ԲՀԿ պատգամավոր. Ո՞վ է ասել՝ կառավարությունը կամ օրենքները շատ որակյալ են, որ կողմ ենք քվեարկում

PanARMENIAN.Net - Հեղափոխությունների ժամանակ մակընթացություններն ու տեղատվությունները շատ են, բայց խոշորները մնում են և՛ դրանցից առաջ, և՛ հետո: Այս մասին Ազգային ժողովի նիստի ժամանակ ասել է ԲՀԿ խմբակցության պատգամավոր Միքայել Մելքումյանը՝ անդրադառնալով նոյեմբերի 12-ի ԱԺ ելույթներին և դրանց արձագանքներին:

Նոյեմբերի 12-ին ԲՀԿ խմբակցության պատգամավոր Գևորգ Պետրոսյանն օրենքի նախագիծ էր առաջարկել, որով արգելվում էր «նույնասեռականների և սեռափոխված անձանց» կողմից երեխա որդեգրելը: Պետրոսյանը հարցադրում էր արել, թե կուզեին կողմ քվեարկող պատգամավորները, որ իրենց ընտանիքներում լիներ «նման երևույթ»: Հարցը վրդովվեցրել էր ԱԺ նախագահ Արարատ Միրզոյանին և քննադատության առիթ դարձել մի շարք պատգամավորների կողմից:

«Պատգամավորն ազատ իր հարցադրումն անում է մերժված օրենքի շրջանակում, 15-20 հոգի կազմակերպված սկսում են այդ ելույթի դեմ հակադարձել: Ի՞նչ ենք մենք ուզում: Երբ Գևորգ Պետրոսյանը խոսում է, մեր ամբողջ խմբակցության տեսակետն է, մենք կողմ ենք դրան, դու ուզու՞մ եք ցուցումներ տալ մեզ: Չի հաջողվի»,- ասել է Մելքումյանը՝ հավելելով, որ եթե այդ ճանապարհով գնան, իշխանությունը կդնի պառլամենտական ժողովրդավաության ճգնաժամի սկիզբը:

Պատգամավորն անդրադարձել է նաև «Իմ քայլը» խմբակցության պատգամավոր Վլադիմիր Վարդանյանի ելույթին՝ նշելով, որ նա ցանկանում է ցուցումներ տալ երկու քաղաքական ուժերի, որպեսզի նրանք հիմնավորումներ ներկայացնեն քվեարկության համար:

«Մենք պետք է վերաիմաստավորենք այս մերժումների և քննարկումների որակը, ո՞վ է ասել, որ կառավարությունը կամ այլ օրենքներ շատ որակյալ են, որ մենք կողմ ենք քվեարկում: Մենք մեր կուսակցական շահը սոտրադասում ենք պետական շահին. կարող է 1 դրույթ դրական է, 9 դրույթ՝ վիճահարույց»,- ասել է Մելքումյանը՝ նշելով, որ կան քաղաքական և մասնագիտական որոշումներ, և ամեն ինչ հիմնավորում ունի: