«Ընտրողների հետ հանդիպումները եղել են շատ պարտավորեցնող և շատ տպավորիչ ու ջերմ»,- «Առաջին լրատվական»-ին փոխանցեց Արցախի «Ազատ հայրենիք» կուսակցության նախագահ, Արցախի Հանրապետության նախագահի թեկնածու Արայիկ Հարությունյանը՝ ցավով նշելով, որ կորոնավիրուսի վտանգի հետ կապված չի հասցրել լինել բոլոր համայնքներում, և խոստանալով, որ անկախ ընտրությունների արդյունքներից՝ հանդիպելու է նաև այդ համայնքների բնակիչների հետ:
Դիտարկմանը, թե ինչ ռեսուրսներով է նա իրականացնելու այն խոստումները, որ ներկայացրել է նախընտրական ծրագրում, Արայիկ Հարությունյանը պատասխանեց. «Դրանք հնարավոր են, եթե ունենանք տնտեսական աճի բարձր տեմպեր և, իհարկե, աճի այդ տեմպերը կունենանք: Ինչ վերաբերում է առողջապահությանը, ապա շատերին թվում է, թե մենք ամբողջությամբ ենք անցնում պետպատվերի: Բայց ոչ, այդպես չէ. այսօր արդեն այդ ծրագիրը պետությունն իրականացնում է՝ այսօր առողջապահության 90 տոկոսը անվճար է, պետպատվեր է: Հիմնական շեշտադրումը լինելու է առողջապահական համակարգի աշխատողների աշխատավարձերի բարձրացումը: Եթե մենք դա չկատարենք, լուրջ խնդիր ենք ունենալու. այսօր որակյալ բժիշկների լուրջ արտահոսք ունենք: Համոզված եղեք՝ խնդիր չենք ունենալու, եթե անհրաժեշտ լինի, կրճատելու ենք այլ ծախսեր. մեր հայրենակիցների կյանքն ու առողջությունը մեզ համար ամենակարևորն է, և այստեղ մենք պետք է խնայողություն չանենք»:
Ամբողջությամբ՝ տեսանյութում: