Այսօր ԱՄՆ-ն կհրապարակի Երուսաղեմն Իսրայելի մայրաքաղաք ճանաչելու որոշումը: Երուսաղեմի հայոց պատրիարքությունը ունի լուրջ մտահոգություններ: ԱՄՆ-ի կողմից Երուսաղեմի ճանաչումը որպես Իսրայելի մայրաքաղաք կարող է միջկրոնական բախումների հանգեցնել: Այդ մասին «Առաջին լրատվական»-ի հետ զրույցում ասաց Երուսաղեմի հայոց պատրիարքության դիվանապետ Կորյուն վարդապետ Բաղդասարյանը: Այս պահին Երուսաղեմի քրիստոնյա հոգևոր առաջնորդները նամակ են խմբագրել և պատրաստվում են մինչև ժամը 11:00-ն այն պետք է ուղարկեն ԱՄՆ նախագահ Դոնալդ Թրամփին: Նամակում հոգևոր առաջնորդներն իրենց մտահոգություններն են հայտնում հայտարարության վերաբերյալ և խնդրում են Թրամփին վերանայել որոշումը.«Այո՛, մենք մտահոգ ենք, որ սա կարող է առաջ բերել ատելություն, կոնֆլիկտ, բռնություն, և առավել ևս, տառապանք»,-ասաց Հայր Կորյունը:
Հարցին՝ ի՞նչ է սպասվում հայկական կալվածքներին, եթե որոշումը հրապարակվի, Հայր Կորյունը նշեց, որ առհասարակ Երուսաղեմի կարգավիճակն է փոխվում, և այն կարող է իր հետևանքներն ունենալ Երուսաղեմի հայկական կալվածքների և կամ թաղամասի վրա: Նրա խոսքով՝ որևէ փոփոխություն Երուսաղեմի կարգավիճակում կարող է անմիջական ազդեցություն ունենալ նաև Երուսաղեմի հայկական թաղամասի և կալվածքների վրա:
«Մյուս քրստոնյա հոգևոր պետերի հետ մտահոգ ենք այս կատարվելիք հայտարարության համար, դրա համար կոչ ենք անում նախագահ Թրամփին՝ վերանայելու իր հայտարարությունը»,-հավելեց հայր Կորյունը:
Եթե հայտարարությունը կյանքի կոչվեց, նրա խոսքով, բախումներ կսկսվեն պաղեստինցիների և իսրայելականների միջև.«Բախումներ կլինեն նրանց մեջ, և անշուշտ, մենք էլ այդ քաղաքի բնակիչներն ենք, և այդ ամենը կազդի նաև մեզ վրա»,-ասաց հայր Կորյունը: