Հուլիսի 26-ին կմեկնարկի ֆուտբոլի Եվրոպա լիգայի խաղարկության որակավորման երկրորդ փուլը: Երրորդ փուլի ուղեգրի համար հայկական թիմերից կպայքարեն «Փյունիկն» ու «Ալաշկերտը»: Վերջինս պայքարը սկսել էր Չեմպիոնների լիգայի խաղարկության որակավորման առաջին փուլից, սակայն երկու հանդիպումների արդյունքում զիջելով շոտլանդական «Սելթիկին»՝ պայքարից դուրս էր մնացել և հայտնվել Եվրոպա լիգայում:
Հիշեցնենք, որ հուլիսի 26-ին «Փյունիկը» հյուրընկալվելու է ղազախական «Տոբոլին», իսկ «Ալաշկերտը»՝ Մոնտենեգրոյի «Սուտյեսկային»: Վերջինս Մոնտենեգրոյի չեմպիոնն է և Եվրոպա լիգայում հայտնվել է Չեմպիոնների լիգայի խաղարկությունից: «Ալաշկերտի» մրցակիցը որակավորման առաջին փուլում երկու հանդիպումների արդյունքում 3:0 հաշվով զիջել էր Ղազախստանի չեմպիոն «Աստանային»: Շատերը կարծում են, որ «Սուտյեսկան» հեշտ մրցակից է «Ալաշկերտի» համար, և որ ՀՖՖ-ի կողմից Հայաստանի չեմպիոն հռչակված թիմը կարող է պատմություն կերտել և հայտնվել Եվրոպա լիգայի խաղարկության որակավորման երրորդ փուլում: Հիշեցնենք նաև, որ հայկական թիմերից ոչ մեկին երբևէ չի հաջողվել եվրագավաթների խաղարկությունում հաղթահարել որակավորման երկու փուլի արգելք:
«Սելթիկի» դեմ «Ալաշկերտի» ցուցադրած խաղը, կարծում ենք, մեկնաբանության կարիք չունի: Վարուժան Սուքիասյանի գլխավորած թիմից ավելին սպասել ուղղակի չէր կարելի: Եվ ընդհանրապես՝ Սուքիասյանի մարզչական փիլիսոփայությունը հասկանալու համար գերմարդկային հատկություններ են հարկավոր, որը, ցավոք, չունենք:
Անդրադառնանք թերևս մեկ նյուանսի. խոսքը Չեմպիոնների լիգայի խաղարկությունից առաջ «Ալաշկերտը» համալրած լեգեոներների մասին է: «Սելթիկի» հետ Երևանում կայացած հանդիպմանը հաջորդած մամուլի ասուլիսի ժամանակ լրագրողներից մեկը Սուքիասյանին հարցրել էր՝ թիմի լեգեոներներին Դո՞ւք եք ընտրել, օրինակ՝ Սեսար Ռոմերոյին. թե՞ սելեկցիոներները: «Եթե խելացի հարց տայիր, կպատասխանեի. ինչպե՞ս կարող էի չիմանալ, ցտեսություն»,- ասել էր Սուքիասյանը:
Բանն այն է, որ «Ալաշկերտի» լեգեոներները «Սելթիկի» հետ թե՛ առաջին և թե՛ պատասխան խաղում թերհաս ֆուտբոլիստների տպավորություն թողեցին: Թե՛ երկրպագուների և թե՛ լրագրողների մեջ բնականաբար հարց էր ծագել՝ ո՞վ է նրանց հրավիրել: Լրագրողին բավական կոպիտ պատասխան տալով՝ Սուքիասյանը հեռացել էր ասուլիսի սրահից: Ի դեպ, «Սելթիկի» հետ պատասխան հանդիպման նախախաղային ասուլիսին էլ շոտլանդացի գեթ մեկ լրագրող չէր ներկայացել: Նման ֆուտբոլիստների ընտրությունը կրկին վկայում է «Ալաշկերտի» մարզչի «փառահեղ» լինելու մասին:
Մինչև Սուքիասյանի գալը՝ «Ալաշկերտն» իսկապես ամուր թիմ էր: Եթե այս թիմը շարունակեր գլխավորել Աբրահամ Խաշմանյանը, կարծում ենք՝ «Սուտյեսկային» հաղթելու հավանականությունը անհամեմատ ավելի մեծ ու իրատեսական կլիներ:
Ինչևէ, եվրագավաթների խաղարկություններում պատմական արդյունք գրանցելու իրական հնարավորություններ ունի Երևանի «Փյունիկը»: Եվրոպա լիգայի խաղարկությանն ընդառաջ կանգնելով բավական լուրջ խնդիրների առաջ՝ մեր թիմը համոզիչ հաշվով պայքարից դուրս է թողել մակեդոնական «Վարդարին», որը նախորդ տարի ելույթ էր ունեցել հեղինակավոր մրցաշարի խմբային փուլում: Ինչպես «Ալաշկերտը», այնպես էր «Փյունիկը» եվրագավաթների խաղարկությունից առաջ համալրումներ ունեցավ: Ի տարբերություն «Ալաշկերտի» լեգեոներների՝ «Փյունիկ» հրավիրվածները պրոֆեսիոնալ ֆուտբոլիստներ են, որոնք զգալիորեն ուժեղացրել են երևանյան ակումբը՝ լրացնելով բացերը:
«Փյունիկն» ունի պրոֆեսիոնալ գլխավոր մարզիչ՝ ի դեմս Անդրեյ Տալալաևի, որը կարճ ժամանակում հասցրել էր պատկերացում կազմել թիմի ուժեղ և թույլ կողմերի վերաբերյալ: Ըստ այդմ՝ Տալալաևն ընտրել էր այնպիսի կադրեր, որոնք կարող են օգնել թիմին: Ընդունենք, որ Տալալաևի և Սուքիասյան Վարուժանի ընտրած լեգեոներների միջև սար ու ձորի տարբերություն կա: «Վարդարի» նկատմամբ տարած հաղթանակը, կարծում ենք, վստահություն կհաղորդի «Փյունիկի» ֆուտբոլիստներին:
Նշենք, որ մեր թիմից հիմնական կազմի միանգամից 7-8 ֆուտբոլիստներ տարբեր պատճառներով չեն մասնակցել Եվրոպա լիգայի խաղարկության որակավորման առաջին փուլին: «Տոբոլը» որակավորման առաջին խաղում ընդհանուր 3:0 հաշվով առավելության էր հասել վրացական «Սատմտրեդիայի» նկատմամբ: Վերջինս իր կարգով զգալիորեն զիջում է «Վարդարին»: Ղազախական թիմը դավանում է պաշտպանողական, միևնույն ժամանակ՝ ուժային ֆուտբոլ:
«Հայկական ֆուտբոլում մեծ փոփոխություններ են կատարվում։ Իսկ մենք քայլ առ քայլ առաջ ենք գնում։ Ուրախ կլինեմ ևս մեկ քայլ անել։ Հաջորդ մրցակիցը ղազախական «Տոբոլն» է, որը խաղում է 5 պաշտպանով։ Պարզ է, որ նրանք զգուշավոր ֆուտբոլ են խաղալու»,- «Վարդարի» հետ խաղից առաջ ասել էր Տալալաևը:
Առաջիկա դիմակայությունում «Փյունիկի» գլխավոր զենքը արագաշարժ ֆուտբոլիստներն են ու տեխնիկապես գրագետ խաղը: «Փյունիկն» ունի Եվրոպա լիգայի խաղարկության որակավորման երրորդ փուլում հայտնվելու լավ հնարավորություն, և հուսանք, որ պատմական արդյունքն այնուամենայնիվ կգրանցվի: