Խցանում Սեբաստիա-Լենինգրադյան խաչմերուկում
Երևանի Սեբաստիա-Լենինգրադյան փողոցների խաչմերուկում կոյուղագծի դիտահորի խցանման մասին «Վեոլիա ջուր» ընկերությունը ահազանգ էր ստացել շուրջ 7 օր առաջ: Այս մասին հայտնում են ընկերության մամուլի ծառայությունից։
«Ոչ մետաղալարով, ոչ հատուկ փչող տեխնիկայով՝ երկու կողմից խցանումը բացել չէր հաջողվել: Դուրս հոսող ցեխաջուրը վկայում էր. խորհրդային տարիներին կառուցված կոյուղագիծն կոտրվել էր, թերևս այս բանուկ փողոցով անցնող բեռնատարների ծանրության տակ: Ինչպես հետո պարզվեց՝ միանգամից երեք տեղից: Կոյուղատարը լցվել - փակվել էր հողով ու ապարներով: Այստեղից էլ խցանումը: Երեկվանից խաչմերուկում աշխատում է «Վեոլիա Ջուր» ընկերության «Արևմուտք» տարածաշրջանային տնօրինության «Մաշտոց» տեղամասի շինարարական տեխնիկան ու մասնագետները: Գործի ամենադժվար մասն արդեն հետևում է մնացել: Երկու էքսկավատոր նախ «մուրճով» քանդել են ասֆալտե հարգանքի արժանի հաստության ծածկը՝ առնվազն 20 սմ, այնուհետև սկսել են հողային աշխատանքները: Այսօր արդեն մեկ էքսկավատոր էր աշխատում: Բռնել էր «իզը» ու խրամուղի էր բացում:
Տեղամասի գլխավոր ճարտարագետ Հրանտ Դանիելյանն ասում է, որ հիմա վնասված 35 մետրանոց հատվածում՝ առաջին դիտահորից մինչև երկրորդ դիտահոր, կոյուղատար խողովակը փոխարինվում է նորով: Աշխատանքի արագ ավարտին առաջացած լրացուցիչ խնդիրներն են խանգարում: Տարածքում հայտնաբերվել է «գոյություն չունեցող» գազատար (լավ է՝ չգործող), ինչպես նաև Բիլայնի կորած դիտահոր՝ մոտ 40 սանտիմետր խորության վրա: Դրանից դուրս է գալիս մոտ 15 մալուխ, որը լուրջ խոչնդոտում է գործին: Տեխնիկա հնարավոր չէ այստեղ մտցնել, տղաները ձեռքով են աշխատում, որ հատվածն անցնեն:
Ըստ Հրանտ Դանիելյանի՝ հին կոյուղագիծ վերանորոգելն այլևս իմաստ չուներ: Այստեղ փաստորեն նոր կոյուղի է կառուցվում: Ասենք նաև, որ կոյուղագծից բացի, խնդրի լուծման նպատակով կառուցվելու է 2 նոր դիտահոր, իսկ մեկն էլ վերակառուցվելու է:
Այս տրանսպորտային հանգույցը կարևորագույններից մեկն է Երևաւնում: Դրա համար էլ նպատակ է դրվել, չնայած խոչնդոտներին, առաջիկա 2-3 օրերին ավարտել կոյուղագծի շինարարությունը: Ասֆալտապատումն էլ կարվի մոտ 5 օրից: Խաչմերուկը կբարեկարգվի ու կգործի սովորական աշխատանքային ռեժիմով»,-նշված է հաղորդագրության մեջ:
Լրահոս
Տեսանյութեր
Արդյո՞ք սա սահմանազատում է, թե՞ ճնշման տակ ինչ-որ բան տալ. Սերժ Սարգսյան
