, վեթինգի, անցումային արդարադատության մասին մոռացվել է: Եվ մարդիկ սկսում են ճշմատրության և կեղծիքի հարցը բարձրացնել»:
Քննարկման մասնակիցների դիտարկմամբ՝ այսօր հայտնվել ենք հեղափոխության և հակահեղափոխության արանքում: Անդրադառնալով հարցին, թե Հայաստանում տեղի ունեցող զարգացումները որքանով են տեղավորվում հիբրիդային պատերազմների տրամաբանության մեջ՝ Ս. Պետրոսյանը նշեց. «Շատ վտանգավոր է ներքին քաղաքականության շրջանակներում կիրառել «հիբրիդային պատերազմ» եզրույթը. ով ում դեմ և ինչի համար է պատերազմում… Իշխանության համար պայքարելը բնական է. դա քաղաքական գործընթացի անբաժանելի մաս է: Մեր խնդիրն այն է, որ մենք չենք կարողանում երկխոսել»:
Մանրամասն՝ տեսանյութում:
