«Իշխող քաղաքական թիմը տվել է բազմաթիվ խոստումներ, սակայն դրանց զգալի մասը չի կատարել, կամ էլ կատարել է ճիշտ հակառակը»
2018-ի իշխանափոխությունից հետո էական հետընթաց ունենք։ Այս մասին այսօր Ֆրանսիայի հրապարակում տեղի ունեցած քննարկման ժամանակ ասաց ՀՀ էկոնոմիկայի նախկին փոխնախարար Գարեգին Մելքոնյանը։
Ըստ նրա՝ հետընթացը ոչ միայն տնտեսությունում է, այլև պետական կառավարման ամենատարբեր ոլորտներում։
Նրա խոսքով՝ կա երեք հիմնական գործոն, որն ազդում է պետության կողմից իրականացվող աշխատանքի վրա։ Առաջինն, ըստ նրա, արդյունավետ պետական կառավարումն է, երկրորդը՝ երկիրը պետք է ունենա զարգացման օրակարգ, որը բխի երկրի, ժողովրդի, պետության շահերից, երրորդը՝ պրոֆեսիոնալ թիմն է, որն ունակ լինի իրականացնելու ծրագրերը։ Մինչդեռ, ինչպես նշեց Գարեգին Մելքոնյանը, այս երեք գործոնի մասով էլ կա խնդիր։
«Պետական կառավարման ոչ արդյունավետությունը բերում է խնդիրների բոլոր առումներով։ Եթե դու չունես արդյունավետ գործող պետական համակարգ, ապա բնակչությունը չի կարող ապրել բարեկեցիկ պայմաններում»,- ասաց նա։
Գարեգին Մելքոնյանը նկատեց, որ իշխող քաղաքական թիմը տվել է բազմաթիվ խոստումներ, սակայն իրենց փորձագիտական խմբով իրականացված ուսումնասիրության արդյունքում պարզել են, որ նախընտրական կամ կառավարության ծրագրերում ներառված խոստումների զգալի մասը կամ չի կատարվել, կամ էլ կատարվել է ճիշտ հակառակը, ինչը տարօրինակ է։
Նա նշեց, որ պետական կառավարման համակարգում աշխատանքը մասնագիտական գործունեություն է, չի կարելի է պաշտոնների անունները դնել քաղաքական և դրանցում նշանակել մարդկանց, որոնք իրենց կյանքում երբեք որևէ պետական կառավարման համակարգի աշխատանք չեն իրականացրել։
«Երկիրը փորձադաշտ չէ։ Պետական կառավարման բարձրագույն պաշտոններում աշխատելով չեն սովորում, սովորում են բուհերում, կրթական հաստատություններում, ցածր պաշտոններում ձեռք են բերում փորձառություն, իսկ ղեկավար պաշտոնում ղեկավարում են երկիրը։ Հետևաբար, եթե մասսայական երկիրը հանձնում ես պետական կառավարման համակարգում փորձառություն չունեցող մարդկանց, ապա պրոբլեմն արդեն իսկ ապահոված է», - ասաց Գարեգին Մելքոնյանը։
Հարակից հրապարակումներ`
Լրահոս
Տեսանյութեր
Անահիտ աստվածուհու արձանը կցուցադրվի Հայաստանի պատմության թանգարանում պահվող բացառիկ նմուշների հետ