Ուկրաինայի Պետական սահմանապահ ծառայությունը եւ ոստիկանությունը փորձում են Միխայիլ Սաակաշվիլիին փոխանցել վարչական իրավախախտման մասին արձանագրությունը:
«Նոր ուժերի ռուխ» կուսակցության քաղխորհրդի անդամ Իվան Սլոբոդյանիկին վկայակոչելով՝ «Ուկրաինսկայա պրավդան» հայտնում է, որ ուժայինները ժամանել են «Լեոպոլիս» հյուրանոց, որտեղ ավելի վաղ իջեւանել էր Վրաստանի նախկին նախագահ, Օդեսայի նախկին նահանգապետ Միխայիլ Սաակաշվիլին, որպեսզի նրան փոխանցեն պետական սահմանը հատելիս վարչական իրավախախտման մասին արձանագրությունը: Նշվում է, որ սահմանապահները չգիտեն, թե որ համարում է իջեւանել նախկին նահանգապետը, Սաակաշվիլին նրանց չի հանդիպել:
Ուկրաինայի գլխավոր դատախազի նախկին տեղակալ Դավիդ Սակվարելիձեն, որը Սաակաշվիլիի կողմնակիցներից է, լվովցիներին կոչ է արել «անհապաղ հավաքվել «Լեոպոլիս» հյուրանոցի մոտ եւ օգնել պաշտպանելու «մեր ընդհանուր ազատություններն ու իրավունքները»:
