Դատախազ Բաղդասարյան. ՍԴ-ից ակնկալում եմ մասնագիտական մոտեցում
Սահմանադրական կարգի ենթադրյալ տապալման գործով մեղադրող դատախազ Գևորգ Բաղդասարյանը պնդում է՝ առկա է իրավունքի չարաշահում։
«Մենք խոսում ենք այն մասին, երբ անձինք օրենքով նախատեսված իրենց իրավունքներն իրացնում են ոչ թե այդ իրավունքի հետապնդած նպատակին հասնելու համար, այլ միգուցե իրենց դատավարական շահն ապահովելու համար, այն դեպքում երբ այդ շահն օրենքով պաշտպանված չէ»,-լրագրողների հետ ճեպազրույցում հայտարարեց դատախազ Բաղդասարյանը։
Մեղադրողի կողմի ներկայացմամբ, պաշտպանական կողմի շահը նիստերը ձգձգելն է, դատաքննության փուլին անցնելն ու ապացույցների հետազոտումը բացառելն է։
Լրագրողների դիտարկմանը, թե նիստերի ձգձգման համար պաշտպանական կողմը մեղադրում է դատավորին, որ պաշտպաններն էլ հայտարարել են՝ սպասում են դատաքննության փուլին՝ ջախջախելու մեղադրանքը, դատախազն արձագանքեց.
«Նրանց հայտարարություններն ու վարքագիծը իրար չեն համապատասխանում»։
Նա նկատեց, մեղադրող կողմի պատճառով ոչ մի նիստ չի հետաձգվել, մինչդեռ պաշտպանները կրկնել են իրար, ներկայացնելով խափանման միջոցի փոփոխման, մեղադրողներին բացարկ հայտնելու նմանատիպ միջնորդություններ։
Հարցին, արդյո՞ք դատախազությունը բողոքարկել է Վերաքննիչ քրեական դատարանի որոշումը՝ 2 մլրդ դրամ գրավի դիմաց Ռոբերտ Քոչարյանին կալանքից ազատելու վերաբերյալ, դատախազն ասաց՝ դատական ակտը դեռ չեն ստացել, այն ստանալուց անմիջապես հետո կպատրաստեն բողոք ու կներկայացնեն Վճռաբեկ դատարան։
Լրագրողները ցանկացան իմանալ Գևորգ Բաղդասարյանի կարծիքը՝ արդյո՞ք գործը կհասնի դատաքննության փուլ, հաշվի առելով, որ հուլիսի 7-ին Քրեական օրենսգրքի 300.1 հոդվածի սահմանադրականության հարցի քննություն է նշանակված ՍԴ-ում, եթե դատարանը բավարարի դիմումը, կստացվի բոլոր մեղադրյալների մեղադրանքը դուրս է գալիս։
«Սահմանադրական դատարանը նման դիրքորոշում արտահայտնելու համար հիմքեր չունի, դրանց մի մասն արդեն ներկայացրել ենք նախկին դատական նիստերի ընթացքում։ ՍԴ-ն նման հիմքեր չի ստացել ՄԻԵԴ-ից ու Վենետիկից ստացած խորհրդատվական կարծիքներում։ Դրանցում որևէ դրույթ չկա այն մասին, որ մեղսագրվող արարքը սահմանող դրույթները իրավական որոշակիություն չունեն»,-ասաց նա՝ կրկին պնդելով, որ 300.1 հոդվածն իրավական որոշակիության խնդիր չունի։
Նա հրաժարվեց կանխատեսումներ անել, թե ինչ որոշում կընդունի ՍԴ-ն, չպատասխանեց այն հարցին, արդյո՞ք ՍԴ-ն որոշում կայացնելիս առաջնորդվելու է քաղաքական, թե՞ իրավական մոտեցումներով։
«Որպես իրավաբան Սահմանադրական դատարանից ակնկալում եմ մասնագիտական մոտեցում, իմ վստահ համոզմամբ, վիճարկվող նորմերը Սահմանադրությանը համապատասխանում են»,-նշեց նա։
Դատախազի խոսքով, Ռոբերտ Քոչարյանին ու մյուսներին առաջադրված մեղադրանքը հիմնավոր է, իսկ մեղադրանքի հիմնավորվածությունը երևում է ապացույցների հետազոտումից հետո։
Հիշեցնենք, որ Երևանի ընդհանուր իրավասության դատարանը՝ նախագահությամբ դատավոր Աննա Դանիբեկյանի, այսօր կրկին հետաձգեց սահմանադրական կարգի ենթադրյալ տապալման գործով հերթական նիստը։ Դատախազ Գևորգ Բաղդասարյանը միջնորդություն ներկայացրեց, խնդրելով դատարանին սահմանափակել պաշտպանական կողմի՝ տարբեր տեսակի միջնորդություններ ներկայացնելու դատավարական իրավունքը։ Ըստ նրա՝ պաշտպանների նման գործողությունները թույլ չեն տալիս նրանց ընթերցել մեղադրական ճառի եզրափակիչ մասը։
Նախագահող դատավորն արձանագրեց, որ դատախազի միջնորդության մեջ առկա են այնպիսի հարցեր, որոնք անհնար է քննարկել առանց բոլոր պաշտպանների ներկայության և հետաձգեց դատական նիստը։
Հաջորդ դատական նիստը նշանակվեց հունիսի 30-ին, ժամը 13։00-ին
Հարակից հրապարակումներ`
- Խուդոյան. Մեղավորը ՀՔԾ-ն է, որ հիմար մեղադրանք է ուղարկել դատարան
- Ռոբերտ Քոչարյանի ու մյուսների գործով դատական նիստը հետաձգվեց
Լրահոս
Տեսանյութեր
Անահիտ աստվածուհու արձանը կցուցադրվի Հայաստանի պատմության թանգարանում պահվող բացառիկ նմուշների հետ