ԵՐԵՎԱՆ, 12 ՀՈՒՆՎԱՐԻ, ԱՐՄԵՆՊՐԵՍ: Հայաստանի շախմատի տղամարդկանց առաջնության գլխավոր մրցավար Աշոտ Վարդապետյանը մեծ սպասելիքներ ունի մեկնարկող մրցաշարից:

«Ինչպես միշտ, այս տարի ևս, հետաքրքիր և դիտարժան մրցաշարի ակնկալիքներ ունեմ: Այս տարի առաջին անգամ մրցաշարն ուղիղ հեռարձակմամբ կլինի շախմատի ֆեդերացիայի Youtube-յան ալիքում և այն կմեկնաբանի Եվրոպայի 2021 թվականի անհատական առաջնության չեմպիոն Էլինա Դանիելյանը»,-«Արմենպրես»-ի հետ զրույցում այս մասին ասաց առաջնության գլխավոր մրցավարը: Վերջինս շեշտեց, որ մրցաշարը հնարավորություն կտա հասկանալու, թե ինչ մարզավիճակում են հայ առաջատար գրոսմայստերները:

Տղամարդկանց 82-րդ առաջնությանն այս տարի մասնակցում են` Սամվել Տեր-Սահակյանը, Շանթ Սարգսյանը, Հայկ Մարտիրոսյանը, Մանուէլ Պետրոսյանը, Արման Փաշիկյանը, Հովհաննես Գաբուզյանը, Զավեն Անդրիասյանը, Տիգրան Պետրոսյանը, Տիգրան Հարությունյանը, Արման Միքայելյանը, Դավիթ Շահինյանը և Մամիկոն Ղարիբյանը:

Կանանց 77-րդ առաջնությանը չեմպիոնության համար կպայքարեն` Մարիամ Մկրտչյանը, Սուսաննա Գաբոյանը, Մարիա Գևորգյանը, Աննա Խաչատրյանը, Աստղիկ Հակոբյանը, Ասյա Եդիգարյանը, Մարիամ Ավետիսյանը, Վերոնիկա Խաչատրյանը, Նարինե Գասպարյանը, Նարե Առաքելյանը:

Առաջնությանը հիմնական մասը կմեկնարկի հունվարի 12-ին և կեզրափակվի հունվարի 23-ին: