Վրաստանի վարչապետ Մամուկա Բախտաձեն կարծում է, որ երկրի տարածքով Հայաստան գազի տարանցման վերաբերյալ նոր համաձայնագրի շուրջ ռուսական «Գազպրոմ»-ի հետ բանակցությունները կավարտվեն մոտ ժամանակներս՝ տեղեկացնում է Sputnik-ը։
Վրաստանը և «Գազպրոմ»-ը Հայաստան գազի տարանցման նոր պայմանների շուրջ համաձայնության են եկել 2017թ․ հունվարին: Մինչ այդ վրացական կողմը տարանցման վճարը ստանում էր գազով:
Նոր պայմանագիրը կնքվել էր 2 տարով. առաջին տարում Վրաստանը տարանցման դիմաց վճարը մասնակիորեն ստանում էր բնական գազով, իսկ երկրորդ տարում վճարումն ամբողջությամբ կատարվում էր գումարով: Համաձայնագրի ժամկետը լրացել է 2018թ․ դեկտեմբերի 31-ին:
«Բանակցություններն ընթանում են: Դրանք վարում է Էկոնոմիկայի նախարարությունը, և եկեք սպասենք դրանց արդյունքներին: Կարծում եմ՝ այդ բանակցությունները կավարտվեն մոտ ժամանակներս: Մեր դիրքորոշումը հետևյալն է. Վրաստանը պետք է բարելավի իր դիրքերն այդ համաձայնագրում: Անտարակույս, ելման կետը կլինի մեր ազգային շահերը և մեր էներգաանկախությունը»,- ասել է Բախտաձեն Թբիլիսիում կայացած բրիֆինգի ժամանակ: Վրաստանը ռուսական գազ չի գնում 2017 թվականից: Երկիրը բնական գազով ապահովում է Ադրբեջանը։
