16:21:11 1°C
  • USD - 482.28 ֏
  • EUR - 568.13 ֏
  • RUB - 6.53 ֏
  • «Աշխարհը պետք է արթնանա ու այս վարակն ընկալի որպես հանրության թիվ մեկ թշնամի».ԱՀԿ ղեկավարն ասել է, որ կորոնավիրուսի պատվաստանյութը պատրաստ կլինի 18 ամսից ոչ շուտ

    14:14 16 Փետրվար 2020

    Առողջապահության համաշխարհային կազմակերպության ղեկավար Թեդրոս Ադանոմ Գեբրեիսուսը, անդրադառնալով կորոնավիրուսի համաճարակին, հայտարարել է, որ չինական քաղաքներում և աշխարհի տասնյակ երկրներում արագ տարածվող վարակը «սոսկալի սպառնալիք» է:

    Ինչպես նշում է The Guardian-ը, նա կորոնավիրուսի ներկայացրած վտանգը համեմատել է ահաբեկչության հետ:

    «Վարակները կարող են ավելի հզոր հետևանքներ ունենալ, քան որևէ ահաբեկչական գործողություն»,-ասել է Գեբրեիսուսը:

    Պաշտոնյան հայտարարությամբ է հանդես եկել Ժնևում, որտեղ նա հանդիպել է աշխարհի տարբեր անկյուններից եկած 400 գիտնականների հետ՝ փորձելով լուծում գտնել համաճարակի հետ կապված ճգնաժամային իրավիճակի համար:

    Գեբրեիսուսն ընդգծել է, որ COVID-19 անվանումը ստացած վարակի պատվաստանյութը պատրաստ կլինի 18 ամսից ոչ շուտ:

    «Իսկ մինչ այդ մենք պետք է գործի դնենք այսօր ձեռքի տակ ունեցած բոլոր միջոցները»,-ասել է պաշտոնյան՝ հավելելով, որ այս ամենը դեռևս միայն «այսբերգի գագաթն» է:

    «Աշխարհը պետք է արթնանա ու այս վարակն ընկալի որպես հանրության թիվ մեկ թշնամի»,-հավելել է ԱՀԿ ղեկավարը:

    Մինչդեռ Հոնկոնգի առաջատար վարակաբան Գաբրիել Լունը, որը ևս մասնակցել է ժնևյան հանդիպմանը, բրիտանական պարբերականի հետ զրույցում ասել է, որ եթե պատշաճ վերահսկողություն չլինի, ապա նոր տեսակի կորոնավիրուսը կարող է վարակել աշխարհի բնակչության 2/3-րդ մասին: Ըստ մասնագետի՝ յուրաքանչյուր վարակակիր կորոնավիրուսը կարող է փոխանցել միջինը 2,5 մարդու:

    «Դա կազմում է մոլորակի բնակչության 60%-ը, ինչն ահռելի թիվ է»,-ասել է գիտնականը:

    Նշվում է, որ կորոնավիրուսի զոհերի թիվը հատել է հազարի շեմը, մինչդեռ վարակվածներն ավելի քան 42 000-ն են: ԱՀԿ տվալներով՝ կորոնավիրուսը տարածվել է աշխարհի մոտ 30 երկրում:

    ԿԱՅՔԻ ՀԻՆ ՏԱՐԲԵՐԱԿ

    Լրահոս