Անձին մեղադրանք առաջադրելու համար ՀՀ Քրեական դատավարությունը սահմանում է հստակ չափորոշիչներ, դրանցից է անհրաժեշտ ապացույցների համակցությունը: «Դատելով ՀՔԾ-ի կողմից հրապարակված տեղեկությունից, ենթադրում եմ, որ ՀՀ ՀՔԾ-ն այս փուլում ապացույցների բավարար համակցություն է տեսել իր իսկ վարույթում քննվող գործի շրջանակներում, ինչն էլ հնարավորություն է տվել ՀՀ երրորդ նախագահ Սերժ Սարգսյանին մեղադրանք առաջադրելու և քրեական գործով նրան որպես մեղադրյալ ներգրավելու համար:
Այլ հարց է, որ հանրությունը սպասելիքներ ունի Ս. Սարգսյանի ենթադրյալ այլ արարքներին իրավական գնահատական տալու վերաբերյալ: Այս մասին «Առաջին լրատվական»-ի հետ զրույցում ասաց փաստաբան Նորայր Նորիկյանը՝ հավելելով, որ նախադրյալներ կան, որ ՀՀ իրավապահ մարմինները Սերժ Սարգսյանի մասին հիշեցնելու նաև այլ հիմքեր կունենան: Դեռևս վաղ է նրա քայլերին իրավական գնահատական տալ:
Հիշեցնենք՝ Հայաստանի երրորդ նախագահ Սերժ Սարգսյանին մեղադրանք է առաջադրվել մոտ կես միլիարդ դրամ գումարի հափշտակության կատարումը կազմակերպելու համար: Նախկին նախագահի խափանման միջոց է ընտրվել ստորագրությունը չհեռանալու մասին:
Վերջին շրջանում խոսակցություններ էին ի հայտ գալիս առ այն, որ Ս. Սարգսյանի և Ն. Փաշինյանի միջև կա ստվերային պայմանավորվածություն, այդ պատճառով Ս. Սարգսյանին որպես մեղադրյալ չեն ներգրավում որևէ քրեական գործով, մասնավորապես Մարտի 1-ի գործով, ինչն ակնկալվում էր: Ի դեպ՝ այս մասին թափանցիկ ակնարկ արեց նաև ԲՀԿ խմբակցության պատգամավոր Գևորգ Պետրոսյանը: Անդրադառնալով այս դիտարկմանը՝ Ն.Նորիկյանը նշեց, որ քաղաքականության մեջ այսպիսի խոսակցությունները հնարավոր չէ բացառել. «Փորձ է արվում քաղաքական լուսանցքից վերադառնալ այս կողմ, նախորդ քաղաքական ռեժիմի կողմից փորձ է արվում ատամ ցույց տալ, այդ համակարգի որևէ ներկայացուցչի կողմից ատամ ցույց տալու դեպում օրինական միջոցներով այն պետք է ջարդել: ՀՀ ժողովուրդը նախկին ռեժիմին տվել է իր գնահատականը, այդ գնահատականն աներկբա է…»:
Ն. Նորիկյանի դիտարկմամբ՝ Սերժ Սարգսյանի և Ռոբերտ Քոչարյանի ճակատագրերը խաչվում են Մարտի 1-ով: «Ս. Սարգսյանի արարքներում արդյո՞ք եղել են քրեական հանցագործություն պարունակող տարրեր և նա ինչ առնչություն է ունեցել Մարտի 1-ի կամ Մարտի 1-ին նախորդած և հաջորդած իրադարձությունների հետ: Կարծում եմ՝ իրավապահ մարմինները վաղ թե ուշ կպատասխանեն այս հարցին»:
Անդրադառնալով Ռ. Քոչարյանի դատարանում արված հայտարարությանը, թե իբրև քրեական գործ հարուցող մարմինները գործադիր իշխանության ազդեցության տակ են, փաստաբանն ընդգծեց, որ զարմանալի է, որ Քոչարյանը օրենքներից ու օրինականությունից է խոսում. «Շատ լավ կլիներ, որ գիտակցում ունենար իր օրոք տեղի ունեցած գործընթացների մասին… Քոչարյանի կառավարման ժամանակ վտանգված էր յուրաքանչյուրի կյանքի իրավունքը. կուլմինացիան Մարտի 1-ն էր»:
Մանրամասն՝ տեսանյութում: