Հատուկ քննչական ծառայությունում քննվող`Կամո Փիրուզյանին սպանելու փաստի առթիվ հարուցված քրեական գործի նախաքննության ընթացքում Ալավերդի քաղաքի բնակիչ Վահագն Աբգարյանի ղեկավարած հանցավոր համագործակցության օգտին գործողություններ կատարելու մեղադրանքով կալանավորված Լոռու մարզի Քննչական վարչության նախկին պետ Թաթուլ Շուշանյանը ազատ է արձակվել գրավի դիմաց։ Դատախազը վերաքննիչ բողոք է ներկայացրել գրավի կիրառումը անթույլատրելի ճանաչելու պահանջով:
Այս մասին ֆեյսբուքյան իր էջում գրել է ՀՀ գլխավոր դատախազի լրատվամիջոցների գծով խորհրդական Գոռ Աբրահամյանը:
Նա, մասնավորապես, գրել է.
«Մայիսի 30-ին Երեւան քաղաքի ընդհանուր իրավասության դատարանը, բավարարելով ՀՀ ՔԿ Լոռու մարզային քննչական վարչության նախկին պետ, առանձնապես խոշոր չափերով կաշառք ստանալու եւ պաշտոնական լիազորությունները չարաշահելու համար մեղադրվող Թաթուլ Շուշանյանի պաշտպանի միջնորդությունը, որոշում էր կայացրել նրա նկատմամբ որպես խափանման միջոց ընտրված կալանավորումը այլընտրանքային խափանման միջոց գրավով փոխարինելու մասին՝ գրավի գումար սահմանելով 5 մլն դրամը:
Հունիսի 1-ին տվյալ քրեական գործի նախաքննության օրինականության նկատմամբ հսկողություն իրականացնող դատախազի կողմից դատարանի հիշյալ որոշման դեմ բերվել է վերաքննիչ բողոք՝ գրավի կիրառումը անթույլատրելի ճանաչելու պահանջով»: