«Երբ այն ժամանակ ես նշանակվեցի ԿԲ նախագահ, առաջին խնդիրներից մեկը, որ իմ առջև դրել էի՝ աշխատակիցների բարձր վարձատրության խնդիրն էր, որովհետև համոզված եմ, որ պետական ծառայողը պետք է բարձր աշխատավարձ ստանա, այսինքն՝ պետությունը պետք է բավականին լավ վարձատրի, որպեսզի ունենա որակյալ և պրոֆեսիոնալ կադրեր և որպեսզի այդ կադրերի «աչքը դրսում չլինի», թե ուրիշ ինչ լավ տեղ աշխատանքի անցնեն կամ որ քաղաքացուց ինչքան կաշառք ուզեն։ Այս իմաստով՝ պարզ է, որ ճակատի առաջին գծում հենց հարկային մարմինն է։
Իհարկե, շատերն օբյեկտիվորեն կարող են հարցնել՝ բա օրինակ ուսուցիչների աշխատավարձերն արդյո՞ք բավարար բարձր են, ինչին կպատասխանեմ՝ իհարկե ոչ, խայտառակ ցածր են, արժանապատիվ կյանք չապահովող աշխատավարձ է, սակայն այս առումով պետք է նկատի ունենանք, որ ուսուցչի աշխատավարձի բարձրացման միակ ճանապարհն այն է, որ եկամուտների եկամուտների հավաքագրման աստիճանը բարձրացվի, իսկ դրա հիմքում, ուզած-չուզած, դրված է հարկային ծառայության որակյալ գործունեությունը»,-«Առաջին լրատվական»-ի հետ զրույցում շեշտեց ՀՀ կենտրոնական բանկի նախկին նախագահ, տնտեսագետ Բագրատ Ասատրյանը՝ անդրադառնալով ՊԵԿ-ի պարգևավճարների ֆոնդի ավելացմանը։
Հատկանշական է, որ 2018 թ-ին ՊԵԿ-ում պարգևավճարների հանրագումարը կազմել է 5 միլիարդ դրամ, իսկ 2019թ-ին այն ավելացել է 800 միլիոն դրամով՝ կազմելով 5․8 միլիարդ դրամ։
Հունվարի 13-ին իր ասուլիսի ժամանակ ՊԵԿ նախագահ Դավիթ Անանյանը անդրադառնալով դրան՝ հայտարարել էր, թե պարգևավճարներ ստացել են բոլորը։
«Մենք կառավարությունով կարողացել ենք հասնել նրան, որ եթե ուզում ենք ունենալ պրոֆեսիոնալ անձնակազմ, գոնե այդ անձնակազմի և ոչ մասնավոր հատվածի միևնույն մասնագիտության մեջ որոշակի ֆինանսական մրցակցություն պետք է կարողանանք ապահովել»,-մասնավորապես ասել էր ՊԵԿ նախագահը։
Այս համատեքստում Բագրատ Ասատրյանը իր աշխատանքային պրակտիկայից մի դրվագ վերհիշեց․«Ես, անկեղծ ասած, կտրուկ միջոցների կողմնակից եմ․ ԿԲ նախագահի պաշտոնում մոտ մեկ ամիս աշխատելուց հետո՝ ես տեսա, որ ոչ մեկ նորմալ չի աշխատում և այդ ժամանակ մի վճիռ կայացրի՝ լուծարել Կենտրոնական բանկի ապարատը և ընդունել միայն նրանց, ովքեր համապատասխան ատեստավորումը կանցնեն․ հավատացնում եմ, որ այս որոշումից հետո՝ հաջորդ օրը բոլորն անխտիր սկսեցին կարգին աշխատել և դրանք այն նույն մարդիկ էին, ովքեր տարիներ շարունակ ոչ մի բան չէին արել ու ցանկություն էլ չունեին նորմալ աշխատելու»։
Մանրամասները՝ տեսանյութում։