Վաղը Վազգեն Սարգսյանի անվան «Հանրապետական» մարզադաշտում ֆուտբոլի Հայաստանի ազգային հավաքականը 2018 թվականի աշխարհի առաջնության ընտրական փուլի վերջին հանդիպումը կանցկացնի Երևանում՝ մրցելով Լեհաստանի հավաքականի հետ:
Հիշեցնենք, որ այս թիմերի միջև մեկ տարի առաջ Վարշավայում տեղի ունեցած խաղում լեհերը վերջին վայրկյաններին խփած գոլի շնորհիվ առավելության էին հասել 2:1 հաշվով: Այդ հանդիպումն, ի դեպ, վերջինն էր գլխավոր մարզիչ Վարուժան Սուքիասյանի համար:
Բուքմեյքերական ընկերությունները վաղվա խաղում բնականաբար բացահայտ ֆավորիտ են համարում Լեհաստանի հավաքականին՝ վերջինիս հաղթանակը գնահատելով ընդամենը 1.2 գործակցով: Ոչ-ոքիի համար սահմանված է՝ 6, իսկ Հայաստանի հաղթանակի համար՝ 11 գործակից: Ու թեև շատերի համար այս խաղում ամեն ինչ պարզ է, այդուամենայնիվ՝ փորձենք հասկանալ, թե ինչպիսին կլինի Հայաստանի ազգային հավաքականի մեկնարկային կազմը Լեհաստանի հետ խաղում:
Հիշեցնենք, որ որակազրկման պատճառով առաջիկա հանդիպումը բաց են թողնելու կենտրոնական պաշտպաններ Վարազդատ Հարոյանն ու Գաել Անդոնյանը: Վնասվածքի պատճառով հավաքականում չեն պաշտպաններ Լևոն Հայրապետյանը, Հրայր Մկոյանը, հարձակվող Արթուր Սարկիսովը: Այս տարվա մարտից հավաքականում չէ նաև հարձակողական ոճի կիսապաշտպան Գևորգ Ղազարյանը, որը Ղազախստանի դեմ խաղում ծանր վնասվածք ստացավ և վիրահատվելուց հետո միայն վերջերս է սկսել մարզվել:
Ըստ «Առաջին լրատվական»-ի՝ Հայաստանի ազգային հավաքականի օպտիմալ կազմը Լեհաստանի դեմ այսպիսին կլինի: Դարպասում՝ Գրիգոր Մելիքսեթյանը, որը Ռումինիայի հետ մրցավեճում լավագույնն էր մեր հավաքականի կազմում: Հարոյանի և Անդոնյանի բացակայության պայմաններում կենտրոնում Տարոն Ոսկանյանի հետ ստիպված կլինի խաղալ Հովհաննես Համբարձումյանը: Պաշտպանության ձախ եզրում կլինի «Ալաշկերտի» ներկայացուցիչ Գագիկ Դաղբաշյանը: Աջ եզրում տեսնում ենք Ռոբերտ Դարբինյանին, ով տևական ժամանակ հաջող է խաղում Գյումրիի «Շիրակում»: Կիսապաշտապնության խորքում Արտակ Գրիգորյանի հետ, կարծում ենք, կխաղա Դավիթ Մանոյանը, իսկ ենթահարձակվողի դիրքում՝ Մարկոս Պիզելին:
Հավաքականի ավագ Հենրիխ Մխիթարյանը կգործի կիսապաշտպանության ձախ եզրում, իսկ ձախից կխաղա Էդգար Մանուչարյանը: Վերջինս վնասվածք ուներ և բաց էր թողել մեր հավաքականի վերջին երկու հանդիպումները: Ապաքինվելուց հետո Մանուչարյանը «Ուրալի» մեկնարկային կազմում չի հայտնվել և սովորաբար փոխարինման է դուրս գալիս: Թեև այս ֆուտբոլիստը խաղային պրակտիկայի և ֆիզիկական պատրաստվածության հետ կարող է խնդիրներ ունենալ, այդուամենայնիվ, հիմնական կազմում խաղալու իրական թեկնածու է, քանզի փորձի և խաղի որակի առումով գերազանցում է, ասենք, Արտյոմ Սիմոնյանին կամ Կամո Հովհաննիսյանին:
Որպես նոմինալ հարձակվող տեսնում ենք Ռուսլան Կորյանին, ով բազմիցս է ապացուցել, որ այս դիրքում լավագույնն է մեր հավաքականում: Ռումինիայի դեմ խաղում Պետրոսյանը կենտրոնական հարձակվողի դիրքում օգտագործեց Տիգրան Բարսեղյանին, որն ունենալով դարպասը գրավելու մի քանի հնարավորություն՝ վրիպեց: Ու թեև Բարսեղյանը մակեդոնական «Վարդարի» առաջատարներից է և այս թիմի կազմում շարունակ գոլեր է խփում, այնուամենայնիվ՝ նրա խաղը Հայաստանի ազգային հավաքականում բավարար չես որակի:
Ի դեպ, Բարսեղյանն ու Հովհաննես Համբարձումյանը ազգային թիմին միացել են միայն հոկտեմբերի 3-ի առավոտյան, և հավանական է, որ ֆունկցիոնալ պատրաստվածության առումով խնդիրներ ունենան:
Լեհաստանի հետ խաղում խաղադաշտում, կարծում ենք, կտեսնենք նաև «Ալաշկերտի» կիսապաշտպան Արտակ Եդիգարյանին, ով շարունակում է աչքի ընկնել արդյունավետ խաղով: Չի բացառվում, որ Պետրոսյանը նրան ընդգրկի նաև մեկնարկային կազմում:
Հաշվի առնելով, որ Արթուր Պետրոսյանը շարունակ փոխում է թիմի կազմն ու ձախողում, չի բացառվում, որ Լեհաստանի դեմ տեսնենք, այսպես ասած, ոչ խելքին մոտիկ մեկնարկային կազմ: Վերջին հանդիպումներում մեր հավաքականի մարզիչը խաղալու հնարավորություն է տալիս գերմանական «Յան Ռեգենսբուրգի» հարձակվող Սարգիս Ադամյանին, ով ոչնչով աչքի չի ընկնում:
Հայաստան-Լեհաստան հանդիպումը կսկսվի ժամը 20-ին: