HY RU EN
Asset 3

Բեռնվում է ...

Էջի վերջ Այլ էջեր չկան բեռնելու համար

Որոնման արդյունքում ոչինչ չի գտնվել

Սառա Պետրոսյան

Հրազդանի «արդիական բժշկական կենտրոնն» այնքան էլ արդիական չէ. բնակիչները շարունակում են Երեւան գնալ

Սառա Պետրոսյան

«Մարզային հիվանդանոցային համակարգում Հայաստանում առաջին անգամ ստեղծվել է հիմնական բժշկական սարքավորումներով հագեցած արդիական բժշկական կենտրոն»,- լրատվամիջոցներն այս լուրը բնակչությանն ավետեցին 2009թ. դեկտեմբերի 29-ին` Հրազդան քաղաքի բժշկական կենտրոնի բացման արարողությունը ներկայացնելիս:

Այդ օրից անցել է մոտ 9 տարի, եւ մեզ հետ զրուցած հրազդանցիները դժգոհում են, որ շարունակում են Երեւան գնալ՝ բժշկական օգնություն ստանալու համար: Նրանց ասելով՝ վերանորոգված հիվանդանոցը կադրերի պակաս ունի, շտապօգնության ընդամենը մեկ մեքենա է սպասարկում, հիմնականում` Ծաղկաձոր քաղաքին:

Հրազդան բժշկական կենտրոնի արդիականացումն իրականացվել է Համաշխարհային բանկի «Հայաստանի առողջապահության համակարգի արդիականացում» վարկային ծրագրի շրջանակում: «Հրազդանի բժշկական կենտրոն» ՓԲԸ-ի կազմում ներառված են հիվանդանոցը, պոլիկլինիկան եւ ծննդատունը: Ամբողջովին հիմնանորոգվել են կենտրոնի չորս մասնաշենքերը, շուրջ 800 հազար ԱՄՆ դոլարի նորագույն բժշկական սարքավորումներ ու կահույք էր ձեռք բերվել կենտրոնի համար:

«Հրազդան բժշկական կենտրոն» ՓԲԸ տնօրենի պաշտոնակատար Լիլիա Կարապետյանը համաձայն է հրազդանցիների հետ: Նա ասում է, որ կենտրոնի տեխնիկական հագեցվածությունը բավարար է, բայց կենտրոնն աշխատում է գերծանրաբեռնված, եւ սարքավորումներն արդեն մաշված են, իրենք անընդհատ վերանորոգելով են զբաղված:

«Ռենտգեն ապարատի հետ միշտ խնդիրներ ունենք, այն գերծանրաբեռնված է աշխատում: Ֆլուորոգրաֆիայի, սոնոգրաֆիայի ապարատները վատ վիճակում են, մաշվածությունը մեծ չափերի է հասնում եւ անընդհատ պետք է վերանորոգվեն: Հիմա ուզում ենք տեխնիկան կամաց-կամաց թարմացնել: Պետբյուջեից գումար են տրամադրել, նաեւ մեր մատուցած վճարովի ծառայություններից բավականին գումար ենք տնտեսել անցյալ տարի, կարող ենք տարեկան մեկ-երկու սարքավորում ձեռք բերել ու այդպես թարմացնել տեխնիկան»,- ասում է կենտրոնի տնօրենի պաշտոնակատար Լ. Կարապետյանը:

Կենտրոնը գրեթե բոլոր բաժանմունքներն ունի. շտապօգնության ծառայություն՝ ընդունարանի հետ, ստացիոնար բուժծառայություն, որի մեջ մտնում են վիրաբուժական, թերապիայի, վերակենդանացման բաժանմունքները, ծննդատունն ապահովում է մանկաբարձագինեկոլոգիական բոլոր ծառայությունները, պոլիկլինիկա, որն ունի ընտանեկան բժշկի գրասենյակ:

«Ո՞ր դեպքերում են հիվանդներին ուղեգրում Երեւան» հարցին նա պատասխանում է, որ տրավմաների, վթարների դեպքերում հարկադրված Երեւան են ուղարկում, որովհետեւ չունեն համակարգչային տոմոգրաֆիայի ապարատ: «Սա թանկ սարքավորում է, ո՛չ մենք ունենք, ո՛չ Սեւանի, ո՛չ էլ Չարենցավանի բժշկական կենտրոնները»,- նշում է Լ. Կարապետյանը:

Սարքավորումներից բացի, կենտրոնը մեկ այլ կարեւոր խնդիր ունի` մասնագիտացված բժիշկների պակասը: 430 հոգանոց անձնակազմից 100-ը բժիշկներ են, բայց եւս 12 բժշկի թափուր տեղ ունեն՝ քիթ-կոկորդ-ականջի բժիշկ է անհրաժեշտ ե՛ւ մանուկների, ե՛ւ մեծահասակների համար, ռենտգենի, կենսաքիմիական լաբորատորիայի բժիշկ, մանկական սրտաբան, ռեանիմատոլոգ, թոքախտաբույժ, ընդունարանի բժիշկ, վիրաբույժ եւ այլն:

Նշված հաստիքները վաղուց են թափուր: Տնօրենի պաշտոնակատարի խոսքով` կենտրոնում աշխատանքային լավ պայմաններ են ապահովում մասնագետների համար, լավ աշխատավարձ՝ 150 000 դրամ եւ զարմացած է, որ երեւանցի բժիշկները չեն արձագանքում մրցույթների հայտարարություններին:

Լիլիա Կարապետյանը մասամբ համաձայնեց շտապօգնության ծառայության վերաբերյալ բնակիչների դժգոհություններին: Հայտնեց, որ թեեւ շտապօգնության 4 մեքենա ունեն, բայց սպասարկումն իրականացնում են մեկ բրիգադով: «Հերթապահում ենք մի մեքենայով, մեկ բրիգադի պահպանման ծախսը տարեկան 40-50 մլն դրամ է, ֆինանսավորում չունենք, այդ պատճառով երկրորդ բրիգադ չենք կարող պահել»,- ասում է տնօրենի պաշտոնակատարը:

Շտապօգնության 4 մեքենաներից մեկն է հագեցած անհրաժեշտ սարքավորումներով, որը հիմնականում օգտագործում են հիվանդներին Երեւան տեղափոխելու համար: Նրա խոսքով` սպասարկման տարածքը մեծ է եւ չեն հասցնում բոլոր կանչերին ժամանակին արձագանքել. «Փորձում ենք կանչերն ըստ առաջնահերթության սպասարկել, օրինակ` Հրազդանից-Հանքավան 17 կմ է, գնալ-գալը բավականին ժամանակ է խլում, այդ ընթացքում այլ կանչերին հնարավոր է ուշացումով արձագանքեն»:

Բժշկական կենտրոնը, պետպատվերի շրջանակում, Հրազդան քաղաքում սպասարկում է մոտ 41 հազար բնակչության, մոտավորապես 14-15 հազար հոգի էլ հարակից գյուղերի՝ Լեռնանիստ, Սոլակ, Մեղրաձոր համայնքների բնակիչներն են (Մեղրաձորում ընդգրկված է 6 գյուղ՝ Քաղսի, Աղավնաձոր, Մարմարիկ, Հանքավան, Արտավազդ, Փյունիկ): Հանգստի սեզոնին այդ թիվը զգալիորեն մեծանում է՝ ի հաշիվ Ծաղկաձորում, Հանքավանում, նաեւ Սեւանում հանգստացողների, եւ, բնականաբար, շտապօգնության նույն տեխնիկայով եւ նույն անձնակազմով ժամանակին եւ որակյալ սպասարկում հնարավոր չէ ակնկալել:

Լ. Կարապետյանն անցյալ տարվա նոյեմբերից է աշխատանքի անցել «Հրազդան բժշկական կենտրոն» ՓԲԸ-ում, որպես տնօրենի պաշտոնակատար: Մինչ այդ, 17 տարի աշխատել է Մեղրաձորի բժշկական ամբուլատորիայում եւ ասում է, որ այդ տարածքում տարածված հիվանդություններն են՝ զարկերակային ճնշումը, շաքարային դիաբետը, սրտամկանի ինֆարկտը եւ ուռուցքները, որոնք շատացել են, հատկապես Մեղրաձորում (այստեղ ոսկու հանքավայր է գործում-Ս·Պ·): 

Լուսանկարները` Նարեկ Ալեքսանյանի

Մեկնաբանել

Լատինատառ հայերենով գրված մեկնաբանությունները չեն հրապարակվի խմբագրության կողմից։
Եթե գտել եք վրիպակ, ապա այն կարող եք ուղարկել մեզ՝ ընտրելով վրիպակը և սեղմելով CTRL+Enter