«Քարոզարշավի ընթացքում ատելությունը և թշնամանքը այնպիսի մեծության կհասնեն, որ կարող է բախումներ լինել»
«Սահմանադրական հանրաքվեն ոչ պետականամետ, հակաօրինական է»,- այսօր լրագրողների հետ զրույցում նշեց ԱԺ նախկին պատգամավոր Կարինե Աճեմյանը։
Վերջինիս խոսքով, որևէ պատճառ չկա իրավաբանների և փաստաբանների մեծ բանակին չհավատալու. «Որևէ պատճառ չունենք այդ դիլետանտների խմբակին հավատալու, որոնք միայն մեկ նպատակ ունեն իրենց ղեկավարի հետ միասին՝ վերացնել սահմանադրական կարգը, վերացնել այս դատարանը, մարդկանց փոխարինել իրենց ուզած թեկնածուներով։ Սա իրականում հակապետական և հակասահմանադրական քայլ է, որը մեզ ոչ մի լավ տեղ չի տանելու»։
Ըստ Աճեմյանի, իշխանությունն արդեն իսկ խախտել է հանրաքվեի մասին օրենքը, և անցել քարոզարշավի։ Ըստ նրա, իշխանությունն իր տարերքի մեջ է, այն առումով, որ իրենցը հայհոյանքներն են, անեծքներն ու այդ տիրույթում իրենք որևէ մրցակից չունեն, չեն կարող ունենալ։
«Այն բոլոր ուժերը, որոնք լինելու են այս ամենի կողքին, մեղսակից են լինելու, որովհետև ժամանակը գալու է, պարզ է լինելու՝ սա հակաօրինական հանրաքվե է։ Այն պարագայում, երբ չեն վճարվում մի շարք կրթական և մշակութային օջախների փոքրիկ աշխատավարձերը, իրենք՝ ԱԺ-ն և քաղաքապետարանը հենց այսօր էլ պարգևավճարներ են ստանում։ Էս իրավիճակում, իհարկե, հանրաքվեն մի գործընթաց է, որ Նիկոլ Փաշինյանը էլի իր սիրած վայրում կգտնվի՝ փողոցում, կբղավեն, իրենց ամբողջ թշնամանքը և ատելությունը նորից կգեներացնեն։ Ի դեպ, միջազգային հեղինակության առումով այս ամենը մեր երկրի համար շատ վտանգավոր է»,- ասաց Աճեմյանը։
Նա մեջբերեց ՀՀ ում ՍԴ հարցի շուրջ Վենետիկի հանձնաժողովի քարտուղար Ջաննի Բուքիքոյի հայտարարությունից մի հատված, ըստ որի՝ ժողովրդավարական մշակույթը և հասունությունը պահանջում են ինստիտուցիոնալ զսպվածություն, ինչը, ըստ Աճեմյանի, որևէ կապ չունի իշխող խմբակի հետ, որովհետև իրենք համարում են, որ անքննելի են, իրենց որևէ արարք չի կարելի քննարկել կամ քննադատել։
«Իրավական շատ լուրջ փաթեթ է ներկայացրել ԱԺ-ին մի մարդ, ով ընդհանրապես իրավաբանական կրթություն չունի։ Այնպիսի մի վարակ է տարածվել Նիկոլ Փաշինյանից դեպի իր խումբ, և նաև ժողովրդի այն հատվածի վրա, որը դժգոհություններ ունի։ Հարգելի՛ ընկերներ, ԿԸՀ նախագահ Տիգրան Մուկուչյանը հայտարարել է, որ 4000-ից ավելի լիցենզիա ունեցողները, այսինքն՝ մարդիկ, ովքեր հանձնաժողովում աշխատելու իրավունք ունեն, նախկիններ են, և հնարավոր է՝ այս ամենը մտահոգություններ առաջացնի։ Ոչ միայն Մուկուչյանին, այլև ողջ ԿԸՀ կազմը ընտրել ենք մենք, և եթե նրանք կեղծել են ընտրությունները, Փաշինյանը պետք է նրանց հետ չաշխատեր»,- ասաց Աճեմյանը։
Նախկին պատգամավորը հստակեցրեց՝ ամենակարևորն այն է, որ քարոզարշավի ընթացքում ատելությունը և թշնամանքը այնպիսի մեծության կհասնի, որ կարող են բախումներ լինել։ Եվ քաղաքական ուժերը, որոնք հասկանում են՝ ինչ է կատարվում, ըստ Աճեմյանի, պետք է մեղսակից չլինեն այս անօրինականությանը։
«Ադեկվադ» միաբանության անդամ Լիլիթ Թումանյանն էլ նշեց, որ սահմանադրական փոփոխությունների գործընթացը բացարձակապես իրավական չէ։ Այն պարզապես քաղաքական պրոցես է։
«Մենք գործընթացին պետք է տանք քաղաքական գնահատականներ, ոչ թե իրավական։ Քաղաքական գնահատականների տեսանկյունից էլ բազմիցս ասել ենք, որ սա պրոցես է, որը կազմաքանդում է պետության հիմքերը՝ որպես ժողովրդավար պետություն։ Մենք տեսնում ենք իշխանությն տարբեր ճյուղերի սերտաճում և կենտրոնացում մեկ անձի և մեկ քաղաքական իշխող ուժի ձեռքում։ Մենք տեսնում ենք ժողովրդավարական հիմունքների վերացում և օրինականության հիմքերի վերացում։ Դա նշանակում է, որ այսուհետ՝ այս տխրահռչակ հանրաքվեն անցկացնելուց հետո մենք հնարավորություն չունենանք միջազգային հանրության համար հանդիսանալ որպես ժողովրդավարական, օրինական պետություն։ Հենց դրանում են քաղաքական հետևանքները»,- նշեց Թումանյանը։
Նա հարցադրում արեց՝ արդյոք մենք պատրաստ ենք զրկվել միջազգային կառույցներում ձայնի իրավունքից, և կրել դրա տնտեսական հետևանքները. «Քաղաքականապես չճանաչված պետությունն աստիճանաբար կզրկվի իր բոլոր տեսակի ձայներից, անդամակցությունից միջազգային կառույցներում, ինչպես նաև կզրկվի միջազգային տրանշերից, տնտեսական ներդրումներից և այլն»։
Թումանյանը նշեց, որ հանրաքվեի համար հատկացված գումարը, եթե իսկապես 7 միլիոն դոլար է լինելու, ապա դրանով կարելի էր գնել օրինակ 500 բնակարան Գյումրիում։
«Այդ գումարով կարելի է գնել 14 մլն փամփուշտ, չեմ ասում զինվորի հացի մասին։ Հիմա հարց եմ տալիս՝ ով է զինվորի հացը ուտում, ով է մարդկանց բարեկեցության հաշվին վերաձևում ՍԴ-ն՝ սեփական քիմքին հաճելի դարձնելու համար։ Ժողովուրդ, պատրա՞ստ եք արդյոք քվեարկել, եթե քվեաթերթիկում գրված լինի՝ համաձա՞յն եք, որ Փաշինյանը իր կամքով, իր տրամադրությունից ելնելով, նշանակի ՍԴ նախագահ և դատավորներ, հետո, եթե ընդհանրություն չգտան, փոխեփոխ անի, երբ և ինչքան կուզենա։ Եվ ամեն նոր եկող իշխանություն, երբ կամենա փոփոխի Սահմանադրություն, ՍԴ կազմ։ Եվ համաձա՞յն եք, որ նախկինում եղած որևէ օրինազանցություն շտկելու համար կատարվեն նոր օրինախախտումներ»,- նշեց Թումանյանը։
Վերջինս վստահեցրեց, որ իշխանությունը, ապացուցելով, որ ՍԴ կազմը փոխելն է երկրի փրկությունը, լուծում է սեփական անձնային շահերը։
«Այսօր ժողովրդավարությունն ուզում են հակադրել իրավականությունը, դա նոնսենս է, չկա նման բան։ Մենք տեսնում ենք, որ տեղի են ունենում բազմաթիվ բաներ, որոնք բացարձակապես չեն տեղավորվում տրամաբանության մեջ, չեն տեղավորվում օրինականության մեջ։ Դրանք տեղավորվում են միայն մի բանի մեջ՝ այդպես ուզում է Նիկոլ Փաշինյանը»,- եզրափակեց խոսքը Լիլիթ Թումանյանը։
Հարակից հրապարակումներ`
- Մարուքյան. «Ոչ»-ի ճակատ ձևավորել նշանակում է իշխանությանը շանս տալ շարունակել գեներացնել ատելություն
- ԲՀԿ-ն քաղխորհրդի նիստ է հրավիրելու՝ որոշելու «այո»-ի ճամբարում է լինելու, թե «ոչ»-ի. Ծառուկյան
- 88 կողմ, 15 դեմ. Սահմանադրական փոփոխությունները կդրվեն հանրաքվեի