2017թ-ի ընթացքում ֆինանսական համակարգի հաշտարարի գրասենյակը ընդհանուր առմամբ ստացել է 5020 բողոք, որից 4368-ը վերաբերել են ֆինանսական համակարգին։ 4368 բողոքից 1672-ը դարձել է գրավոր պահանջ, որոնց մեծամասնությունն էլ բավարարվել է։
«Բողոքների 82%-ը հանգուցալուծվել է հօգուտ հաճախորդների, որից 50%-ը հանգուցալուծվել է հաշտության միջոցով․ մենք մեր գործունեության առաջին օրվանից որդեգրել ենք հաշտեցման եղանակով բողոքների հանգուցալուծումը և սա մեզ օգնում է այն տեսանկյունից, որ կարողանում ենք ավելի սերտ համագործակցություն ապահովել ֆինանսական կազմակերպությունների հետ և ոչ բոլոր դեպքերում կայացնել պարտադիր որոշումներ»,- «Առաջին լրատվական»-ի հետ զրույցում մանրամասնեց ֆինանսական համակարգի հաշտարար Փիրուզ Սարգսյանը։
Վերջինիս տեղեկացմամբ՝ բողոքների մեջ մեծ տեսակարար կշիռ ունի ապահովագրական ոլորտի դեմ ուղղված բողոքները, որոնց թվում ավելի մեծ կշիռ ունեն ԱՊՊԱ ոլորտին վերաբերող բողոքները։ Բացի դրանից կան նաև բանկերի, վարկային կազմակերպությունների և ֆինանսական այլ կազմակերպությունների դեմ ուղղված բողոքներ, որոնք, սակայն, իրենց տեսակարար կշռով զիջում են ապահովագրական ոլորտի դեմ ուղղված բողոքներին։
«ԱՊՊԱ-ն խոշոր ծավալ ունեցող գործիք է և մոտավոր 400 հազարի կարգի ԱՊՊԱ պայմանագիր է կնքվում հաճախորդների հետ և, բնականաբար, քանի որ ֆինանսական պրոդուկտի քանակը մեծ է, ըստ այդմ բողոքների քանակն էլ շատ է լինում»,- նշեց Փիրուզ Սարգսյանը։
Ֆինանսական համակարգի հաշտարարը Հայաստանում մասնագիտական գործունեություն է ծավալում արդեն 9 տարի։ Մեր զրուցակցի հավաստմամբ՝ իրենց գրասենյակ ստացվող բողոքների դինամիկան տարեց տարի ավելանում է, ինչը Սարգսյանի խոսքերով՝ դրական է։
«Դա պայմանավորված է նրանով, որ մեր քաղաքացիներն իրավագիտակցության տեսանկյունից ավելի հասունանում են և ավելի շատ են իրազեկված լինում իրենց շահերի ու իրավունքների մասին»,- հիմնավորեց նա։
Մանրամասները՝ տեսանյութում։